Hesekiel 12 - AHYERƐLƐ KRONGRON

Yuda nnurehyelɛ nwo mvonini

¹ AWURADE lale ye dwirɛ ali hyirele me bieku kyɛ,

² “Sona awa, abusua bɔ bayɛ lɔen ɔ yeɛ ɛte bɛ nu ɔ. Bɛte mmenia bɔ bele anyeɛ bɔ odi kyɛ onwu nikye, nakoso bennwu nikye; bele asoɛ bɔ odi kyɛ ɔte dwirɛ, nakoso bɛnde dwirɛ, ofikyɛ bɛte ɛlɔenyɛlɛ abusua.

³ Yiti wɔ, sona wa, bɔ wɔ nningyein borɛ kyɛ sona bɔ bahye ye nnure ɔ, tu fi berɛ kɔ eyia bɔ bɛ nye tua ɔ; yɛ kyɛ sona bɔ bahye wɔ nnure ɔ, ná tu fi nekaa bɔ ɛte ne kɔ nekaa foforɛ bɔ bɛ nye tua ɔ. Bɛte abusua bɔ bayɛ lɔen ɔ, nakoso ebiaa bɛkɔte ye bo.

⁴ Ye wɔ nningyein borɛ ne fite eyia kyɛ sona bɔ bahye ye nnure ɔ ye deɛ, bɔ bɛ nye tua ɔ. Tu fi berɛ kɔ nɔsoa, bɔ bɛ nye tua ɔ, kyɛbɔ mmenia bɔ bɛsesa bɛ bɛkɔ nnurehyelɛ nu ne bɛyɔ ne ala.

⁵ Bɔngye fasue ne anu bɔ bɛ nye tua ɔ, ná fa nu fite.

⁶ Ma borɛ ne aso to wɔ kɔme anwo bɔ bɛ nye tua ɔ, na aleɛ sa a, fa fite si nu kɔ. Fa nikyee mundu wɔ nyunu bɔ engonwu aseɛ ne ɔ, ofikyɛ mafa wɔ mayɛ sɛngyerɛnneɛ mama Yisrael awuro ama.”

⁷ Yeɛ nyɔle kyɛbɔ ɔhyɛle me kyɛ nyɔ ne ala. Me nningyein borɛ bɔ ɔte kyɛ sona bɔ ɔkɔ nnurehyelɛ nu deɛ ne, nye mvitele eyia. Na odwuli nɔsoa ne, mvale me sa mmɔngyele fasue ne anu. Na me nningyein borɛ ne, mva ndole me kɔme anwo nzili nu mvale awosii nu ngɔle, bɔ né bɛ nye tua ɔ.

⁸ Na ɔwale kyɛ, AWURADE lale ye dwirɛ ali hyirele me ngyerɛmɔ kyɛ,

⁹ “Sona awa, Yisrael awuro ama bɔ bɛte ɛlɔenyɛlɛ abusua ne, aso bammisa wɔ kyɛ, ‘Nzikyɛ yeɛ ɛ́yɔ e?’

¹⁰ Kã kyire bɛ kyɛ, ‘AWURADE Nyameɛ nwa: Sɔ dwirɛ ne, ɔfa panyi bɔ ɔla Yerusalem noa nwo, ɔne Yisrael awuro ama amukoraa bɔ bɛwɔ kuro ne anu ɔ bɛ nwo.’

¹¹ Kã kyɛ, ‘Nde sɛngyerɛnneɛ ma ɛmɔ, na bɔ nyɔle ne, sɔ ala yeɛ bɛkɔfa bɛkɔyɛ bɛ ɔ. Bɛkɔhye bɛ nnure bɛkɔsesa bɛ bɛkɔhɔ.’

¹² Na panyi bɔ ɔla bɛ noa ne, ɔkɔma ye nningyein borɛ so kɔto ye kɔme anwo awosii nu, ná wasi nu wahɔ. Bɛkɔbɔngye fasue ne anu, ná bafa nu bahɔ. Ɔkɔfa nikyee komundu ye nyunu, amaa ɔnate so wamva ye nye wannwu aseɛ ne.

¹³ Ngɔtrɛtrɛ m’asawu nu ngogua ye so, na me ngaen kɔhye ye, na ngɔfa ye ngɔhɔ Babilɔn bɔ ɔwɔ Kaldeafoɛ b’aseɛ so ɔ. Nakoso ongonwu ye, na dɔ yeɛ okowu ɔ.

¹⁴ Na mmenia mukoraa bɔ bapɛ ye nwo bayia bɔ bɛbɔ ye nwo waen, yeɛ ye koɛhonɛfoɛ amukoraa, ngɔbɔ bɛ ngɔsande nekaa bɔ mvrama bɔ kɔ biala, na ngɔhwe ngrandɛ ne ngɔfa ngɔfoa bɛ.

¹⁵ Na sɛ mebɔ bɛ mesande maa bɛkɔ maen maen nemɔ nu, ná meto bɛ mepete aseɛ nemɔ aso a, ye de bekonwu kyɛ me ole AWURADE.

¹⁶ Nakoso ngɔma bɛ nu kãa bie konya bɛ ti bekodidi nu bekofi ngrandɛ ne noa, kofi ɛhɔen ne ewue anwonyerɛ nu, amaa ɔnate so bato bɛ noa nu tui bahã b’akyiwadeɛ yɔleɛ amukoraa wɔ maen maen bɔ bɛkɔhɔ so nemɔ anu, na bekonwu kyɛ me ole AWURADE.”

¹⁷ Na AWURADE lale ye dwirɛ ali bieku hyirele me kyɛ,

¹⁸ “Sona awa, fa anwowosolɛ di w’aleɛ, ná fa ɛserɛ ne ahunundetelɛ no wɔ nzue;

¹⁹ ná se aseɛ ne aso ama kyɛ, ‘Yerusalemfoɛ bɔ bɛwɔ Yisrael aseɛ so ne, bɔ AWURADE Nyameɛ kã fa bɛ nwo ɛhe: Bɛkɔfa ahunundetelɛ bekoli b’aleɛ, ná bafa aworabɔlɛ bano bɛ nzue, ofikyɛ bɔ ɔwɔ b’aseɛ ne aso amukoraa kofi so, ɔnate so ama amukoraa b’amumuyɛɛ ne ati.

²⁰ Nguro bɔ bɛtete so nemɔ kɔbɔ, aseɛ ne kɔkakyi kurofoen, na ɛmɔkonwu kyɛ me ole AWURADE.”

Nyameɛ noa dwirɛ ba nu

²¹ Na ɔwale kyɛ, AWURADE lale ye dwirɛ ali hyirele me kyɛ,

²² “Sona awa, anyandera he bɔ ɛmɔbu bɛfa Yisrael aseɛ nwo kyɛ, ‘Moa moa ala yeɛ ngyẽa ne ɔkɔ ɔ, nakoso nyekyire biala ɔmma nu’ ne, ye bo ole sɛɛ?

²³ Yiti kã kyire bɛ kyɛ, ‘AWURADE Nyameɛ nwa: Ngɔma sɔ anyandera he bo kɔpɛ, na bengobu sɔ anyandera ne ko wɔ Yisrael.’ Na mmom kã kyire bɛ kyɛ, ‘Ngyẽa ne apingye, na nyekyire biala kɔwa nu.

²⁴ Ofikyɛ ngondombo nyekyire ne nnakannaka ngɔmhyɛlɛ ngɔtena Yisrael awuro ama mɔ bɛ nu ko.

²⁵ Ofikyɛ me ole AWURADE: ngodwudwo, na edwirɛ bɔ ngɔhã ne yeɛ ɔkɔwa nu ɔ. Mengɔtwetwe me gya ase wɔ edwirɛ ne anwo. Ofikyɛ, ɛlɔenyɛlɛ abusua, ɛmɔ aberɛ so, ngɔhã edwirɛ ne, na ngɔyɔ, AWURADE Nyameɛ noa dwirɛ ɛne.”

²⁶ Na AWURADE lale ye dwirɛ ali hyirele me bieku kyɛ,

²⁷ “Sona awa, tie, Yisrael awuro ama mɔ bɛnwa: ‘Nyekyire bɔ onya ye ne, ɔkɔhyɛ paa koraka né wawa nu; yeɛ mmerɛ bɔ ɔwɔ moa moa nwo ngɔm yeɛ ɔhyɛ ɔ.’

²⁸ Ɔnate sɔ ne ati, se bɛ kyɛ, ‘AWURADE Nyameɛ nwa nyoo: Mengɔtwetwe me gya ase wɔ me noa dwirɛ biala nwo ko, na mmom edwirɛ bɔ mahã ne, ɔkɔwa nu, AWURADE Nyameɛ noa dwirɛ ɛne.”