Hesekiel 30 - AHYERƐLƐ KRONGRON

Misraim bɔlɛ nwo ngɔm

¹ Yeɛ AWURADE lale ye dwirɛ ali hyirele me bieku kyɛ,

² “Sona awa, hyɛ ngɔm ná se kyɛ, AWURADE Nyameɛ nwa nyoo: “Ɛ́mɔbɔ awuye! Ah, ɛ́mɔbɔ kyẽa ne nwo awuye!

³ Ofikyɛ kyẽa ne apingye, AWURADE kyẽa ne apingye, ɔkɔyɛ munungum kyẽa, ɔkɔyɛ maen maen mɔ b’amaneɛnwunɛ mmerɛ.

⁴ Ngrandɛ kɔwa Misraim so, ahunundetelɛ piri kɔtɔ Yitiopia so, mmerɛ bɔ apirafoɛ bɛkɔtotɔ wɔ Misraim ɔ, bɔ bɛkɔsesa ye nu nningyein worawora bɛkɔhɔ ɔ, bɔ bekodwiri ye nyinasoɛ bekogua ɔ.

⁵ “Yitiopia, Libia, Lude ne Arabia amukoraa ne Kubo, yeɛ aseɛ bɔ bɛ ne bɛ bayɛ apam ne aso ama, bɛ ne bɛ kɔtotɔ ngrandɛ noa.

⁶ “AWURADE nwa nyoo: Bɛ bɔ bɛboka Misraim ne, bɛkɔtotɔ, na ye anwomasoɛ anwoserɛ ne kɔbrɛ ase: ofi Migidol bɔ ɔkwaadwu Siene ne, bɛkɔtotɔ ngrandɛ noa wɔ berɛ, AWURADE Nyameɛ noa dwirɛ ɛne.

⁷ Ɔkɔyɛ maen bɔ wabɔ ɔ, kyɛ maen maen bɔ babɔ ne ala, na ye nguro kɔyɛ kurofoen, kyɛ nguro bɔ bayɛ kurofoen ne ala.

⁸ Na sɛ meto Misraim nu see, ná mekũkũ ye bokafoɛ amukoraa a, afei bekonwu kyɛ me ole AWURADE.

⁹ “Sɔ kyẽa ne, ɛbɔfoɛ mɔ kofi me berɛ bɛkɔfo ɛlɛen bekoonwunanwuna Yitiopiafoɛ bɔ bɛ de bɛnwa bɛ nwo atɔ bɛ ne, na amaneɛ kandinga kɔto bɛ wɔ Misraim amaneɛnwunɛ kyẽa ne; ofikyɛ, okosi amba!

¹⁰ “AWURADE Nyameɛ nwa nyoo: Ngɔfa Babilɔn hene Nebukadenesa so ngonua Misraim mmenia worawora ne aboso.

¹¹ Ye, yeɛ ye mmenia bɔ bɛboka ye so ne, bɔ bɛ nwo yɛ suro tra maen maen mɔ nu biala ne; ngɔfa bɛ ngɔwa maa bɛkɔɔsɛkye maen ne, bɛkɔhwe bɛ ngrandɛ wɔ Misraim so, na bekohũhũ mmenia bekoyi aseɛ ne aso to.

¹² Ngɔma asue Naele nu nzue kɔwewe, na ngɔyɛ aseɛ ne atɔen ngɔma nzɛmmɔnefoɛ. Ngɔfa ɛwɔfoɛ mɔ so ngɔsɛkye aseɛ ne ɔne so nningyein pasaa; me, AWURADE, yeɛ mahã ɔ.

¹³ “AWURADE Nyameɛ nwa nyoo: Ngɔsɛkye mmosoen nemɔ, na ngɔpra amoen mɔ bɔ bɛwɔ Memfise ɔ bɛ boso. Bengonya ɛhene biala wɔ Misraim aseɛ so ko; na ngɔfa ahunundetelɛ ngɔto Misraim aseɛ so.

¹⁴ Ngɔbɔ Patrose tɔɔ, na ngɔto Soan nu see, yeɛ ngɔhwe No ye so.

¹⁵ Ngɔma m’ahone kohu Pelusium bɔ ɔte Misraim anwoserɛ afealeɛ ne aso, na ngonua No mmenia worawora ne bɛ boso.

¹⁶ Ngɔto Misraim nu see, Perusium kɔfa yealɛ nu paa, mmenia kobubu No fasue bekogua bekowura nu, na amaneɛ kɔto Memfise so daa biala.

¹⁷ Mmerandeɛ bɔ bɛwɔ On ɔne Pibesete, bɛkɔtotɔ ngrandɛ noa, na bɛkɔhye sɔ nguro nemɔ nu mmenia nnure bɛkɔhɔ.

¹⁸ Tehafenese koso, alehyeleɛ kɔkakyi awosii, wɔ mmerɛ bɔ ngɔsɛkye Misraim tumi wɔ berɛ ne; na ye anwomasoɛ anwoserɛ ne, ɔkɔwa ayieleɛ, na munungum kɔkata ye so, na bɛkɔhye ye mma mmrasua mɔ nnure bɛkɔhɔ.

¹⁹ Sɔ yeɛ ngɔhwe Misraim so ɔ, na afei bekonwu kyɛ me ole AWURADE.”

²⁰ Afoɛ buru ne ko ne anu, bosome bɔ oli moa ne anu, ye ɛlɛsoo ne aso, AWURADE lale ye dwirɛ ali hyirele me kyɛ,

²¹ “Sona Awa, mabu Misraim hene Faro sa nu, na tie, bamva ayire bangyekye so, yeɛ bammɔ so borɛ bɔ ɔkɔmaa ɔkɔhɔ ɔ, bɔ ahaa ɔnate so nu kɔyɛ se maa ɔkɔhora kɔsɔ ngrandɛ nu ɔ.

²² Yiti AWURADE Nyameɛ nwa nyoo: Tie, meko metia Misraim hene Faro, ngobu ye sa nu, asaa bɔ nu yɛ se ne, ɔne bɔ nu abu ne, na ngɔma ngrandɛ ne kofi ye sa nu kɔtɔ ase.

²³ Ngɔbɔ Misraimfoɛ ngɔsande ngɔhɔ maen maen mɔ nu, na ngɔto bɛ ngɔpete aseɛ mɔ so.

²⁴ Ngɔma Babilɔn hene ye sa nu kɔyɛ se, ngɔfa me ngrandɛ ngowura ye sa nu; nakoso Faro de, ngobu ye sa nu, na ɔkɔpene kyɛ sona bɔ bapura ye paa ɔ, wɔ Babilɔn hene nyunu.

²⁵ Ngɔma Babilɔn hene sa nu kɔyɛ se, nakoso Faro de, ye sa nu kogoho. Na sɛ mefa me ngrandɛ mewura Babilɔn hene sa nu, ná ɔtwe ye wɔ Misraim maen so a, yeɛ bekonwu kyɛ me ole AWURADE ɔ.

²⁶ Ngɔbɔ Misraimfoɛ ngɔsande maen maen mɔ nu, na ngɔto bɛ ngɔpete aseɛ mɔ so. Na afei bekonwu kyɛ me ole AWURADE.”