Hesekiel 13 - AHYERƐLƐ KRONGRON

Ngondombo ngɔmhyɛlɛfoɛ nwo kɔkɔbɔlɛ

¹ Na AWURADE lale ye dwirɛ ali hyirele me kyɛ,

² “Sona awa, hyɛ ngɔm tia Yisrael ngɔmhyɛlɛfoɛ bɔ bɛhyɛ ngɔm ne, ná se bɛ bɔ bɛbɔ bɛ ti anu bɛhyɛ ngɔm ne kyɛ, ‘Ɛ́mɔtie AWURADE noa dwirɛ!’

³ AWURADE Nyameɛ nwa nyoo: Musue to ngɔmhyɛlɛfoɛ ngwaseafoɛ bɔ bɛ bɔbɔ bɛ sunzum diedie bɛ, wɔ aberɛ bɔ bennwuni huu ɔ!

⁴ O Yisrael, wɔ ngɔmhyɛlɛfoɛ nemɔ bayɛ kyɛ kurofoen so safuboa mɔ.

⁵ Ɛmɔ ahɔ a, ɛmɔamvo bangɔangyina fasue ne anu nekaa bɔ tokuro lela ne, yeɛ ɛmɔando fasue bamva Yisrael awuro ama nwo, amaa sɛ AWURADE kyẽa ne dwu a Yisrael wahora ye noa gyina.

⁶ Bɛ noa dwirɛ te nnakannaka, yeɛ bɛhyɛ ngondombo ngɔm. Bɛnwa: ‘AWURADE nwa nyoo,’ wɔ aberɛ bɔ nna AWURADE yeɛ wasoma bɛ ɔ; nakoso bɛ nye la so kyɛ AWURADE kɔma bɛ dwirɛ ne kɔwa nu ɔ.

⁷ Na sɛ ɛmɔkã kyɛ, ‘AWURADE nwa nyoo,’ wɔ aberɛ bɔ nngane huu a, aso nna nyekyire mbaen mbaen yeɛ ɛmɔanwu ye ɔ, ɔne ngondombo ngɔm yeɛ ɛmɔahyɛ ɔ?”

⁸ Ye sɔ ne ati, AWURADE Nyameɛ nwa nyoo, “Ɔnate ɛmɔ dwirɛ mbaen mbaen kekanɛ ɔne ɛmɔ ngondombo nyekyire ne ati, ɛ́mɔtie, meko metia ɛmɔ, AWURADE Nyameɛ noa dwirɛ ɛne.

⁹ Me tumi kɔho kotia ngɔmhyɛlɛfoɛ bɔ bɛbɔ bɛ sɔ nu benwu nyekyire, ná bɛhyɛ ngondombo ngɔm ɔ. Bɛngɔboka me maen badwa ne aso, bɛngɔha bɛ ngɔfra Yisrael awuro ama so, yeɛ bɛ gya baa ngotia Yisrael aseɛ so, amaa ɔnate so ɛmɔanwu kyɛ me ole AWURADE Nyameɛ.

¹⁰ Na ɔnate kyɛ bɛlakalaka me maen bɛkã kyɛ, ‘Asomdwee,’ wɔ aberɛ bɔ asomdwee nne berɛ ɔ; yeɛ sɛ maen ne to fasue a, sɔ ngɔmhyɛlɛfoɛ nemɔ bɛfa ewure bɛkã ye nwo ne ati,

¹¹ kã kyire bɛ bɔ bɛfa ewure bɛkã ye nwo ne kyɛ: Fasue ne kodwiri kogua. Esue piri kɔtɔ, asukɔtwea kungumaboɔ kɔtɔ kogua, yeɛ mvrama piri kotu.

¹² Na sɛ fasue ne dwiri gua a, aso mmenia ngobisa ɛmɔ kyɛ, ‘Ye nwo bɔ ɛmɔfale ewure bɛhane ne, ɔwɔ ni?’

¹³ Yiti AWURADE Nyameɛ nwa nyoo: M’ahone kohu maa ngɔma mvrama piri kotu; yeɛ ngɔfɛ yaa ngɔma esue piri kɔtɔ, na m’ahone kohu maa asukɔtwea kungumaboɔ mbiri mbiri kɔsɛkye ye.

¹⁴ Fasue bɔ ɛmɔafa ewure bahã ye nwo ne, ngodwiri ye ngogua ase maa ye fapem ne nwo kɔla berɛ. Okobubu kogua maa ɛmɔkowuwu wɔ nu, na ɛmɔkonwu kyɛ me ole AWURADE.

¹⁵ Fasue ne, yeɛ mmenia bɔ bahã ye nwo ewure ne, sɔ yeɛ me yaafɛlɛ ne kɔyɔ bɛ nwo adwuma koyie ɔ. Na ngose ɛmɔ kyɛ, Fasue ne nne berɛ ko, yeɛ bɛ bɔ bɛhane ye nwo ewure ne koso bɛnne berɛ ko,

¹⁶ mekyire Yisrael ngɔmhyɛlɛfoɛ bɔ bɛhyɛ Yerusalem nwo ngɔm, kyɛ banya ye nwo asomdwee nyekyire, wɔ aberɛ bɔ asomdwee biala nne berɛ ɔ, AWURADE Nyameɛ noa dwirɛ ɛne.

Ngondombo ngɔmhyɛlɛfoɛ mmrasua

¹⁷ “Na wɔ, Sona awa, wɔ maen ne anu mmrasua bɔ bɛbɔ bɛ ti anu bɛhyɛ ngɔm ne, tu wɔ nye sie bɛ so, ná hyɛ ngɔm tia bɛ kyɛ,

¹⁸ AWURADE Nyameɛ nwa nyoo: Musue kɔto ɛmɔ! Mmrasua bɔ bɛnwo ngonyaa nzɛbɛ begua mmenia sa kɔm amukoraa, ɔne eduku bɔ bɛpomba bɛma mmenia ti ahoroɔ amukoraa, bɔ ɔnate so bediedie mmenia kra bɛkɔ bɔne nu ɔ! Ɛmɔsua ngaen bɛkye me maen mmaa bɛ kra, bɔ ɛmɔ bɔbɔ bɛ deɛ de, ɛmɔpena kyɛ onya ngoa ɔ?

¹⁹ Ɔnate ayuo bɛ sa bum kãa bie, ɔne paanoo bue kãa bie ti, ɛmɔagua me nwo fiɛ wɔ me maen nyunu. Ɛmɔlakalaka me maen bɔ okuro nnakannaka tielɛ, na ɔnate so ɛmɔku mmenia bɔ bɛmvata ewue, yeɛ ɛmɔyakyi bɛ bɔ bɛfata ewue ɔ.

²⁰ Ye sɔ ne ati, AWURADE Nyameɛ nwa nyoo: Ɛ́mɔtie, ɛmɔ ngonyaa nzɛbɛ bɔ ɛmɔfa bediedie mmenia kra bɛkye bɛ kyɛ nnomaa ne, mekyi, na ngɔtete ngofi ɛmɔ sa. Na mmenia kra bɔ ɛmɔdiedie bɛ bɛkye ne, ngɔsangye bɛ maa bekotu bɛkɔhɔ kyɛ nnomaa.

²¹ Ngɔtete ɛmɔ duku ne anu, ná mapepɛ male me mmenia mafi ɛmɔ sa nu, na bɛngɔyɛ kyɛ naen bɔ ɛmɔahye bɛ ɔ wɔ ɛmɔ sa nu, amaa ɔnate so ɛmɔanwu kyɛ me ole AWURADE.

²² Ɛmɔafa ɛmɔ nnakannaka ne bama teneneefoɛ bɛ wora abɔ, ɔwɔ nu kyɛ me de mmvale aworabɔlɛ nndole bɛ so. Ɛmɔsi bɔnefoɛ adua, kyɛbɔ ɔkɔyɛ bɔ ɔngɔhwe ye nwo ngofi ye bɔne atee so ngonya ngoa ɔ.

²³ Ye sɔ ne ati, ɛmɔngonwu ngondombo nyekyire ko, yeɛ ɛmɔngɔhyɛ ngɔm ko. Na ngole me mmenia ngofi ɛmɔ sa nu, amaa ɔnate so ɛmɔanwu kyɛ me ole AWURADE.”