Hesekiel 22 - AHYERƐLƐ KRONGRON

Yerusalem asoserɛ ne asotwe

¹ Na ɔwale kyɛ, AWURADE lale ye dwirɛ ali hyirele me bieku kyɛ,

² Wɔ, Sona awa, ekobua ndɛen anaa, ekobua awuelilɛ kuro ne ndɛen anaa? Nzaade maa onwu ye akyiwadeɛ bra bɔ wabɔ amukoraa.

³ Kã kyɛ, ‘AWURADE Nyameɛ nwa nyoo: Kuro bɔ ɔkã mogya gua wɔ ye nu ɔ, ye ayieleɛ mmerɛ adwu, kuro bɔ ogyina mmosoen mɔ ɔfa gua ye nwo fiɛ ɔ!

⁴ Ɔnate wɔ mogya bɔ ahã agua ne ati, edi fɔ; na afa wɔ mmosoen bɔ ayɔ ne agua wɔ nwo fiɛ. Ama wɔ kyẽa ne apingye, na w’afoɛ nemɔ b’ayieleɛ ne adwu. Yiti, mamaa ayɛ nyanzoen nikyee wɔ maen maen mɔ bɛ nyunu, ɔne ngorohoɛ nikyee wɔ aseɛ amukoraa so.

⁵ Bɛ bɔ bepingye wɔ ne bɛ bɔ bɛwɔ dededede ne, bɛkɔgoro wɔ nwo, kuro bɔ wɔ dumaa asɛkye, bɔ basabasayɔlɛ ayi nu to ɔ.

⁶ “ ‘Tie, Yisrael mbanyi bɔ bɛwɔ wɔ nu ne, bɛ nu biala gyina ye tumi so yeɛ ɔkã mogya gua ɔ.

⁷ Bebu seɛ ne niɛ animtia wɔ wɔ nu; bɛhyɛ ɛwɔfoɛ so wɔ wɔ nu; yeɛ besisi nyisiaa ne kunafoɛ mmrasua koso wɔ wɔ nu.

⁸ Abu me nningyein krongron nemɔ animtia, na agua m’afofingyẽa nemɔ nwo fiɛ.

⁹ Wɔ nu mmenia bɛpɛ dwirɛ bɛto mmenia so beku bɛ; mmokaa so asɔneyɛɛ so yeɛ wɔ nu mmenia bedidi ɔ, na nyanzoen bra yeɛ bɛbɔ ye wɔ wɔ nu ɔ.

¹⁰ Wɔ nu yeɛ mmenia bɛye bɛ se mɔ b’adagya bɛto so ɔ; na wɔ nu mmrasua bɔ babu bɛ sa, bɔ bɛ nwo nde ne, yeɛ bɛ ne bɛ bɛda ɔ.

¹¹ Ebie ne obiɛngo aye bɛbɔ akyiwadeɛ bra; ebie ɔbɔ nyanzoen bra ɔfa ɔwa bienzua aye; na wɔ nu yeɛ ebie to oliɛma brasua bɔ ɔne ye bɛte seɛ mmaa mmɔnaa ɔ.

¹² Mmenia wɔ wɔ nu bɔ bede fea-ase-ma beku mmenia ɔ. Ede nzihoɛ mbemanim, na esisi ebiɛngo enya wɔ nwo; nakoso me de, wɔ wora afi me, AWURADE Nyameɛ noa dwirɛ ɛne.

¹³ “Yiti tie, mebɔ me sa nu metia mvasoɛ fiɛ bɔ anya ye ne, ɔne mogya bɔ ahã agua wɔ wɔ nu ne.

¹⁴ Kyẽa bɔ me ne wɔ yɛkoli ye weewee so ne, aso ɛkɔhora kosi wɔ hue, anaa ɛkɔhora kogyina ye noa’? Me, AWURADE, me yeɛ mahã ɔ, na ngɔyɔ koso.

¹⁵ Ngɔbɔ wɔ ngɔsande ngɔhɔ maen maen mɔ nu, ná mato wɔ mapete aseɛ mɔ so; na ngokyikyi wɔ yɔleɛ fiɛ ne ngofi wɔ nu bɔkɔɔ.

¹⁶ Wɔ nwo kogua fiɛ wɔ maen maen mɔ bɛ nyunu, na ekonwu ye kyɛ me ole AWURADE.’ ”

¹⁷ Yeɛ AWURADE lale ye dwirɛ ali hyirele me kyɛ,

¹⁸ “Sona awa, Yisrael awuro ama bayɛ me nye so ewura. Bɛ mukoraa bakakyi ɛdwetɛ, kɔɔbere, kyɛnzee, buralɛ ne sum bɔ bahuro bɛ wɔ afaa nu toonn maa bakakyi buralɛ ewura ɔ.

¹⁹ Yiti AWURADE Nyameɛ nwa nyoo, ‘Ɔnate kyɛ ɛmɔ amukoraa bakakyi buralɛ ewura ne ati, ɛ́mɔtie, ngɔboa ɛmɔ noa wɔ Yerusalem.

²⁰ Na kyɛbɔ sona boaboa ɛdwetɛ, kɔɔbere, buralɛ, sum ne kyɛnzee noa gua afaa nu, ofita see ne anu maa behuro ne, sɔ ala yeɛ ngɔboaboa ɛmɔ noa wɔ me yaafɛlɛ ne m’ahonehulɛ nu ɔ, na ngɔfa ɛmɔ ngogua nu ngohuro ɛmɔ.

²¹ Ngɔboaboa ɛmɔ noa, na ngofita m’ahonehulɛ see ne anu maa okogye kɔfa ɛmɔ nwo, na ɛmɔkohuro wɔ nu.

²² Na kyɛbɔ behuro ɛdwetɛ wɔ afaa nu ne, sɔ ala yeɛ ɛmɔkohuro wɔ nu ɔ; na ɛmɔkonwu kyɛ me, AWURADE yeɛ m’ahone ahu ɛmɔ so serɛserɛ ɔ.’ ”

²³ Na AWURADE lale ye dwirɛ ali hyirele me kyɛ,

²⁴ “Sona awa, kã kyire ye kyɛ, ‘Ɛte aseɛ bɔ bɛttele ye nwo, bɔ esue ɔttɔ ogguale so wɔ ahonehulɛ kyẽa ne ɔ.

²⁵ Aseɛ bɔ so ngɔmhyɛlɛfoɛ bɛbɔ porɛ, bɛte kyɛ gyata bɔ wahye naen ná opo ɔtete ye nu ɔ. Beku mmenia, bede anwonya ne mbembenanneɛ, na bama so akunafoɛ mmrasua basone pee.

²⁶ Ye asɔfo mɔ babu me mmeraa so, bagua me nningyein krongron nemɔ anwo fiɛ; bɛmma nzonzoleɛ nna nningyein bɔ bɛte krongron ɔne bɔ bɛtte krongron ɔ b’afia; yeɛ bengyire nzonzoleɛ bɔ ɔla nikyee bɔ ye nwo te ɔ ɔne bɔ ye nwo nde ɔ b’afia, bɛmva m’afofingyẽa nemɔ bɛnyɛ huu, na bagua me nwo fiɛ wɔ bɛ nu.

²⁷ Ye mbanyi bɔ bɛwɔ ye nu ne, bɛte kyɛ mbataku bɔ bɛtete naen bɔ bahye ye ɔ nu ɔ. Bɛkã mogya begua, na beku mmenia maa ɔnate so benya anwonyadeɛ fiɛ.

²⁸ Na ye ngɔmhyɛlɛfoɛ benwu ngondombo nyekyire bekyire bɛ, yeɛ bɛhyɛ ngɔndorɔ bekyire bɛ. Bɛkã kyɛ, ‘AWURADE Nyameɛ nwa nyoo,’ wɔ aberɛ bɔ nna AWURADE yeɛ wahã ɔ.

²⁹ Aseɛ ne aso mmenia bɛhyɛ mmenia so, bedi aminɛ, besisi ehiafoɛ ne bɛ bɔ bɛyɛ anwumvo ɔ, na bebu mmeraa so bɛhyɛ ɛwɔfoɛ mɔ so.

³⁰ Mbenane bɛ nu sona ko bɔ okosiesie ɛwaen ne, bɔ okogyina tokuro ne anu kɔma aseɛ ne wɔ me nyunu ɔ, amaa ɔnate so manzɛkye ye ɔ, nakoso mannwu bie.

³¹ Yiti mama m’ahone ahu bɛ so piri paa, mafa m’anyeborolɛ see ne mayera bɛ, na mama bɛ yɔleɛ abɔ bɛ bɔbɔ bɛ ti so, AWURADE Nyameɛ noa dwirɛ ɛne.”