Hesekiel 18 - AHYERƐLƐ KRONGRON

Ebiala soa ye bɔbɔ ye asodie

¹ Na AWURADE lale ye dwirɛ ali hyirele me bieku kyɛ,

² “Sɔ anyandera he bɔ ɛmɔtaa bebu bɛfa Yisrael maen nwo ne, sɛɛ yeɛ ɛmɔkyire ɔ? Ɛmɔnwa: ‘Seɛ mɔ bali abrɛbɛ bisii, na mmaa mɔ yeɛ bɛ gye anya ɔ.’

³ Susu amba, kyɛ nde ase ye, ɛmɔngobu sɔ anyandera ne ko wɔ Yisrael, AWURADE Nyameɛ noa dwirɛ ɛne.

⁴ Ɛ́mɔtie, mmenia mukoraa bɛ kra te me deɛ. Na kyɛbɔ baba kra te me deɛ ne, sɔ ala yeɛ baa kra koso ɔte me deɛ ɔ: ɛkra bɔ ɔyɔ bɔne ne, ye yeɛ okowu ɔ.

⁵ “Sɛ sona bie tengyɛ, ɔyɔ bɔ ɔte pɛpɛɛpɛ ne bɔ ɔtengyɛ,

⁶ ná onni mmokaa so asɔneyɛɛ so aleɛ, anaa ɔmma ye ti so mva ye nye ngyire Yisrael awuro ama bɛ mmosoen, anaa ɔne obiɛngo aye bɛnna, anaa ɔmva ye nwo nga brasua bɔ wabu ye sa,

⁷ ɔnhyɛ obiɛngo so; na mmom sɛ ebie fa nikyee si ye berɛ awowaa a, osa fa ye nikyee ma ye, ɔmva ebie nningyein patapaa so, na mmom ɔfa ye aleɛ ma bɔ ɛhɔen ku ye ɔ, ɔma bɔ ye nwo la so ɔ ɛtena,

⁸ ɔmmɔ bosea mva nzihoɛ nzi ye nwo, anaa onne bie mva mmoka so, ɔtwe ye nwo fi amumuyɛɛ nwo, obua mmenia afia ndɛen bɔ ɔtengyɛ ɔ,

⁹ odi me nhyehyɛleɛ so, ná odi m’ahyɛdeɛ so nahorɛ nu a, sɔ sona ne yeɛ ɔtengyɛ ɔ, na nahorɛ nu, okonya ngoa, AWURADE Nyameɛ noa dwirɛ ɛne.

¹⁰ “Na sɛ ɔwo baa bɔ ɔte awerɔm awueniɛ bɔ ɔkã mogya gua, anaa ɔyɔ sɔ nningyein nemɔ nu biala,

¹¹ bɔ ɔnyɔ nningyein bɔ ye baba yɔle ne anu biala, na mmom odi mmokaa so asɔneyɛɛ so aleɛ, ɔne obiɛngo aye bɛda,

¹² ɔhyɛ ehiafoɛ ne bɛ bɔ bɛyɛ anwumvo ɔ so, ɔfa ebie nningyein patapaa so, ebie fa nikyee si ye berɛ awowaa a onza mva ye nikyee mma ye, ɔma ye ti so ɔfa ye nye kyire mmosoen mɔ, ɔbɔ akyiwadeɛ bra,

¹³ ɔbɔ bosea fa nzihoɛ si ye nwo, anaa ode bie boka so a, aso okonya ngoa anaa? Ongonya ngoa. Wabɔ sɔ akyiwadeɛ bra ne amukoraa; ewue yeɛ okowu ɔ, na ye bɔbɔ ye mogya kɔbɔ ye ti so.

¹⁴ “Nakoso sɛ sɔ baa ne wo baa, ná ye de onwu ye baba bɔne bɔ wayɔ amukoraa, ná osuro, ná wanyɔ sɔ bie,

¹⁵ ná onni mmokaa so asɔneyɛɛ so aleɛ, anaa ɔmma ye ti so mva ye nye ngyire Yisrael awuro ama bɛ mmosoen, anaa ɔne obiɛngo aye bɛnna,

¹⁶ onzisi ebie, ɔbɔ bosea a onne awowaa, ɔmva ebie nikyee patapaa so; na mmom ɔfa ye aleɛ ma bɔ ɛhɔen ku ye ɔ, ɔma bɔ ye nwo la so ɔ ɛtena,

¹⁷ onni ehiafoɛ aminɛ, ɔbɔ bosea a ɔmva nzihoɛ nzi ye nwo, anaa onne bie mmoka so; ná mmom odi me nhyehyɛleɛ ne m’ahyɛdeɛ so a, ye de, nna ye baba amumuyɛɛ ne ati yeɛ ɔbaamaa owu ɔ. Nahorɛ nu, okonya ngoa.

¹⁸ Na ye baba de, ɔnate kyɛ wali aminɛ, wafa obiɛngo nikyee patapaa so, wayɔ bɔ ɔtte mayee wɔ ye maen nu ne ati, tie, ɔnate ye amumuyɛɛ ti okowu.

¹⁹ “Nakoso ɛmɔ de, ɛmɔnwa: ‘Nzu ati yeɛ baa onnya ye baba amumuyɛɛ nwo asohwenɛ ɔ?’ Sɛ baa ne ayɔ bɔ ɔte paa ne bɔ ɔtengyɛ, ná wali m’ahyɛdeɛ mukoraa so nahorɛ nu a, nahorɛ nu, okonya ngoa.

²⁰ Ɛkra biala bɔ ɔyɔ bɔne ne, ye yeɛ okowu ɔ. Baa ngonya ye baba amumuyɛɛ nwo asohwenɛ, yeɛ baba ngonya ɔwa amumuyɛɛ nwo asohwenɛ. Sona bɔ ɔtengyɛ ne, okonya ye tengyɛlɛ nwo akatuaa, yeɛ bɔnefoɛ koso, okonya ye bɔne nwo akatuaa.

²¹ “Nakoso sɛ bɔnefoɛ twe ye nwo fi ye bɔne amukoraa bɔ wayɔ ɔ nwo, ná odi m’ahyɛdeɛ mukoraa so, ná ɔyɔ bɔ ɔte paa ne bɔ ɔtengyɛ a, nahorɛ nu, okonya ngoa, na ongowu.

²² Ye bɔne bɔ wayɔ amukoraa, mengobu ye nwo ngondaa mengogua ye so ko, na ɔnate tenenee bra bɔ wabɔ ne ati, okonya ngoa.

²³ Aso me nye gye bɔnefoɛ ye wue nwo anaa? AWURADE Nyameɛ noa dwirɛ ɛne. Aso me nye ngye kyɛ ɔkɔhwe ye nwo kofi ye yɔleɛ nwo ná okonya ngoa ɔ?

²⁴ Nakoso sɛ teneneeniɛ twe ye nwo fi ye tenenee nwo, ná ɔkɔbɔ amumuyɛɛ bra, ná ɔbɔ akyiwadeɛ bra mukoraa bɔ bɔnefoɛ bɛbɔ ne a, yiti okonya ngoa anaa? Ye tenenee bra bɔ wabɔ amukoraa, mengɔkaye. Na ɔnate ye nahorɛ bɔ wanni bɔ odi ye nwo foɛ, ɔne bɔne bɔ wayɔ ne ati, okowu.

²⁵ “Nakoso ɛmɔnwa: ‘AWURADE atee ndengyɛ.’ O Yisrael awuro ama, nzaade ɛ́mɔtie e: Aso m’atee ndengyɛ anaa? Aso nna ɛmɔ atee mmom yeɛ ɔndengyɛ ɔ?

²⁶ Sɛ teneneeniɛ twe ye nwo fi ye tenenee nwo ɔkɔbɔ amumuyɛɛ bra a, nu yeɛ okowu ɔ; na ɔnate amumuyɛɛ bra bɔ wabɔ ne ati, okowu.

²⁷ Nakoso sɛ bɔnefoɛ twe ye nwo fi ye bɔne bɔ wayɔ ɔ nwo ɔkɔyɔ bɔ ɔte paa ne bɔ ɔtengyɛ a, okole ye kra ngoa.

²⁸ Na ɔnate kyɛ wadwene ye nwo, ná wahwe ye nwo wafi ye mmeraatolɛ amukoraa bɔ wato nwo ne ati, nahorɛ nu, okonya ngoa, na ongowu.

²⁹ Nakoso Yisrael awuro ama nwa: ‘AWURADE atee ndengyɛ.’ O Yisrael awuro ama, aso m’atee ndengyɛ anaa? Aso nna ɛmɔ atee mmom yeɛ ɔndengyɛ ɔ?

³⁰ “Yiti Yisrael awuro ama, ngobua ɛmɔ nu biala ye atee bɔ ɔnate so ɔ nwo ndɛen, AWURADE Nyameɛ noa dwirɛ ɛne. Ɛ́mɔsakyera ɛmɔ adwene, ná ɛmɔhwe ɛmɔ nwo béfi ɛmɔ mmeraatolɛ amukoraa nwo, ná amumuyɛɛ wanyɛ ɛmɔ so sundidua.

³¹ Mmeraatolɛ amukoraa bɔ ɛmɔato ne, ɛ́mɔgyi ye mukoraa béfi ɛmɔ so bégua, ná ɛmɔnya adwene foforɛ ne sunzum foforɛ. O Yisrael awuro ama, nzu ati yeɛ odi kyɛ ɛmɔwuwu ɔ?

³² Ofikyɛ me nye ngye ebiala ye wue nwo, AWURADE Nyameɛ noa dwirɛ ɛne, yiti ɛ́mɔsakyera, ná ɛmɔnya ngoa.”