Hesekiel 17 - AHYERƐLƐ KRONGRON

Kɔleɛ nyɔ ne bobe nwo anyandera

¹ Na AWURADE lale ye dwirɛ ali hyirele me kyɛ,

² “Sona awa, kã Nana Nyameɛ nikyee bie bɔ ɔwɔ berɛ ɔ nwo dwirɛ, ná ka mvandoho dwirɛ kyire Yisraelfoɛ.

³ Kã kyɛ, AWURADE Nyameɛ nwa nyoo: Kɔleɛ kandinga bie, bɔ ole ndaa ngandinga ne ndɛkra ndendenn, bɔ ndɛkra woronworaen wɔ ye nwo amu ɔ ɔwale Lebanon. Obumane sida bakaa ne kɔme anu,

⁴ ɔpale ye mmaen bɔ ɔwɔ ye ti dɔ paa ne, ɔfa hɔle aseɛ bie bɔ bedi dwaa so ɔ so, na ooluale ye wɔ dwadifoɛ kuro bie aso.

⁵ Afei ɔfale aseɛ ne aso bakaa mmaa ne bie, na oluale ye wɔ aseɛ bɔ ɔkye aleɛ ɔ so maa opingyele nekaa bɔ nzue pee wɔ ɔ, kyɛ nzue noa bakaa bɔ walua ɔ.

⁶ Ofifili yɛle bobe bakaa, obuale bɔ wangɔ anwuro ɔ; ye mmaen nemɔ bɛtrɛtrɛle bɛhɔle kɔleɛ ne anwo, nakoso ye ndii nemɔ de, né bɛtɛwɔ bakaa ne abo. Yiti ɔyɛle bobe bakaa, onyane mmaen mɔ, na ɔfefɛle nyaa.

⁷ “Nakoso né kɔleɛ kandinga bieku koso wɔ berɛ, bɔ ole ndaa ngandinga ne ndɛkra pee ɔ. Na tie, bobe ne tengyɛle ye ndii ne anu fili nekaa bɔ beluale ye ne ɔhɔle kɔleɛ ne anwo berɛ; na ɔtrɛtrɛle ye mmaen nemɔ hɔle ye nwo berɛ, kyɛ kɔleɛ ne oguagua ye so nzue.

⁸ Oluale ye wɔ aseɛ paa so wɔ nzue pee noa, kyɛ óbua ná osu mmaa, ná ɔyɛ bobe bɔ ɔyɛ nyemene ɔ.

⁹ “Kã kyɛ, AWURADE Nyameɛ nwa nyoo: Aso bakaa ne kɔyɛ yee? Aso kɔleɛ ne ngotutu bakaa ne abo ndii ne ɔngɔma ye mma ne ngotwindwam ngɔsɛkye anaa? Aso ye nyaa bɔ wafefɛ ne, ɔngɔkese anaa? Na ongohia anwoserɛ piri biala anaa mmenia pee bɔ bɛkɔfa bekotutu ye ndii ne abo ɔ.

¹⁰ Tie, sɛ betu bɛtɛ a, aso ɔkɔyɛ yee? Sɛ eyia afiteleɛ mvrama bɔ ye a, aso ɔngɔkese ngowu anaa? Ɔkɔkese wɔ ngofie bɔ ofifili so nemɔ aso anaa?”

¹¹ Afei AWURADE lale ye dwirɛ ali bieku hyirele me kyɛ,

¹² “Bisa ɛlɔenyɛlɛ abusua ne kyɛ, Aso ɛmɔnde ɛhemɔ abo hɔ ɔ? Kã kyɛ, Ɛ́mɔtie, Babilɔn hene wale Yerusalem, ɔhyehyele nu hene ne nu atitire, na ɔsesale bɛ hɔle Babilɔn.

¹³ Ɔfale nnehyeɛ nemɔ nu ko ɔne ye bɛyɛle apam, na ɔmaa ɔtale ndaen foale so. (Né wahye aseɛ ne aso atitirefoɛ nnure wahɔ,

¹⁴ amaa ɔnate so wabrɛ maen ne ase bɔ ongodwɔso ko ɔ; na sɛ maen ne baahora gyina a, sana wali ye apam ne aso.)

¹⁵ Nakoso sɔ dehyeɛ ne yɛle ye nwo lɔen, na otuli ɛbɔfoɛ mɔ maa bɛhɔle Misraim, kyɛ Misraimfoɛ bɛma ye mbɔngɔ ne koɛhonɛfoɛ pee. Aso okoyie ye yé anaa? Sona bɔ ɔyɔ sɔ ne, aso ɔkɔfa ye nwo koli? Aso ɔkɔhora kobu apam ne aso ná wafa ye nwo wali anaa?

¹⁶ Na kyɛ nde ase ye de, nahorɛ nu, sɔ hene bɔ ɔfale ye siele bia so, bɔ wabu ye ndaen animtia, bɔ wasa wabu ɔne ye b’apam ne aso ne, ye nekaa bɔ ɔte bɔ ye ole Babilɔn ne, berɛ yeɛ okowu ɔ.

¹⁷ Sɛ Pɔfoɛ ne yɔ anweaa sire, ɔne nyinasoɛ bɔ bɛkɔfo so bɛkɔhɔ kuro ne anu, kyɛ bɛkwaahũhũ mmenia pee a, Faro koɛhonɛfoɛ anwoserɛfoɛ ne ye lɔen worawora ne, bɛngɔɔboka sɔ hene ne.

¹⁸ Ofikyɛ wabu ndaen ne animtia, yeɛ wabu apam ne aso. Ɔtale ndaen foale so, nakoso wayɔ sɔ nningyein nemɔ, yiti ongonya ye ti ngodidi nu.

¹⁹ Yiti AWURADE Nyameɛ nwa nyoo: Kyɛ nde ase ye, nahorɛ nu, me ndaen bɔ wabu ye animtia, ɔne m’apam bɔ wabu so ne, ngɔmaa ɔkɔbɔ ye ti so.

²⁰ Ngɔtrɛtrɛ m’asawu nu ngogua ye so, na me ngaen kɔhye ye, na ngɔfa ye ngɔhɔ Babilɔn. Ngɔɔhwe ye so wɔ dɔ, ɔnate me nwo lɔen bɔ wayɔ ne ati.

²¹ Ye koɛhonɛfoɛ bɔ bɛkɔnwati ne amukoraa, bɛkɔtotɔ ngrandɛ noa, na bɛ bɔ bekonya bɛ ti bekodidi nu ne, bɛkɔbɔ bɛ bɛkɔsande bɛkɔhɔ nekaa bɔ mvrama bɔ kɔ biala, amaa ɔnate so ɛmɔanwu kyɛ me, AWURADE, yeɛ mahã sɔ ɔ.”

²² AWURADE Nyameɛ nwa nyoo: “Me bɔbɔ ngobu sida bakaa ne ti anwuro dɔ paa mmaen ne ko ngoolua; ye ti dɔ paa mmaen lokoloko ne yeɛ ngɔpa ɔ. Na ngolua ye wɔ bokaa tendenn bɔ ɔkɔ anwuro ɔ so.

²³ Yisrael bokaa tendenn ne aso yeɛ ngolua ye ɔ. Ɔkɔyeye mmaen frɔmfrɔm ná wasu mmaa, na ɔkɔyɛ sida bakaa nyemenenyemene. Nnomaa mukoraa bɛkɔtenatena ye bo, na ye mmaen fɔnwoo ne anu yeɛ kaka biala bɔ ole ndaa ɔ ɔkɔnwo ye saen ɔ.

²⁴ Eburo mmakaa mukoraa bekonwu kyɛ me, AWURADE, me yeɛ mema bakaa tendenn yɛ tikaa, ná mesa mema bakaa tikaa yɛ tendenn ɔ; me yeɛ mema bakaa monɛ yɛ wuruwaa, ná mesa mema bakaa wuruwaa fefɛ ɔ. Me, AWURADE, me yeɛ mahã ɔ, na ngɔyɔ.”