Hesekiel 35 - AHYERƐLƐ KRONGRON

Edom nya ye pɔen nwo asohwenɛ

¹ Yeɛ AWURADE lale ye dwirɛ ali hyirele me bieku kyɛ,

² “Sona awa, fa wɔ nye kyire Sɛre bokaa, ná hyɛ ngɔm tia ye.

³ Se ye kyɛ, AWURADE Nyameɛ nwa nyoo: Tie, Sɛre bokaa, meko metia wɔ, ngɔtengyɛ me sa ngɔhwe wɔ so, ngɔbɔ wɔ tɔɔ, na ngɔmaa ɛkɔla berɛ mbaen.

⁴ Ngɔkakyi wɔ nguro mɔ kurofoen, na ɛkɔla berɛ mbaen, na afei ekonwu kyɛ me ole AWURADE.

⁵ Na ɔnate kyɛ asɔ ɛpɔen nu bɔ ɛngɔyakyi nu, bɔ afa ngrandɛ ahũhũ Yisraelfoɛ wɔ b’amaneɛ mmerɛ nu, wɔ bɛ sohwenɛ bɔ ɔpɛ ye bo mmerɛ nu ne ati,

⁶ yiti, kyɛ nde ase ye, ngɔmaa bɛkɔhã wɔ mogya bekogua, na mogya ne kɔfoa wɔ; ofikyɛ anzuro kyɛ ɛkɔhã mogya kogua ɔ, yiti mogya yeɛ ɔkɔfoa wɔ ɔ, AWURADE Nyameɛ noa dwirɛ.

⁷ Ngɔsɛkye Sɛre bokaa bɔkɔɔ, na ngɔmaa ɔkɔla berɛ mbaen, ngofoa ebiala bɔ ofi berɛ ɔkɔ ɔ, ɔne bɔ osa ba berɛ ɔ.

⁸ Ngɔfa mmenia bɔ batotɔ ɔ ngoyi ye mmokaa nemɔ aso tɛkyɛ: na bɛ bɔ batotɔ ngrandɛ noa ne, wɔ pambaa nemɔ aso ne wɔ bɔnza nemɔ anu ɔne w’asue bɔnga mukoraa nu yeɛ bekogua ɔ.

⁹ Ngɔbɔ wɔ tɔɔ afebɔɔ, na ebiala ngɔtena wɔ nguro nemɔ aso; na afei ɛmɔkonwu kyɛ me ole AWURADE.

¹⁰ “Na ɔnate kyɛ ɛhane kyɛ, ‘Maen nyɔ hemɔ ne aseɛ nyɔ hemɔ kɔyɛ me deɛ, na yɛkɔfa yɛkoli so,’ wɔ aberɛ bɔ né AWURADE wɔ berɛ ɔ,

¹¹ yiti, kyɛ nde ase ye, ɔnate ɛpɔen bɔ ɛpɔ bɛ, bɔ ɔmaa w’ahone huli bɛ so, ná wɔ nye borole bɛ ne, ngogyina so me ne wɔ yɛkoli. Na sɛ mebua wɔ ndɛen a, ngɔye me nwo ali wɔ bɛ nu, AWURADE Nyameɛ noa dwirɛ ɛne.

¹² Na afei ekonwu kyɛ me, AWURADE, mate musue dwirɛ amukoraa bɔ akekã atia Yisrael mmokaa mɔ ɔ. Ɛnwa: ‘Basɛkye bɔkɔɔ, bafa bɛ bawura yɛ sa kyɛ yɛli bɛ so.’

¹³ Ɛmɔfale ɛmɔ noa bɛkekane anwomasoɛ dwirɛ betiale me, ɛmɔkekane edwirɛ pee betiale me, na ndele.

¹⁴ AWURADE Nyameɛ nwa nyoo: Mmerɛ bɔ aseɛ amukoraa ye nye agye ne, wɔ de, ngɔbɔ wɔ tɔɔ.

¹⁵ Mmerɛ bɔ Yisrael awuro ama b’agyapadeɛ yɛle kurofoen ne, wɔ nye gyele, yiti me koso sɔ ala yeɛ ngɔfa ngɔyɛ wɔ ɔ. Ɛkɔkakyi kurofoen, wɔ, Sɛre bokaa, ɛne Edom amukoraa. Na afei bekonwu kyɛ me ole AWURADE.”