Hesekiel 27 - AHYERƐLƐ KRONGRON

¹ Yeɛ AWURADE lale ye dwirɛ ali bieku hyirele me kyɛ,

² “Afei wɔ, Sona awa, bɔ Tiro nwo awuye,

³ ná se Tiro kyɛ: Wɔ, kuro bɔ bɛkyekyele wɔ wɔ mboanoa, bɔ ɛne maen maen bedi dwaa wɔ supɔ pee so ɔ, AWURADE Nyameɛ nwa nyoo: “O Tiro, wɔ de ɛnwa, ‘M’anwonyemene di mu bɔkɔɔ.’

⁴ Wɔ wɛen nemɔ bɛwɔ ɛpo afia, na bɛ bɔ bɛkyekyele wɔ ne, bɛmane w’anwonyemene lili mu.

⁵ Wɔ lɛen ndaboa ne, bɛfale asia mmakaa bɔ ofi Seniri yeɛ bɛyɔle ɔ; sida bakaa bɔ ofi Lebanon yeɛ bɛfa bɛyɔle ɛlɛen frangaa bakaa bɛmane wɔ ɔ.

⁶ Basan eluii yeɛ bɛfa bɛyɔle wɔ tabɔnga ɔ; Kitim mboanoa sapele yeɛ bɛfa bɛyɔle wɔ kuku nzamsoɛ bɔ ɛsoen gye wɔ nu ɔ.

⁷ Nwera bɔ ofi Misraim bɔ bali adwii bagua nu yeɛ ɔte wɔ lɛen mvrama tena bɔ ɔte wɔ frangaa ɔ, bibire ne koogyan bɔ ofi Elisa mboanoa yeɛ ɔte wɔ ngatasoɛ ɔ.

⁸ Sidonfoɛ ne Arwadefoɛ yeɛ bɛte wɔ ɛlɛenhanɛfoɛ ɔ, O Tiro, wɔ nimdeɛfoɛ yeɛ bɛla wɔ ɛlɛenhanɛfoɛ nemɔ noa bekyire b’atee ɔ.

⁹ Gebal mbanyi ne ye nimdeɛfoɛ bɛwɔ wɔ nu bɔ betuatua ɛlɛen ne abo ndokuro nemɔ ɔ. Ɛpo so ɛlɛen amukoraa ne nu ɛlɛenhanɛfoɛ bɛwɔ wɔ nu, kyɛ bɛ ne wɔ bɛbaali dwaa.

¹⁰ “Pɛsia ne Lude ne Pute bɛte koɛhonɛfoɛ wɔ wɔ lɔen ne anu; bɛfa akokyɛm ne buralɛ kyerɛ besinzesinze wɔ nu, na bɛmaa ɛyɛ nyemene.

¹¹ Arwadefoɛ ne b’ɛlɔen bɛwɛne wɔ fasue nemɔ bɛbra beyia; Gamadefoɛ bɛwɔ w’abandenden nemɔ anu. Bɛfa b’akokyɛm mɔ besinzesinze wɔ fasue nwo bɛbra beyia, na bɛma w’anwonyemene di mu.

¹² “W’anwonya pee amukoraa ne ati, Tasise ne wɔ belili dwaa. Bɛfale ɛdwetɛ, buralɛ, kyɛnzee ne sum yeɛ bɛsesane wɔ dwaa nningyein ɔ.

¹³ Yawan, Tubal ne Meseke bɛ ne wɔ lili dwaa; bɛfale kuro mmenia ne kɔɔbere nningyein yeɛ bɛsesane wɔ dwaa nningyein ɔ.

¹⁴ Bete Togamafoɛ fale mbɔngɔ, pɔngɔhanɛfoɛ ne afunum mɔ yeɛ bɛsesane wɔ dwaa nningyein ɔ.

¹⁵ Dedanfoɛ bɛ ne wɔ lili dwaa; mboanoa aseɛ pee aso yeɛ né ɛfa wɔ dwaa nningyein ɛkɔ ɔ, na bɛfale ɛsoen gye ne akumadua ndaboa yeɛ betuale wɔ kerɛ ɔ.

¹⁶ Ɔnate wɔ dwaa nningyein pee ne ati yeɛ Siria ɔne wɔ belili dwaa ɔ. Ɔfale ɛmerade nyɔboɛ, adaabene, ɛtena bɔ bali adwii bagua nu, nwera paa, nyɔboɛ nahanaha ne nyɔboɛ bɔ oli agate yeɛ ɔsesane wɔ dwaa nningyein ɔ.

¹⁷ Yuda ne Yisrael maen bɛ ne wɔ lili dwaa. Bɛfale atokoɔ bɔ ofi Minite, ayuo, woɛ, ngoo ne sakyeɛ yeɛ bɛsesane wɔ dwaa nningyein ɔ.

¹⁸ Damasko ne wɔ belili dwaa, ɔnate wɔ dwaa nningyein pee ne, ɔne w’anwonya ahoroɔ mukoraa, Helebon nzaa ne mmoaen nwiaa fufue ne ati.

¹⁹ Dan ne Yawan bɔ befi Yusal ne, bɛ ne wɔ lili dwaa; bɛfale buralɛ bɔ bapɔ ye nwo, ɛmeɛ ne hwendea bɛɛsesane wɔ dwaa nningyein.

²⁰ Dedan ne wɔ belili ɛtena bɔ bɛfa bɛsɛ pɔngɔ so ɔ nwo dwaa.

²¹ Arabia, yeɛ Kedare atitire amukoraa bɛ ne wɔ lili dwaa. Bɛfale mmoaen mmaa, mmoaen nyii ne mbɔngye yeɛ betuale wɔ kerɛ ɔ. Bɛ ne wɔ lili sɔ nningyein nemɔ nwo dwaa.

²² Hyeba ne Raama dwadifoɛ bɛ ne wɔ lili dwaa. Bɛfale ayirefona mukoraa nu paa, nyɔboɛ paa mukoraa ne sikaa kɔkorɛ bɛsesane wɔ dwaa nningyein.

²³ Haran, Kanne, Eden, Hyeba dwadifoɛ, Asure ne Kilmade bɛ ne wɔ lili dwaa.

²⁴ Bɛ ne wɔ lili nningyein hemɔ nwo dwaa: ɛtena paa, ɛtena bibire, ɔne bɔ bali adwii bagua nu ɔ, ɛtena ndiamuɛ bɔ banwo mmɛsa bafa banwo bamia nu ɔ.

²⁵ Tasise ɛlɛen mɔ yeɛ né bɛsoa wɔ dwaa nningyein ɔ. “Yiti nningyein yili wɔ nu tɛkyɛ, wɔ ɛpo n’afia dɔ.

²⁶ Wɔ ɛlɛenhanɛfoɛ nemɔ, bɛfale wɔ bɛhɔle ɛpo ne aso dɔ moa moa paa, na eyia afiteleɛ mvrama ama wɔ ɛlɛen ne abutu wɔ ɛpo n’afia dɔ.

²⁷ W’anwonya, wɔ dwaa nningyein, wɔ nningyein bɔ ɛyɛ ye atɔen ɔ, wɔ ɛlɛenhanɛfoɛ, bɛ bɔ bɛla wɔ ɛlɛenhanɛfoɛ nemɔ noa bekyire b’atee ɔ, wɔ mmenia bɔ betuatua ɛlɛen ne abo ndokuro nemɔ, bɛ bɔ ɛne bɛ di dwaa, yeɛ wɔ koɛhonɛfoɛ bɔ bɛwɔ wɔ nu ɔ, bɛ ne wɔ ɛlɔen amukoraa bɔ bɛwɔ wɔ nu ɔ, bɛkɔmono wɔ ɛpo n’afia dɔ, wɔ w’amaneɛnwunɛ kyẽa ne.

²⁸ Bɛ bɔ bɛla wɔ ɛlɛenhanɛfoɛ nemɔ noa bekyire b’atee ne, bɛtea nu a, ɔma mboanoa aseɛ woso,

²⁹ na mmenia mukoraa bɔ betiratira tabɔnga ne, bedwu ase befi bɛ ɛlɛen nemɔ anu; ɛlɛenhanɛfoɛ ne mmenia mukoraa bɔ bɛlela ɛlɛenhanɛfoɛ nemɔ noa ne, bɛbagyinagyina ase wɔ mboanoa,

³⁰ bɛteatea nu besu wɔ, na besu hahii. Betu mvuture begua bɛ ti so, na bemunumunu bɛ nwo wɔ nzoen nu.

³¹ Ɔnate wɔ ti bɛbɔ tikwa, na bɛkera ɛsɛen tena, na bɛbɔ awuye bedi aworabɔlɛ besu wɔ hahii.

³² Bɛ suɛ ne anu, bɛbɔ wɔ nwo awuye, na bɛbɔ wɔ nwo awuye kyɛ, ‘Kuro beni yeɛ né ɔte kyɛ Tiro bɔ afei de wayɛ pasaa wɔ ɛpo nu e?

³³ Mmerɛ bɔ né wɔ dwaa nningyein fi ɛpo so ba ne, ɛfa mane maen maen pee maa benyane bɔ bɛpena ɔ; na w’anwonya ne wɔ dwaa nningyein worawora ne, ɛfa mane aseɛ so ahemvo maa benyane bɛ nwo.

³⁴ Na afei de, ɛpo ne abubu wɔ wɔ ɛpo buma ne anu, na wɔ dwaa nningyein ne wɔ nu mmenia amukoraa, bɛ ne wɔ amono bahɔ nzue ne abo.

³⁵ Na ɔnate wɔ ti, mboanoafoɛ amukoraa bɛ nwo dwiri bɛ; ɛserɛ kandinga kã b’ahemvo mɔ, na bɛ nyunu yɛ bosaa.

³⁶ Maen maen mɔ nu dwadifoɛ mɔ, besobi bɛ noa begua wɔ so; w’ayieleɛ ayie wɔ pasaa, na engodwɔso ko le.’ ”