Hesekiel 29 - AHYERƐLƐ KRONGRON

Misraim nwo ngɔm

¹ Afoɛ buru ne anu, bosome buru ne anu, ye eleburu ne nyɔ ne aso, AWURADE lale ye dwirɛ ali hyirele me kyɛ,

² “Sona awa, fa wɔ nye kyire Misraim hene Faro dɔ, ná hyɛ ngɔm tia ye ne Misraim amukoraa.

³ Dwudwo, ná se kyɛ, AWURADE Nyameɛ nwa nyoo, “Tie, meko metia wɔ, Misraim hene Faro, wɔ, sasrabɔnzam piri bɔ ɛla w’asue mɔ nu, bɔ ɛnwa: ‘M’asue Naele te me bɔbɔ me deɛ, na me bɔbɔ yeɛ nyɔ mane me nwo ɔ.’

⁴ Nakoso ngɔfa koaa ngɔsosɔ w’awogyee, w’asue mɔ nu tire mɔ, ngɔmaa bɛkɔmatamata wɔ si boen ne anwo, ngɔhwe wɔ ngofi w’asue nemɔ anu, na w’asue nemɔ anu tire amukoraa bɛkɔmatamata wɔ si boen ne.

⁵ Ngofindi wɔ ngɔto ɛserɛ so, ɛne w’asue nemɔ anu tire amukoraa, ɛkɔɔtɔ aseɛ pralaa so, bɛngɔboaboa wɔ noa bengosie wɔ; na ngɔfa wɔ ngɔyɛ aleɛ ngɔma eburo ngaka ne ewienu nnomaa.

⁶ “Na Misraimfoɛ amukoraa bekonwu kyɛ me ole AWURADE. Ɔnate kyɛ bɛte ngyɛngyɛma pɔmaa ma Yisrael awuro ama.

⁷ Mmerɛ bɔ bɛsosɔle wɔ nu ne, ebuli, na esinasinane bɛ bati amukoraa. Na bekisale wɔ ne koso, ebuli, na ɛmane bɛ dwongu amukoraa wosole.

⁸ Yiti AWURADE Nyameɛ nwa nyoo: Tie, mebaafa ngrandɛ meba wɔ so, na ngohũhũ wɔ nu mmenia ne ngaka.

⁹ Misraim aseɛ ne kɔkakyi kurofoen ne aseɛ pralaa, na bekonwu kyɛ me ole AWURADE. “Ɔnate kyɛ ɔnwa, ‘Asue Naele te me bɔbɔ me deɛ, na me bɔbɔ yeɛ nyɔle ɔ.’

¹⁰ Yiti tie, meko metia wɔ, ɛne w’asue nemɔ amukoraa, na Misraim aseɛ ne, ngɔbɔ ye tɔɔ, ngɔkakyi ye kurofoen, ofi Migidol bɔ ɔkɔ Siene alaa bɔ ɔkwaadwu Yitiopia ɛwɛen so ɔ.

¹¹ Kuro sona biala gya baa ngotia so, yeɛ kaka biala gya baa ngotia so, na ɔkɔla berɛ mbaen afoɛ aburanna bɔ ebiala ngɔtena so ɔ.

¹² Na Misraim maen ne, ngɔbɔ ye tɔɔ, kyɛbɔ mabɔ maen maen mɔ tɔɔ ne. Na ye nguro mɔ kɔkakyi kurofoen afoɛ aburanna, kyɛbɔ nguro bɔ bakakyi kurofoen ɔ bɛte ne. Ngɔbɔ Misraimfoɛ ngɔsande ngɔhɔ maen maen mɔ nu, ná mato bɛ mapete aseɛ mɔ so.

¹³ “Nakoso AWURADE Nyameɛ nwa nyoo: Sɛ afoɛ aburanna ne dwu a, ngɔboaboa Misraimfoɛ noa ngofi maen maen bɔ mabɔ bɛ masande mahɔ so ne aso;

¹⁴ na ngosa ngɔfa Misraim ngofi nnurehyelɛ nu ngɔwa, ngɔfa bɛ ngɔwa Patrose aseɛ so, bɔ ɔte bɛ bɔbɔ b’aseɛ bɔ befi so ne, na bɛkɔkakyi ahennie bɔ wabrɛ ye nwo aseɛ ɔ wɔ berɛ.

¹⁵ Ɔkɔyɛ bɔ wabrɛ ye nwo ase paa wɔ ahennie mɔ nu ɔ, na ɔngɔmoma ye nwo so ko le wɔ maen maen mɔ so. Na ngɔbrɛ bɛ ase bɔkɔɔ bɔ bengoli maen maen mɔ so ko ɔ.

¹⁶ Yisrael awuro ama ngɔfa bɛ wora ngowura Misraim nu ko, na mmom bɛkɔkaye kyɛ bɛyɔle amumuyɛɛ, mmerɛ bɔ bɛhɔle bɛ berɛ bɛɛpenane mmokalɛ ne. Na bekonwu kyɛ me ole AWURADE Nyameɛ.”

¹⁷ Na ɔwale kyɛ, afoɛ aburanyɔ ne nzoo ne anu, bosome bɔ oli moa ne, ye kyẽa bɔ oli moa ne, AWURADE lale ye dwirɛ ali hyirele me kyɛ,

¹⁸ “Sona awa, Babilɔn hene Nebukadenesa mane ye lɔen bɛfale koɛ bɛɛtetale Tiro serɛserɛ. Koɛ ne anu, mmenia ti so tutuli, na bɛ bati fandifandili. Nakoso ɔne ye lɔen ne, ɛfɛɛ worawora bɔ bɛfɛle wɔ koɛ bɔ bɛfa bɛɛtoale Tiro ne anu ne, bannya ye nwo akatuaa biala bamvi berɛ.

¹⁹ Yiti AWURADE Nyameɛ nwa nyoo: Tie, ngɔfa Misraim aseɛ ngɔma Babilɔn hene Nebukadenesa. Ɔkɔsoa so mmenia worawora ne kɔhɔ, ɔkɔfa so nningyein kɔyɛ koɛ nu nzesadeɛ, ɔkɔfẽ so nningyein kɔfa, na ɔkɔfa kɔyɛ ye akatuaa kɔma ye lɔen ne.

²⁰ Na ɔnate adwuma bɔ wayɔ ne ati, mafa Misraim aseɛ mayɛ akatuaa mama ye, ofikyɛ bɛyɔle adwuma ne bɛmane me, AWURADE Nyameɛ noa dwirɛ ɛne.

²¹ “Na sɔ kyẽa ne, ngɔma mmɛen bie kofifi kɔma Yisrael awuro ama, na ngɔma wɔ tumi maa ekobukye wɔ noa wɔ bɛ nu. Na afei bekonwu kyɛ me ole AWURADE.”