Hesekiel 28 - AHYERƐLƐ KRONGRON

Tiro hene nwo ngɔm

¹ Yeɛ AWURADE lale ye dwirɛ ali bieku hyirele me kyɛ,

² “Sona awa, se Tiro maen panyi ne kyɛ, AWURADE Nyameɛ nwa nyoo: “Ɔnate kyɛ ɛte anwomasoɛ, ná ahã kyɛ, ‘Nde nyameɛ, nde nyameɛ mɔ bɛ bia so wɔ ɛpo afia;’ nakoso ɛte kuro sona, ɛtte nyameɛ, na ɛyɛ wɔ nwo kyɛ ɛse nworɛ kyɛ Nyameɛ;

³ kyɛ ɛse nworɛ tra Daniel, mvealeɛ nu dwirɛ biala mvea wɔ,

⁴ wɔ nworɛ ne wɔ nimdeɛ yeɛ afa anya wɔ nwo ɔ, na aboaboa sikaa kɔkorɛ ne ɛdwetɛ noa agua nekaa bɔ esie wɔ nningyein ɔ;

⁵ Wɔ dwaalilɛ nu nworɛ piri ne, ɛnate so ama w’anwonya asone pee, na w’anwonya ne ama anwomasoɛ awa wɔ nu.

⁶ Yiti AWURADE Nyameɛ nwa nyoo: “Ɔnate kyɛ ebu wɔ nwo nworɛniɛ kyɛ Nyameɛ ne ati,

⁷ yiti, tie, ngɔfa ɛwɔfoɛ mɔ maa bɛkɔwa wɔ so, bɛte maen bɔ bɛ ti anu yɛ se paa wɔ maen maen mɔ nu ɔ; na bɛkɔhwe bɛ ngrandɛ wɔ w’anwonyemene ne wɔ nworɛ ne aso, na bekogua w’animnyam nwo fiɛ.

⁸ Bekofindi wɔ bɛkɔto ɛborɔ kumaa nu, na ekowu mmenia bɔ batotɔ ɔ b’ewue, wɔ ɛpo afia.

⁹ Aso ɛkɔhɔ so kɔhã kyɛ, ‘Nde Nyameɛ,’ wɔ bɛ bɔ beku wɔ ne anyunu? Ɛte sona, na mmom ɛtte Nyameɛ wɔ mmenia bɔ beku wɔ nemɔ bɛ sa nu.

¹⁰ Ekowu mmenia bɔ bɛmbɛ bɛ bienzua ɔ bɛ wue, wɔ ɛwɔfoɛ mɔ bɛ sa nu; ofikyɛ me yeɛ mahã ɔ, AWURADE Nyameɛ noa dwirɛ ɛne.”

¹¹ Na AWURADE lale ye dwirɛ ali bieku hyirele me kyɛ,

¹² “Sona awa, bɔ Tiro hene nwo awuye, ná se ye kyɛ, AWURADE Nyameɛ nwa nyoo: Né ɛte sona bɔ odi mu paa nwo nhwɛsoɛ, bɔ nworɛ ayi wɔ ti anu tɛkyɛ, ná w’anwonyemene di mu paa ɔ.

¹³ Né Nyameɛ turo Eden nu yeɛ ɛwɔ ɔ, nyɔboɛ mukoraa bɔ bɛ nyɔboɛ yɛ se ɔ yeɛ né ɔkata wɔ nwo ɔ. Bɛ ole: kanelian, topase ne yasepa, krisolite, bɛrile ne onike, safire, ɛmerade ne kabunkre. Sikaa kɔkorɛ yeɛ bɛfa bɛhyehyɛle wɔ nwo ɔ; na kyẽa bɔ bɛbɔle wɔ ne, yeɛ bɛhyehyɛle bɛ ɔ.

¹⁴ Wɔ yeɛ ɛte kɛrubo bɔ bapopa ye ngoo bɔ ɔkata so ɔ, né ɛwɔ Nyameɛ bokaa krongron ne aso, na nyɔboɛ see afia yeɛ né edi akɔneaba ɔ.

¹⁵ Né mvomsoɛ biala nne wɔ nwo, ofi kyẽa bɔ bɛbɔle wɔ ɔ maa oodwuli kyɛ benwuni amumuyɛɛ wɔ wɔ nu ɔ.

¹⁶ Ngɔsoɛ wale wɔ dwaalilɛ ne anu maa ɔnate so basabasayɔlɛ yili wɔ nu tɛkyɛ, na ɛyɔle bɔne; yiti ɛkakyili nikyee bɔ ye nwo agua fiɛ ɔ, maa ɔnate so mvindini wɔ mvili Nyameɛ bokaa ne aso. Wɔ, kɛrubo bɔ ɛkataso ɔ, ngɔsɛkye wɔ pasapasa ngofi see nyɔboɛ nemɔ b’afia.

¹⁷ W’anwonyemene ti ɛyɛle anwomasoɛ, wɔ talɛ bɔ ɛta ti ɛsɛkyele wɔ nworɛ. Yiti mvindini wɔ ndole ase, nguale wɔ nyunu ase wɔ ahemvo mɔ bɛ nyunu, maa betuli bɛ nye beguale wɔ so.

¹⁸ Ɛnate w’amumuyɛɛ worawora ne wɔ dwaalilɛ fiɛ ne aso agua wɔ nekaa krongron nemɔ nwo fiɛ; yiti mama see asɔ wɔ wɔ nu, na wayera wɔ, na mamaa atɔ nzoen wɔ aseɛ so, bɔ bɛ bɔ benwuni wɔ amukoraa bɛ nye tua ɔ.

¹⁹ Mmenia amukoraa bɔ bɛse wɔ wɔ maen maen mɔ nu ne, wɔ ti bɛ nwo adwiri bɛ; w’ayieleɛ ayie wɔ pasaa, na engodwɔso ko le.”

Sidon nwo ngɔm

²⁰ Yeɛ AWURADE lale ye dwirɛ ali hyirele me kyɛ,

²¹ “Sona awa, fa wɔ nye kyire Sidon, ná hyɛ ngɔm tia ye.

²² Kã kyɛ, ‘AWURADE Nyameɛ nwa nyoo, “O Sidon, tie, meko metia wɔ, na m’animnyam kɔla ali wɔ wɔ nu. Na sɛ metwe ye so, ná mema me krongronyɛlɛ da ali wɔ ye nu a, ye de bekonwu kyɛ me ole AWURADE.

²³ Ofikyɛ ngɔsoma ewue anwonyerɛ maa ɔkɔhɔ ye so, ngɔma mogya koguagua ye dwaa nemɔ aso, na ngrandɛ bɔ okofi nekaa biala kɔwa ye so ne, ɔkɔma mmenia kɔtotɔ wɔ ye nu, na afei bekonwu kyɛ me ole AWURADE.

²⁴ “Na Yisrael awuro ama de, maen maen amukoraa bɔ bapɛ bɛ nwo bayia, bɔ bebu bɛ animtia ne, bɛngɔkakyi bɛ so ɛfone anaa mmowue ngɔwowɔ bɛ ko. Na afei bekonwu kyɛ me ole AWURADE Nyameɛ.

²⁵ “AWURADE Nyameɛ nwa nyoo: Sɛ meboaboa Yisrael awuro ama bɛ noa mefi maen maen bɔ mabɔ bɛ masande mahɔ so ne aso, ná meye me krongronyɛlɛ ali wɔ bɛ nu, bɔ maen maen nemɔ bɛ nye tua ɔ a, bɛkɔtena bɛ bɔbɔ b’aseɛ bɔ mva mane me somvoɛ Yakob ne aso.

²⁶ Bɛkɔtena so asomdwee nu, na bekosisi sua bɛkɔyɔ bobe boo mɔ. Na maen maen amukoraa bɔ bapɛ bɛ nwo bayia, bɔ bebu bɛ animtia ne, sɛ metwe bɛ so a, bɛkɔtena asomdwee nu. Na bekonwu kyɛ me ole AWURADE bɛ Nyameɛ.”