Hesekiel 42 - AHYERƐLƐ KRONGRON

¹ Afei ɔfale me fitele fale sorɔ dɔ hɔle aluo berɛ pato nu berɛ, na ɔfale me hɔle pumbu mɔ bɔ bɛwɔ aluo berɛ ndendeneɛ so, ɔne sorɔ dɔ sua ne ndendeneɛ so ne anu.

² Sua ne, ye tendenn nu wɔ ye sorɔ, ɔte agyirɛ ɛyaa ko, yeɛ ye tɛtrɛtɛɛ nu te agyirɛ aburannu.

³ Ye kunu dɔ bɔ ɔte agyirɛ aburanyɔ, bɔ ɔwɔ aluo berɛ pato ne ndendeneɛ so ne, abrannaa nye nea abrannaa nza ne nyunu.

⁴ Né pato bie wɔ pumbu nemɔ anyunu berɛ, bɔ ye tɛtrɛtɛɛ te agyirɛ buru ɔ; ye atee ne tendenn te agyirɛ ko, na b’anoa nemɔ nye nea sorɔ.

⁵ Né anwuro pumbu nemɔ bɛte bɔtɔfee, ofikyɛ abrannaa nemɔ bafa bɛ bue, na bɛ bue bɔ bafa ne, ɔte piri tra bɔ bafa bafi aseɛnwo ne afia pumbu nemɔ nu ɔ.

⁶ Ofikyɛ ɔte aborɔsaen bɔ ɔtoa so nza ɔ, nakoso bɛ de, belle mbuna kyɛbɔ aluo berɛ de ole bie ne; yiti bɛte bɔtɔfee bɛtra aseɛnwo ne afia deɛ nemɔ.

⁷ Né fasue bie wɔ nziɛ dɔ bɔ ɔne pumbu nemɔ bɛsã so ɔ. Ye nye nea aluo berɛ pato ne, wɔ pumbu nemɔ ndendeneɛ so. Ye tendenn te agyirɛ aburannu.

⁸ Pumbu mɔ bɔ bɛwɔ aluo berɛ pato ne anwo berɛ ne, bɛ tendenn te agyirɛ aburannu, yeɛ bɛ bɔ bɛwɔ asɔneyɛɛ sua ne ndendeneɛ so koso, bɛ tendenn te agyirɛ ɛyaa ko.

⁹ Pumbu nemɔ b’aseɛnwo dɔ ne, sɛ efi aluo berɛ pato nu dɔ ɛbaawura nu a, atee la eyia afiteleɛ so.

¹⁰ Aluo berɛ pato fasue pipiripii ne, wɔ eyia afiteleɛ so, pato ne ɔne sua ne bɛ ndendeneɛ so, né pumbu mɔ bɛwɔ berɛ

¹¹ bɔ atee la bɛ nyunu berɛ ɔ. Bɛte kyɛ sorɔ dɔ pumbu nemɔ ala; bɛ tendenn ne bɛ tɛtrɛtɛɛ te pɛ, b’atee bɔ ɛfa nu fite amukoraa, kyɛbɔ besi bɛte ne, ɔne b’anoa nemɔ, bɛte kyɛ ɛhene mɔ ala.

¹² Na pumbu nemɔ b’anoa mɔ bɔ bɛwɔ ngwaen dɔ ne, né anoa ko wɔ atunu berɛ, wɔ fasue ne nyunu berɛ wɔ eyia afiteleɛ so, sɛ ɛkwaawura nu a.

¹³ Yeɛ osele me kyɛ, “Sorɔ dɔ pumbu nemɔ ne ngwaen dɔ pumbu nemɔ bɔ bɛwɔ pato n’anyunu berɛ ne, bɛ ole pumbu krongron nemɔ. Berɛ yeɛ asɔfo mɔ bɔ bepingye AWURADE ne bekoli krongron nu krongron afɔleɛ nningyein ne ɔ; berɛ yeɛ bɛkɔfa krongron nu krongron nningyein ne bekogua ɔ: aleɛ afɔleɛ, bɔne nwo afɔleɛ ne foɛlilɛ afɔleɛ, ofikyɛ berɛ te krongron.

¹⁴ Sɛ asɔfo nemɔ bɛbaawura nekaa krongron ne anu a, onni kyɛ befi berɛ bɛkɔ aluo berɛ pato ne anu dɔ, sana bepuro bɛ ndaadeɛ bɔ bɛfa bɛsɔne ne begua berɛ koraka, ofikyɛ ndaadeɛ nemɔ te krongron. Odi kyɛ bɛfa ndaadeɛ mbaen bie bewura, koraka né bapingye nekaa bɔ mmenia le atee kyɛ bɛkɔ ne.”

¹⁵ Na osusuli sua ne akunu dɔ yiele nen, ɔfale me fitele fale anoa piri bɔ ye nye kyire eyia afiteleɛ ne anu, na osusuli sua ne nwo bra yiale.

¹⁶ Ɔfale elemmire bɔ bɛfa besusu nikyee ne osusuli eyia afiteleɛ bue nu dɔ bra yiale, na ɔfale elemmire ne susuli ne, né ɔte agyirɛ ɛyaa nnu.

¹⁷ Yeɛ ɔfale elemmire bɔ bɛfa besusu nikyee ne osusuli ye sorɔ dɔ bra yiale, na ɔte agyirɛ ɛyaa nnu.

¹⁸ Ɔfale elemmire bɔ bɛfa besusu nikyee ne osusuli ye ngwaen dɔ, na ɔte agyirɛ ɛyaa nnu.

¹⁹ Afei ɔpɛnene ye nwo hɔle eyia atɔleɛ bue nu dɔ, ɔfale elemmire bɔ bɛfa besusu nikyee ne osusuli, na ɔte agyirɛ ɛyaa nnu.

²⁰ Osusuli ye bue nna ne. Né fasue wɔ ye nwo bra yia bɔ ye tendenn nu te agyirɛ ɛyaa nnu, ye tɛtrɛtɛɛ nu te agyirɛ ɛyaa nnu, kyɛ ɔfa yɛ nekaa krongron berɛ ɔne nekaa mbaen ne b’afia mbɛmuɛ.