Hesekiel 25 - AHYERƐLƐ KRONGRON

Amonfoɛ nwo ngɔm

¹ Yeɛ AWURADE lale ye dwirɛ ali bieku hyirele me kyɛ,

² “Sona awa, fa wɔ nye kyire Amonfoɛ, ná hyɛ ngɔm tia bɛ.

³ Se Amonfoɛ kyɛ, Ɛ́mɔtie AWURADE Nyameɛ noa dwirɛ: AWURADE Nyameɛ nwa nyoo: Ɛhane kyɛ, ‘Ehee, ɔyɛ me fɛ!’ Ɛhane sɔ dwirɛ ne tiale me nekaa krongron ne wɔ mmerɛ bɔ beguale ye nwo fiɛ ne, ɛhã tiale Yisrael aseɛ wɔ mmerɛ bɔ bɛmaa ɔkakyili kurofoen ne, yeɛ ɛhã tiale Yuda awuro ama wɔ mmerɛ bɔ bɛhyele bɛ nnure bɛhɔle ne;

⁴ yiti tie, ngɔye wɔ ngowura eyia afiteleɛfoɛ bɛ sa maa bekoli wɔ so, na bɛkɔkyekye b’asikyeleɛ mɔ wɔ wɔ nu, ná basisi b’atenaleɛ mɔ wɔ wɔ nu. Bekoli wɔ mmakaa mmaa, ná bano wɔ nyɔfonesue ne.

⁵ Ngɔma Raba kɔkakyi aseɛ bɔ afupɔngɔ mɔ bedidi so ɔ, ná mama Amonfoɛ nguro akakyi mmoaen dabea, na ɛmɔkonwu kyɛ me ole AWURADE.

⁶ Ofikyɛ AWURADE Nyameɛ nwa nyoo: Ɔnate kyɛ abɔ wɔ sa nu ahuru apepe, ali ahurusi abu Yisrael aseɛ animtia ne ati,

⁷ tie, ngɔhwe wɔ so, na ngɔfa wɔ ngɔyɛ maen maen mɔ bɛ koɛ nu nzesadeɛ. Ngɔpɛ wɔ asue ngofi maen maen mɔ nu, na ngɔpra wɔ boso ngofi maen maen mɔ nu. Ngonua wɔ boso, na ekonwu kyɛ me ole AWURADE.

Moabofoɛ nwo ngɔm

⁸ “Yiti AWURADE Nyameɛ nwa nyoo, ‘Ɔnate kyɛ Moabo ne Sɛre bɛnwa: Yuda awuro ama bɛte kyɛ maen maen amukoraa.’

⁹ Yiti tie, ngɔma atee kɔla Moabo nwo ngofi ye nguro bɔ bɛlela ye wɛen so ne aso, nguro bɔ bɛte ye animnyam ne, bɔ bɛ ole Bete Yesimote, Baal Meon ne Kiriatim ne.

¹⁰ Ngɔfa bɛ ne Amonfoɛ ngowura eyia afiteleɛfoɛ mɔ bɛ sa maa ɔkɔyɛ bɛ deɛ, amaa ɔnate so mmenia bangaye Amonfoɛ ko wɔ maen maen mɔ nu.

¹¹ Ngɔhwe Moabo so, na bekonwu kyɛ me ole AWURADE.’ ”

Edom nwo ngɔm

¹² “AWURADE Nyameɛ nwa nyoo, ‘Ɔnate kyɛ Edom atɔ Yuda awuro ama so wereɛ, ná afei wali ye nwo foɛ paa kyɛ watɔ bɛ so wereɛ ne ati,

¹³ yiti AWURADE Nyameɛ nwa nyoo: Ngɔhwe Edom so, na ngohũhũ so mmenia ne ngaka. Ngɔbɔ maen ne, na bɛkɔtotɔ ngrandɛ noa bekofi Teman maa okoodwu Dedan.

¹⁴ Ngɔfa me maen Yisrael so ngɔtɔ Edom so wereɛ. Bɛkɔhwe Edom so, kyɛbɔ me yaafɛlɛ ne m’ahonehulɛ osi te ɔ, na bekonwu me wereɛtɔlɛ ne, AWURADE Nyameɛ noa dwirɛ ɛne.

Filistifoɛ nwo ngɔm

¹⁵ “AWURADE Nyameɛ nwa nyoo, ‘Ɔnate kyɛ Filistifoɛ batɔ ye so wereɛ, ná bafa atianuserɛ ɛpɔen batɔ ye so wereɛ, kyɛ bekonua ye boso ne ati;

¹⁶ yiti AWURADE Nyameɛ nwa nyoo: Tie, ngɔhwe Filistifoɛ bɛ so, ngonua Keretifoɛ bɛ boso, yeɛ ngohũhũ bɛ bɔ baha wɔ mboanoa ne.

¹⁷ Ngɔfɛ yaa piri paa ngɔtɔ bɛ so wereɛ piri; na sɛ metɔ bɛ so wereɛ a, yeɛ bekonwu kyɛ me ole AWURADE ɔ.’ ”