Hesekiel 43 - AHYERƐLƐ KRONGRON

AWURADE animnyam yi asɔneyɛɛ sua ne anu tɛkyɛ

¹ Na ɛhe asi ne, ɔfale me wale anoa piri bɔ ye nye kyire eyia afiteleɛ so ne anu.

² Yieee! Yisrael Nyameɛ animnyam fili eyia afiteleɛ bue nu dɔ wale; na ye walɛ ne, ɔyɛle wuruwuruwuru kyɛ asue pee bɔ bɛsẽ ɔ, na ye animnyam mane aseɛ tale.

³ Na nyekyire bɔ nwuni ne, osoma nyekyire bɔ nwuni ye wɔ mmerɛ bɔ mmale mmanzɛkyele kuro ne nen, na nyekyire nemɔ soma nyekyire bɔ nwuni ye asue Kebare noa ne; na mvale me nyunu mmutuli berɛ.

⁴ Na AWURADE animnyam ne, ɔfale anoa piri bɔ ye nye kyire eyia afiteleɛ ne anu wale awuro berɛ.

⁵ Yeɛ Sunzum ne mane me so, na ɔfale me hɔle awuro ne kunu dɔ aluo berɛ; na yieee, AWURADE animnyam yili awuro ne anu tɛkyɛ.

⁶ Yeɛ ndele kyɛ ebie odwudwo kyire me fi awuro ne anu, wɔ mmerɛ bɔ né biaa ne ogyi me nwo berɛ ɔ.

⁷ Na osele me kyɛ, “Sona awa, ɛwa yeɛ ɔte nekaa bɔ m’ahennie bia ogyi ɔ, ɔne nekaa bɔ mefa me gya mesiesie ɔ, bɔ ɔte nekaa bɔ ngɔtena wɔ Yisraelfoɛ nu afebɔɔ ɔ. Na Yisrael awuro ama, bɛ ne bɛ hene mɔ, bɛngɔfa b’adwamanbɔlɛ ne, ɔne bɛ hene mɔ bɛ fuin wɔ b’asɔneyɛɛ nemɔ aso bengogua me dumaa krongron ne anwo fiɛ ko.

⁸ Begyinane bɛ simbini bepingyele me simbini deɛ nwo, yeɛ begyinane b’aponnwaa bepingyele m’aponnwaa deɛ nwo, bɔ fasue mbaen yeɛ ɔwɔ me ne bɛ y’afia ɔ. Bafa b’akyiwadeɛ yɔleɛ ne bagua me dumaa krongron ne anwo fiɛ, maa ɔnate so mvɛle yaa ngukuni bɛ.

⁹ Na afei de, odi kyɛ bɛye bɛ gyanderabɔlɛ, ɔne bɛ hene mɔ bɛ fuin befi me nwo bɛkɔ dedeede, na ngɔtena bɛ nu afebɔɔ.

¹⁰ “Na wɔ, Sona awa, kã kyɛbɔ awuro ne osi te ɔ kyire Yisrael awuro ama ma bɛ nyunu gua ase wɔ b’amumuyɛɛ nwo. Maa besusu kyɛbɔ osi te ɔ.

¹¹ Na sɛ bɛ nyunu gua ase wɔ bɔ bayɔ amukoraa nwo a, afei kyire bɛ kyɛbɔ awuro ne osi te ɔ, ɔne kyɛbɔ besi bɛhyehyɛle ye ɔ, ye anoa mɔ bɔ bɛfa nu befite, ɔne bɔ bɛfa nu bɛkɔ nu ɔ, sua ne sue amukoraa, ye nwo nhyehyɛleɛ amukoraa, kyɛbɔ basi basi ye amukoraa, ɔne ye nwo mmeraa amukoraa. Kyerɛ ye wɔ bɛ nyunu berɛ ma bɛnea kyɛbɔ basi basi ye amukoraa, ɔne ye nwo nhyehyɛleɛ amukoraa, ná beli so.

¹² Awuro ne, ye nwo mmeraa ɛhe: Bokaa ne ti afia, ɔne ye nwo wɛen bɔ ɔpɛ ye nwo wabra wayia amukoraa te krongron nu krongron. Tie, awuro ne nwo mmeraa ɛne.

¹³ “Afɔleɛ bokyea ne, sɔaa yeɛ ye susulɛ ne te ɔ, (wɔ agyirɛ ye tendenn nu, ko biala tendenn te agyirɛ ko ne bɛ sa mmɛseka ko). Ye nyinasoɛ ne te agyirɛ ko, ye tɛtrɛtɛɛ ne te agyirɛ ko, yeɛ ye noa hangra bɔ wapɛ ye nwo wayia ne ɔte bɛ sa mmɛseka ko. Afɔleɛ bokyea ne, sɔaa yeɛ odi kyɛ ye tendenn ɔyɛ ɔ:

¹⁴ Ofi ye bo aseɛnwo bɔ ɔkwaadwu ye bo kaa ne aso ne, ɔte agyirɛ nyɔ, yeɛ ye tɛtrɛtɛɛ ne te agyirɛ ko; ofi kaa kaaba ne aso bɔ ɔkwaadwu kaa piri ne aso ne, ɔte agyirɛ nna, yeɛ ye tɛtrɛtɛɛ koso te agyirɛ ko.

¹⁵ Afɔleɛ bokyea ne, ofi ye aseɛnwo bɔ ɔkwaadwu ye anwuro ne, ɔte agyirɛ nna, na mmɛen nna tuatua afɔleɛ bokyea ne anwo kɔ anwuro.

¹⁶ Afɔleɛ bokyea ne tendenn nu te agyirɛ buru ne nyɔ, yeɛ ye tɛtrɛtɛɛ nu te agyirɛ buru ne nyɔ, ɔte ahinanan.

¹⁷ Ye afia ne, ye tendenn nu te agyirɛ buru ne nna, yeɛ ye tɛtrɛtɛɛ nu te agyirɛ buru ne nna, ɔte ahinanan. Ye bo kaa bɔ ɔpɛ ye nwo bra yia ne, ye tɛtrɛtɛɛ te agyirɛ bue, yeɛ ye nyinasoɛ ne te agyirɛ ko, na ye atweleɛ ndiasoɛ ne nye kyire eyia afiteleɛ.”

¹⁸ Yeɛ osele me kyɛ, Sona awa, AWURADE Nyameɛ nwa nyoo: Afɔleɛ bokyea ne nwo nhyehyɛleɛ ɛhe: Kyẽa bɔ bekosi afɔleɛ bokyea ne kyɛ bɛbɔ naen yeralɛ afɔleɛ wɔ so, ná bɛpete mogya begua so ne,

¹⁹ Lewifoɛ bɔ bɛte asɔfo bɔ bɛte Sadoke bosofoɛ ne, bɔ yeɛ bepingye me bɛbaso me ne, fa nandwie nyii akrɔngrɔma ko ma bɛ ma bɛbɔ bɔne nwo afɔleɛ, AWURADE Nyameɛ noa dwirɛ ɛne.

²⁰ Fa ye mogya ne bie kekã afɔleɛ bokyea mmɛen nna nemɔ, ye afia nna nemɔ bɛ ndweasoɛ so, yeɛ ye bo kaa bɔ wapɛ ye nwo wabra wayia ne anwo. Yɔ sɔ fa te afɔleɛ bokyea ne anwo, ná pata ma ye.

²¹ Afei fa bɔne nwo afɔleɛ nandwie nyii ne, ná yera ye wɔ awuro ne anu nekaa bɔ baye basie berɛ ne, wɔ nekaa krongron ne asi dɔ.

²² Na ye elenyɔ ne aso, fa abɔngye nyii bɔ ollili nnɛen ɔ bɔ bɔne nwo afɔleɛ; fa te afɔleɛ bokyea ne anwo, kyɛbɔ bɛfale nandwie nyii ne bɛtele ye nwo ne.

²³ Na sɛ ɛte ye nwo yie a, fa nandwie ko bɔ ollili nnɛen ɔ, ɔne mmoaen kure ne anu boaen nyii ko bɔ ollili nnɛen ɔ bɔ afɔleɛ;

²⁴ fa bɛ bra AWURADE nyunu maa asɔfo nemɔ bɛfa ngyee bɛpete bɛ nwo, ná bɛfa bɛ bɛbɔ naen yeralɛ afɔleɛ bɛma AWURADE.

²⁵ Fa abɔngye ko bɔ bɔne nwo afɔleɛ ɛlɛho biala toonn ɛlɛsoo; yeɛ fa nandwie nyii ko ne mmoaen kure ne anu boaen nyii ko bɔ bellili nnɛen ɔ bɔ afɔleɛ.

²⁶ Ɛlɛsoo yeɛ odi kyɛ bɛfa bɛpata bɛma afɔleɛ bokyea ne, bɛfa bɛpete ye nwo, ná betu besie berɛ ɔ.

²⁷ Na sɛ sɔ ngyẽa ne so yie a, afei ofi ɛlɛbɔtwɛ ne aso bɔ ɔkɔ ne, odi kyɛ asɔfo nemɔ bɛbɔ ɛmɔ naen yeralɛ afɔleɛ ne asomdwee afɔleɛ ne wɔ afɔleɛ bokyea ne aso, na ngole ɛmɔ ngɔto nu, AWURADE Nyameɛ noa dwirɛ ɛne.”