Hesekiel 2 - AHYERƐLƐ KRONGRON

Nyameɛ frɛ Hesekiel

¹ Na osele me kyɛ, “Sona awa, dwɔso gyina wɔ gya so maa nga edwirɛ ngyire wɔ.”

² Na mmerɛ bɔ odwudwo hyirele me ne, Sunzum ne wurale me nu, na ɔpagyale me maa ngyinane me gya so, na ndele kyɛ odwudwo kyire me ɔ.

³ Osele me kyɛ, “Sona awa, mésoma wɔ wɔ Yisraelfoɛ berɛ, ɛlɔenyɛlɛ maen bɔ bayɛ me nwo lɔen ne berɛ; bɛ ne bɛ nana mɔ yeɛ batiatia me mmeraa so maa waadwu ɛnɛ ɔ.

⁴ Ofikyɛ bɛte aniammɔwoho ne asoserɛfoɛ mmenia, na mésoma wɔ bɛ berɛ maa ekose bɛ kyɛ, ‘Bɔ AWURADE Nyameɛ ɔkã hɔ ɛhe oo.’

⁵ Na sɛ betie oo, sɛ bandie oo, (ofikyɛ bɛte abusua bɔ bayɛ lɔen ɔ), kyɛbɔ ɔkɔyɛ biala, bekonwu kyɛ ngɔmhyɛlɛniɛ wɔ bɛ nu.

⁶ Na wɔ, Sona awa, nnɛsuro bɛ, yeɛ nnɛsuro bɛ noa dwirɛ. Ɔwɔ nu kyɛ ɛfone ne agurɛ nu yeɛ ɛla ɔ, yeɛ anyanyangyeleɛ mɔ nu yeɛ ɛte ɔ de, nakoso nnɛsuro bɛ noa dwirɛ, yeɛ nnɛsuro bɛ nyunu, ɔwɔ nu kyɛ bɛte abusua bɔ bayɛ lɔen ɔ de.

⁷ Na sɛ betie oo, sɛ bandie oo, wɔ de kã me noa dwirɛ ne kyire bɛ, ofikyɛ bɛte abusua bɔ bayɛ lɔen ɔ.

⁸ “Na wɔ, Sona awa, tie bɔ méka mékyire wɔ ye. Nnɛyɛ lɔen kyɛ sɔ ɛlɔenyɛlɛ abusua ne. Bukye wɔ noa nu, ná di bɔ méfa méma wɔ ye.”

⁹ Na nneane nen, yieee, asaa bie tengyɛle wɔ me so, na nwuni kyɛ né otira nwomaa bɔ babobɔ ɔ.

¹⁰ Ɔtrɛle nu wɔ me nyunu berɛ. Né bahyerɛ ye nyunu ne ye si, na né nu ahyerɛlɛ ne ɔte awuyebɔlɛ, esuɛ ne yealɛlilɛ.