Hesekiel 45 - AHYERƐLƐ KRONGRON

¹ Na sɛ ɛmɔfa serewagualɛ so bɛkyɛ aseɛ ne maa ɔyɛ agyapadeɛ a, odi kyɛ ɛmɔpɛ aseɛ ne bie betu besie berɛ maa ɔyɛ krongron ma AWURADE. Ye tendenn nu kɔyɛ agyirɛ apee aburanyɔ ne nnu, yeɛ ye tɛtrɛtɛɛ nu kɔyɛ agyirɛ apee buru; na sɔ aseɛ ne kɔyɛ krongron wɔ ye nekaa biala.

² Sɔ aseɛ ne aso ala, aseɛ ahinanan bɔ ye tendenn nu te agyirɛ ɛyaa nnu, bɔ ye tɛtrɛtɛɛ nu koso sɔ ala ɔ, yeɛ ɔkɔyɛ nekaa krongron ne ɔ. Ma aseɛ bɔ ye piri te agyirɛ aburannu ɔ ɔla ye nwo bra yia.

³ Na sɔ aseɛ ne bɔ apɛ ato berɛ ne, susu nu bie bɔ ye tendenn nu te agyirɛ apee aburanyɔ ne nnu, bɔ ye tɛtrɛtɛɛ nu te agyirɛ apee buru ɔ, bɔ nu yeɛ ɔkɔyɛ nekaa krongron ne, krongron nu krongron ne ɔ.

⁴ Berɛ yeɛ ɔkɔyɛ aseɛ ne anu nekaa krongron ne ɔ. Asɔfo mɔ bɔ bɛyɔ ɛsɔnenɛ adwuma wɔ nekaa krongron ne anu, bɔ bepingye AWURADE bɛso ye ne, ɔkɔyɛ bɛ deɛ. Berɛ kɔyɛ b’awuro mɔ ɔne aseɛ krongron bɔ nekaa krongron ne ɔwɔ ɔ.

⁵ Aseɛ bɔ ye tendenn nu te agyirɛ apee aburanyɔ ne nnu, bɔ ye tɛtrɛtɛɛ nu te agyirɛ apee buru ne ɔ, ɔkɔyɛ Lewifoɛ bɔ bɛyɔ somvoɛ adwuma wɔ awuro ne anu ɔ bɛ deɛ, na ɔkɔyɛ bɛ nguro bɔ bɛkɔtena so ɔ.

⁶ “Ma aseɛ bɔ ye tɛtrɛtɛɛ nu te agyirɛ apee nnu, bɔ ye tendenn nu te agyirɛ apee aburanyɔ ne nnu ɔ ɔla kuro ne anwo, wɔ aseɛ krongron ne anwo, na ɔkɔyɛ Yisrael awuro ama amukoraa bɛ deɛ.

Ɛhene n’aseɛ deɛ

⁷ “Aseɛ bɔ ɔla aseɛ krongron ne bue nyɔ nemɔ anwo, ɔne aseɛ bɔ ɔla kuro ne anwo ne, ɔkɔyɛ ɛhene ne deɛ; bɔ ɔla aseɛ krongron ne anwo, ɔne aseɛ bɔ ɔla kuro ne anwo ne, wɔ eyia atɔleɛ so ne eyia afiteleɛ so, bɔ ye tendenn ne abusua kure ko b’aseɛ te pɛ ɔ, bɔ ɔtrɛ fi eyia atɔleɛ ɛwɛen so kodwu eyia afiteleɛ ɛwɛen so ɔ.

⁸ Ɔkɔyɛ ye agyapadeɛ wɔ Yisrael. Na me hene mɔ bɛngɔhyɛ me maen so ko, na mmom bɛkɔfa aseɛ ngaa ne bɛkɔma Yisrael awuro ama kyɛbɔ bɛ mmusua kure nemɔ te ɔ.

⁹ “AWURADE Nyameɛ nwa nyoo: O Yisrael ahemvo mɔ, wayɛ yee! Ɛ́mɔyakyi asisie ne nhyɛsoɛ ne, ná mmom ɛ́mɔyɔ bɔ ɔte pɛpɛɛpɛ ne bɔ ɔtengyɛ ɔ. Nhyɛsoɛ so bɔ ɛmɔfa bede aseɛ befi me mmenia sa nu ne, ɛ́mɔyakyi, AWURADE Nyameɛ noa dwirɛ ɛne.

¹⁰ “Ɛmɔ tonyi, ɛmɔ graa ne ɛmɔ galɔn nemɔ, odi kyɛ ɔyɛ turoloo.

¹¹ Odi kyɛ graa ne galɔn ne bɛyɛ pɛ. Galɔn ko te angora ko bɔ bahyɛ nu buru ɔ, yeɛ graa ko te angora ko bɔ bahyɛ nu buru ɔ. Angora yeɛ bɛkɔfa bekosusu nikye ɔ.

¹² Sekel ko kɔyɛ gyera aburanyɔ. Sekel aburanyɔ, sekel aburanyɔ ne nnu ne sekel buru ne nnu yeɛ ɔkɔyɛ ɛmɔ mina ɔ.

¹³ “Afɔleɛ bɔ odi kyɛ ɛmɔfa bɛba hɔ ɛhe: Atokoɔ angora ko biala, graa ko ngyɛmuɛ nzia nu ko; yeɛ ayuo angora ko biala, graa ko ngyɛmuɛ nzia nu ko.

¹⁴ Yeɛ ngoo nwo nhyehyɛleɛ ɛhe: ngoo angora asusudeɛ biala, ɛ́mɔfa galɔn ko nu ngyɛmuɛ buru, (angora asusudeɛ te angora, na galɔn buru yeɛ ɔwɔ nu ɔ);

¹⁵ yeɛ mmoaen kure bɔ ɔte ɛyaa nyɔ biala, bɔ bɛwɔ Yisrael nekaa bɔ berɛ ndire te frɔmfrɔm ne, ɛ́mɔye boaen ko béfi nu. Ɛhe te aleɛ afɔleɛ, naen yeralɛ afɔleɛ ne asomdwee afɔleɛ bɔ bɛkɔfa bɛkɔpata bɛkɔma bɛ ɔ, AWURADE Nyameɛ noa dwirɛ ɛne.

¹⁶ Odi kyɛ aseɛ ne aso ama mukoraa bɛfa sɔ afɔleɛ ne bɛbrɛ Yisrael hene ne.

¹⁷ Ɛhene ne, ɔte ye asɛdeɛ kyɛ odwu aluolue nemɔ, ɛsraen foforɛ, afofingyẽa nemɔ ne Yisrael awuro ama b’aluolue amukoraa bɔ bahyehyɛ ne a, ɔkɔfa bɔne nwo afɔleɛ, aleɛ afɔleɛ ne anonneɛ afɔleɛ kɔwa ɔ. Ye yeɛ ɔkɔfa bɔne nwo afɔleɛ, aleɛ afɔleɛ, naen yeralɛ afɔleɛ ne asomdwee afɔleɛ bɔ bɛfa bɛpata bɛma Yisrael awuro ama ne kɔwa ɔ.

¹⁸ AWURADE Nyameɛ nwa nyoo: Bosome bɔ oli moa ne, ye kyẽa bɔ oli moa ne, fa nandwie akrɔngrɔma ko bɔ ollili nnɛen ɔ pete nekaa krongron ne anwo.

¹⁹ Ɔsɔfo ne, odi kyɛ ɔfa bɔne nwo afɔleɛ mogya ne bie kekã awuro berɛ aponnwaa nemɔ anwo, afɔleɛ bokyea ne bo kaa ndweasoɛ nna ne anwo, yeɛ anoa piri aponnwaa bɔ ɔwɔ ye kunu dɔ aluo berɛ ne anwo.

²⁰ Bosome ne, ye kyẽa bɔ ɔtɔ so nzoo ne, ebiala bɔ ɔnate mvomsoɛ so, anaa bɔ ye adwene te kãa ti wayɔ bɔne ne, gyina ye gya nu yɔ sɔ. Na sɔ yeɛ odi kyɛ ɛmɔpata bɛma awuro ne ɔ.

²¹ “Bosome bɔ oli moa ne, ye eleburu ne nna ne aso, ɛ́mɔli Abɔtra aluolue ne, na ɛ́mɔli paanoo kabrɛdi ɛlɛsoo.

²² Sɔ kyẽa ne ala, odi kyɛ ɛhene ne fa nandwie nyii akrɔngrɔma ko ɔba maa bɛbɔ bɔne nwo afɔleɛ bɛma ye bɔbɔ ne aseɛ ne aso ama mukoraa.

²³ Na aluolue ɛlɛsoo ne amukoraa, odi kyɛ ɔfa nandwie nyii akrɔngrɔma nzoo ne mmoaen nyii nzoo bɔ bellili nnɛen ɔ maa bɛbɔ naen yeralɛ afɔleɛ bɛma AWURADE, ɛlɛho biala sɔ alaa ɛlɛsoo. Yeɛ ɛlɛho biala, odi kyɛ ɔfa abɔngye nyii ko maa bɛbɔ bɔne nwo afɔleɛ.

²⁴ Nandwie nyii biala, odi kyɛ ɔfa ye nwo aleɛ afɔleɛ graa ko ba; boaen nyii biala, ye nwo aleɛ afɔleɛ graa ko; yeɛ graa ko biala ye nwo ngoo towaa ko.

²⁵ Bosome bɔ ɔtɔ so nzoo ne anu, ye eleburu ne nnu ne aso, aluolue ɛlɛsoo ne amukoraa, odi kyɛ ɔyɔ sɔ ala, kyɛ ɔkɔfa bɔne nwo afɔleɛ, naen yeralɛ afɔleɛ, aleɛ afɔleɛ ne ngoo kɔwa ɔ.