Hesekiel 44 - AHYERƐLƐ KRONGRON

¹ Afei ɔfale me sale nziɛ wale nekaa krongron berɛ dwaaso anoa piri bɔ ye nye kyire eyia afiteleɛ ne anwo, na né bato nu.

² Na AWURADE sele me kyɛ, “Anoa piri he, nu ato; bengobukye, yeɛ sona biala ngɔfa nu ngɔwa nu, ofikyɛ AWURADE Yisrael Nyameɛ wafa nu wawa nu, yiti nu kɔhɔ so kɔto.

³ Titireniɛ ne angome, ye yeɛ ɔkɔtena nu kodidi wɔ AWURADE nyunu ɔ. Ɔkɔfa anoa piri nu pato atee ne aso kɔwa nu, ná wasa wafa nu wafite.”

⁴ Afei ɔfale me fale sorɔ dɔ anoa piri atee ne aso wale awuro ne anyunu berɛ, na nneane, na yieee, AWURADE animnyam ne yili AWURADE awuro berɛ tɛkyɛ, na mvale me nyunu mutuli berɛ.

⁵ Na AWURADE sele me kyɛ, “Sona awa, ma w’adwene bra so, gyene wɔ nye nea ye yé, ná fa wɔ so tie nhyehyɛleɛ mukoraa bɔ mebaahã mekyire wɔ mefa AWURADE awuro ne anwo, ɔne ye nwo mmeraa amukoraa nwo, ná nea ye yé nwu bɛ bɔ ɔfata kyɛ bɛba awuro ne anu, ɔne bɛ bɔ bɛmvata kyɛ bɛba nekaa krongron ne anu ɔ.

⁶ Na kã kyire mmenia bɔ bayɛ lɔen ne, bɔ bɛ ole Yisrael awuro ama ne, kyɛ, AWURADE Nyameɛ nwa nyoo: O Yisrael awuro ama, wayɛ yee! Ɛmɔ akyiwadeɛ yɔleɛ ne amukoraa, ɛ́mɔpɛ so!

⁷ Ye ole kyɛ, ɛmɔma amanvrafoɛ bɛba nu, ɛmɔma mmenia bɔ bɛte bɛmbɛ-bɛ-bienzuafoɛ wɔ ahone nu ne anwoɔnaen nu ɔ bɛba me nekaa krongron ne anu bɛbagua m’awuro ne anwo fiɛ, wɔ mmerɛ bɔ ɛmɔfa m’aleɛ, ɛloe ne mogya bɛbrɛ me ɔ. Na ɛmɔafa ɛmɔ akyiwadeɛ yɔleɛ ne amukoraa babu m’apam ne aso.

⁸ Me nningyein krongron nemɔ, ɛmɔanyɔ bɛ nwo adwuma ne, na mmom mmeni foforɛ yeɛ ɛmɔafa bɛ kyɛ bɛyɔ me nekaa krongron berɛ adwuma ne ɔ.

⁹ “Yiti AWURADE Nyameɛ nwa nyoo: Amanvoraniɛ biala, bɔ ɔmbɛ ye bienzua wɔ ahone nu ne anwoɔnaen nu, amanvrafoɛ amukoraa bɔ baafra Yisraelfoɛ nu ne, onni kyɛ bewura me nekaa krongron ne anu.

¹⁰ Na Lewifoɛ bɔ bɛhwene bɛ nwo befili me nwo bɛhɔle dedeede, wɔ mmerɛ bɔ Yisrael lili makyebu beelili bɛ mmosoen mɔ si ne, bɛ sa kɔhã b’amumuyɛɛ nwo asohwenɛ.

¹¹ Nakoso bɛkɔyɛ me nekaa krongron berɛ asomvoɛ bɛkɔyɛ awuro berɛ anoa piri nemɔ aso awɛmvoɛ, na bɛkɔyɔ awuro berɛ ɛsɔnenɛ adwuma. Maen naen yeralɛ afɔleɛ kaka ne, ɔne afɔleɛ kaka ne, bɛ yeɛ bekohu ye ɔ, na bɛ yeɛ bekogyina mmenia ne anyunu bɛkɔso bɛ ɔ.

¹² Na ɔnate kyɛ bɛyɔle ɛsɔnenɛ adwuma bɛmane Yisraelfoɛ wɔ bɛ mmosoen nemɔ anyunu maa ɔnate so ɔyɛle amumuyɛɛ sundidua mane Yisrael awuro ama ne ati, mafɛ bɛ so yaa kyɛ, bɛ sa kɔhã b’amumuyɛɛ nwo asohwenɛ, AWURADE Nyameɛ noa dwirɛ ɛne.

¹³ Onni kyɛ bepingye me bɛyɔ ɔsɔfo adwuma bɛma me ɔ, yeɛ onni kyɛ bepingye me nningyein krongron nemɔ biala, ɔne me nningyein krongron paa nemɔ. Na ɔnate akyiwadeɛ yɔleɛ bɔ bayɔ ne ati, b’animguaseɛ mata bɛ.

¹⁴ Nakoso ngɔfa awuro ne anu adwuma ne ngowura bɛ sa, nu ɛsolɛ biala ne adwuma biala bɔ odi kyɛ bɛyɔ ye wɔ nu ɔ.

¹⁵ “Nakoso Lewifoɛ bɔ bɛte asɔfo, bɔ bɛte Sadoke boso ama, bɔ bɛyɔle me nekaa krongron ne anu adwuma, mmerɛ bɔ Yisraelfoɛ belili makyebu befili me nwo ne, bɛ de, bekopingye me bɛkɔso me, na bekogyina me nyunu bɛkɔfa ɛloe ne mogya bɛkɔbrɛ me, AWURADE Nyameɛ noa dwirɛ ɛne.

¹⁶ Bɛ yeɛ bɛkɔwa me nekaa krongron ne anu ɔ, na bɛ yeɛ bekopingye me poen nwo bɛkɔso me ɔ, na bɛkɔyɔ me ɛsɔnenɛ adwuma ne.

¹⁷ Na ɔkɔwa kyɛ, sɛ bɛba anoa piri bɔ ɔwɔ ye kunu dɔ aluo berɛ ne anu a, odi kyɛ bewura nwera ataadeɛ. Onni kyɛ bewura boaen nwiaa ataadeɛ biala, wɔ mmerɛ bɔ bɛ́yɔ ɛsɔnenɛ adwuma wɔ ye kunu dɔ aluo berɛ anoa piri ne anu ɔ.

¹⁸ Odi kyɛ bɛbɔ nwera abotire, ná bewura nwera pieto. Onni kyɛ bɛfa nikyee biala bɔ ɔkɔmaa bekofi mvifire ɔ bɛbɔ abɔsoɛ.

¹⁹ Na sɛ bɛbaahɔ maen ne berɛ wɔ aluo berɛ pato nu berɛ a, odi kyɛ bepuropuro ndaadeɛ bɔ bewura bɛyɔle ɛsɔnenɛ adwuma ne begua pumbu krongron nemɔ anu, ná bewura ndaadeɛ mbaen bie; amaa ɔnate so bɛ ndaadeɛ ne amma mmenia ne anyɛ krongron.

²⁰ Onni kyɛ bɛpoa bɛ ti, onni kyɛ bɛma bɛ ti nwiaa fu pusaa; na mmom odi kyɛ bebubu bɛ ti so.

²¹ Onni kyɛ ɔsɔfo biala no nzaa wɔ mmerɛ bɔ ɔkɔhɔ sua ne akunu dɔ aluo berɛ ɔ.

²² Onni kyɛ begya kunaniɛ brasua anaa brasua bɔ ebie ayira ye ɔ; na mmom Yisrael awuro ama bɛ bosoniɛ brasua bɔ onnwuni biaa le ɔ, anaa kunaniɛ brasua bɔ né ohu te ɔsɔfo yeɛ bɛkora begya ye ɔ.

²³ Odi kyɛ bekyirekyire me maen nzonzoleɛ bɔ ɔla krongron nningyein ɔne nningyein mbaen b’afia ɔ, ná bɛmaa benwu nzonzoleɛ bɔ ɔla nningyein bɔ bɛ nwo nde ɔne bɔ bɛ nwo te ɔ b’afia.

²⁴ Sɛ edwirɛ ba mmenia b’afia a, bɛ yeɛ bɛkɔyɛ ndɛenbualɛfoɛ ɔ, na bekogyina me ndɛenbualɛ so yeɛ bekobua ɔ. Odi kyɛ bedi me mmeraa ne m’ahyɛdeɛ so wɔ m’aluolue bɔ mahyehyɛ amukoraa nu, yeɛ odi kyɛ bedi m’afofingyẽa nemɔ so krongron nu.

²⁵ Onni kyɛ bɛkɔ efuin nwo ma bɛ nwo gua fiɛ; sana seɛ anaa niɛ, baa bienzua anaa baa brasua, aliɛmaa bienzua, anaa aliɛmaa brasua bɔ onnya oggyale biaa ɔ ye fuin yeɛ bɛkora bɛkɔ ye nwo ma efiɛ kã bɛ ɔ.

²⁶ Na sɛ ɔpete ye nwo yie a, odi kyɛ bɛma ɛlɛsoo pɛ nu,

²⁷ na kyẽa bɔ ɔ́kɔ nekaa krongron berɛ, wɔ ye kunu dɔ aluo berɛ, kyɛ ɔkwaayɔ ɛsɔnenɛ adwuma wɔ nekaa krongron berɛ nen, odi kyɛ ɔfa ye bɔne nwo afɔleɛ ɔba, AWURADE Nyameɛ noa dwirɛ ɛne.

²⁸ “Na bɔ ɔkɔyɛ b’agyapadeɛ de, me AWURADE yeɛ nde b’agyapadeɛ ɔ. Nnɛma ɛmɔma bɛ kyɛfa biala wɔ Yisrael, na me yeɛ nde bɛ kyɛfa ɔ.

²⁹ Aleɛ afɔleɛ, bɔne nwo afɔleɛ ne foɛlilɛ afɔleɛ yeɛ bekoli ɔ; ɔne nikyee biala bɔ batu basie berɛ wɔ Yisrael yeɛ ɔkɔyɛ bɛ deɛ ɔ.

³⁰ Na fieso nningyein mukoraa nu mmaa bɔ oli moa ne, nu paa paa ne, ɔne afɔleɛ ahoroɔ biala bɔ ofi ɛmɔ afɔleɛ mukoraa nu ne, ɔkɔyɛ asɔfo nemɔ deɛ. Na ɛmɔ mɔle bɔ oli moa ne koso, odi kyɛ ɛmɔfa bɛma asɔfo nemɔ, amaa ɔnate so saleɛ awa ɛmɔ awuro.

³¹ Onni kyɛ asɔfo nemɔ bedi nikyee biala bɔ ye bɔbɔ wawu, anaa bɔ kaka bie ahu ye ɔ, kyɛ anomaa oo, anaa kaka bie oo.