Hesekiel 41 - AHYERƐLƐ KRONGRON

Krongron nu krongron berɛ

¹ Afei ɔfale me hɔle asɔneyɛɛ sua ne anu, na osusuli mbuna nemɔ; ye tɛtrɛtɛɛ nu, ye bue ko te agyirɛ nzia, yeɛ ye bue ko wora ɔte agyirɛ nzia, bɔ ye tɛtrɛtɛɛ ne ɛtena sua ne bɛte pɛ ɔ.

² Ye anoanu berɛ, ye tɛtrɛtɛɛ nu te agyirɛ buru; na anoanu berɛ ye ngyɛnu ne, bue ko te agyirɛ nnu, yeɛ bue ko koso te agyirɛ nnu. Osusuli ye tendenn nu nen, né ɔte agyirɛ aburanna, yeɛ ye tɛtrɛtɛɛ nu te agyirɛ aburanyɔ.

³ Afei ɔhɔle sua ne akunu dɔ pumbu ne anu oosusuli anoanu berɛ mbuna nemɔ, na né ɔte agyirɛ nyɔ, anoa ne te agyirɛ nzia, yeɛ anoa ne tɛtrɛtɛɛ nu te agyirɛ nzoo.

⁴ Osusuli ye tendenn nu, na né ɔte agyirɛ aburanyɔ, ye tɛtrɛtɛɛ nu te agyirɛ aburanyɔ, wɔ asɔneyɛɛ sua ne anyunu berɛ. Na osele me kyɛ, “Ɛwa yeɛ ɔte Krongron nu krongron ne ɔ.”

⁵ Yeɛ osusuli awuro berɛ fasue ne, na ye pipiripii nu te agyirɛ nzia, ye ngyɛnu pumbu nemɔ tɛtrɛtɛɛ nu te agyirɛ nna, na ɔfa pɛle awuro ne anwo bra yiale.

⁶ Ye ngyɛnu pumbu nemɔ, né bɛte aborɔsaen bɔ ɔtoa so nza ɔ, na ko biala, pumbu aburasa yeɛ ɔwɔ nu ɔ. Né nikyee wɔ awuro berɛ fasue ne anwo amukoraa bra yia bɔ bɛsosɔ pumbu nemɔ anu ɔ, nakoso né bɛnzosɔ awuro berɛ fasue ne anu.

⁷ Ye ngyɛnu pumbu nemɔ, efi aseɛnwo bɔ ɛkɔ ye anwuro ne, né nu ɔ́yɛ ɔbaye. Na pumbu mɔ bɔ bapɛ sua ne anwo bayia ne, ɔtaataa so kɔ anwuro, bɔ ye sɔ ati efi aseɛnwo bɔ ɛkɔ ye anwuro ne, nu baye ɔ. Né atweleɛ wɔ berɛ bɔ ofi aseɛnwo pumbu ne anu ɔfa afia deɛ ne anu ɔkɔ anwuro deɛ ne anu ɔ.

⁸ Nza nwuni kyɛ sua ne le abamma bɔ wapɛ sua ne anwo wabra wayia ɔ. Né ɔte ye ngyɛnu pumbu nemɔ nyinasoɛ. Ye tendenn nu, ɔne elemmire ne bɛte pɛ, ɔte agyirɛ nzia.

⁹ Ye ngyɛnu pumbu nemɔ, bɛ si dɔ fasue ne, ye pipiripii te agyirɛ nnu. Na pato bɔ ɔwɔ sua ne ngyɛnu pumbu nemɔ

¹⁰ ne aluo berɛ pumbu nemɔ b’afia ne, ye tɛtrɛtɛɛ te agyirɛ aburanyɔ, bɔ wapɛ sua ne anwo amukoraa wayia ɔ.

¹¹ Ye ngyɛnu pumbu nemɔ, atee la nu kɔ pato ne anu, anoa ko nye kyire sorɔ, yeɛ ko wora ye nye kyire ngwaen, na pato nu berɛ tɛtrɛtɛɛ te agyirɛ nnu bra yia.

¹² Na sua bɔ ye nye kyire aluo berɛ, wɔ eyia atɔleɛ so ne, ye tɛtrɛtɛɛ nu te agyirɛ aburasoo; yeɛ sua ne fasue ne, ye pipiripii te agyirɛ nnu bra yia, yeɛ ye tendenn nu te agyirɛ aburahona.

¹³ Afei osusuli sua ne. Ye tendenn nu te agyirɛ ɛyaa ko; yeɛ aluo berɛ, sua ne ɔne ye fasue ne, ye tendenn nu te agyirɛ ɛyaa ko.

¹⁴ Yeɛ sua ne anyunu berɛ ne aluo berɛ, wɔ eyia afiteleɛ so, ye tɛtrɛtɛɛ nu te agyirɛ ɛyaa ko.

¹⁵ Afei osusuli sua ne tendenn nu bɔ ye nye kyire aluo berɛ wɔ eyia atɔleɛ, ɔne ye abrannaa nemɔ wɔ ye bue ko biala, na ɔte agyirɛ ɛyaa ko. Sua ne akunu dɔ ne aluo berɛ abrannaa ne;

¹⁶ aponnwaa nemɔ, mboma bɔtɔfee nemɔ, abrannaa bɔ wapɛ ye mmɛsa nwo wayia ne, né bafa bakaa badwura bɛ nwo babra bayia, ofi ye aseɛnwo bɔ ɔkwaadwu mboma nemɔ, (né bakatakata mboma nemɔ anwo),

¹⁷ ofi anoa ne ti afia bɔ ɔkwaadwu sua ne akunu dɔ ɔne ye si dɔ ne. Na fasue ne anwo amukoraa bɔ ɔbra yia, wɔ ye kunu ne ye si, besusuli yeɛ bɛyɔle ɔ.

¹⁸ Né bali kɛrubim ne ayee adwii bagua bɛ nwo, bɔ ayee ne wɔ Kɛrubo nemɔ b’afia ɔ. Né kɛrubo ko biala ye nyunu te nyɔ:

¹⁹ Anyunuɛ ko bɔ ɔte sona nyunu ne, ye nye kyire ayee ne bue dɔ; yeɛ ko bɔ ɔte gyata nyunu ne koso, ye nye kyire ayee ne bue faen. Né bali sɔ adwii ne bagua sua ne anwo amukoraa babra bayia.

²⁰ Ofi ase bɔ ɔkwaadwu anoa ne ti afia ne, né bali kɛrubim ne ayee adwii bagua asɔneyɛɛ sua fasue ne anwo.

²¹ Né asɔneyɛɛ sua aponnwaa nemɔ bɛte ahinanan. Nekaa krongron n’anyunu berɛ, né nikyee bie wɔ berɛ bɔ osoma

²² bakaa afɔleɛ bokyea, bɔ ofi ye aseɛnwo bɔ ɔkwaadwu ye anwuro ne, ɔte agyirɛ nza ɔ, ye tendenn nu te agyirɛ nyɔ, [ye tɛtrɛtɛɛ nu te agyirɛ nyɔ]. Na ye ndweasoɛ nemɔ, ye nyinasoɛ nemɔ ne ye fasue nemɔ te bakaa. Na biaa ne sele me kyɛ, “Ɛpoen he yeɛ ogyi AWURADE nyunu ne.”

²³ Asɔneyɛɛ sua ne ne nekaa krongron ne, né bele anoa nyɔ nyɔ.

²⁴ Né anoa nemɔ te ndaandaa, na ɛkora buka nu biala nu nyɔ.

²⁵ Né bali kɛrubim ne ayee adwii bagua asɔneyɛɛ sua anoa nemɔ anwo, kyɛbɔ bali bagua fasue nemɔ nwo ne ala. Afei koso, né bafa ndaboa babɔ pata wɔ abrannaa ne anyunu berɛ.

²⁶ Né mboma bɔtɔfee, yeɛ ayee adwii wɔ ye bue dɔ ne ye bue faen, wɔ abrannaa ne ngyɛnu ne ye ngyɛnu.