Hesekiel 10 - AHYERƐLƐ KRONGRON

Nyameɛ animnyam tu fi asɔneyɛɛ sua ne anu

¹ Afei nneane, na nwuni nikyee bie bɔ osoma ahennie bia, bɔ osoma kyɛ bafa safire nyɔboɛ bayɔ ɔ, kyɛ ɔwɔ nikyee tɛtrɛtɛɛ bɔ ɔwɔ kɛrubim nemɔ anwuro ne aso.

² Na osele biaa bɔ ɔhera nwera ne kyɛ, “Kango mɔ bɔ bɛwɔ kɛrubim nemɔ abo ne, kɔworo b’afia; fura see gonn bɔ ɔwɔ kɛrubim nemɔ b’afia ne, ná to pete kuro ne aso.” Na ɔworole nu bɔ me nye tua ɔ.

³ Né kɛrubim nemɔ begyigyi awuro ne ngwaen wɔ mmerɛ bɔ biaa ne worole nu ne, na munungum yili awuro ne akunu berɛ tɛkyɛ.

⁴ Yeɛ AWURADE animnyam ne mane ye nwo so fili kɛrubim nemɔ aso hɔle awuro ne anoa nu dɔ, munungum ne yili awuro berɛ tɛkyɛ, na AWURADE animnyam ne yili aluo berɛ tɛkyɛ mane berɛ tale hyireinn.

⁵ Na dede bɔ kɛrubim nemɔ bɛ ndaa ne yɔle ne, né ɛte alaa kodwu bondua dɔ, bɔ ɔte kyɛ Tuminiɛ Nyameɛ ye komvi bɔ odwudwo ɔ.

⁶ Na ɔwale kyɛ, ɔfale ahyɛdeɛ mane biaa bɔ ɔhera nwera ne kyɛ, “Fa see fi kango mɔ bɔ bɛpɛ bɛ nwo nemɔ b’afia, wɔ kɛrubim nemɔ b’afia” nen, ɔworole nu oogyinane kango ne anwo berɛ.

⁷ Na kɛrubo ne ko tengyɛle ye sa fili kɛrubim nemɔ b’afia hɔle see bɔ ɔwɔ kɛrubim nemɔ b’afia ne anwo. Ɔfale see ne bie, na ɔfa guale biaa bɔ ɔhera nwera ne sa nu. Biaa ne lele, na ofitele.

⁸ Né nikyee bie bɔ ye sue te kyɛ sona sa ɔ ɔwɔ kɛrubim nemɔ bɛ ndaa ne abo.

⁹ Nneane, na nwuni kyɛ kango nna bɛwɔ kɛrubim nemɔ nwo berɛ, ko biala wɔ kɛrubo ko nwo, na né kango nemɔ bɛta hyɛmhyɛm kyɛ nyɔbosanyene.

¹⁰ Na bɛ mmɛnna ne, né bɛ sue te pɛ, bɔ ɔte kyɛbɔ kango ko wura kango ko anu ɔ.

¹¹ Sɛ bɛnate a, bɛfa bɛ bue nna ne yeɛ bɛnate ɔ; na bɛkɔ a, bɛngakyikakyi bɛ nwo. Na nekaa biala bɔ bɛ ti ne ɔnea ne, bɛkɔ berɛ tee, bɔ bɛkɔ a bɛngakyikakyi bɛ nwo ɔ.

¹² Na bɛ mumua ne, bɛ sĩ, bɛ sa, bɛ ndaa ne bɛ kango nemɔ nwo ne, né anyeɛ tuatua bɛ nwo frefrɛɛ. Né bɛ mmɛnna bele kango mɔ.

¹³ Na kango nemɔ, ndele kyɛ bɛtole bɛ dumaa kyɛ, “Mvrama bɔ ɔpɛ ye nwo ɔ kango.”

¹⁴ Né ko biala ye nyunu te nna: bɔ oli moa ne te kɛrubo nyunu, bɔ ɔtɔ so nyɔ ne te sona nyunu, bɔ ɔtɔ so nza ne te gyata nyunu, yeɛ bɔ ɔtɔ so nna ne te kɔleɛ nyunu.

¹⁵ Afei kɛrubim nemɔ pagyapagyale bɛ nwo so. Ɛhemɔ yeɛ nwuni bɛ wɔ asue Kebare noa ne.

¹⁶ Sɛ kɛrubim nemɔ bɛkɔ a, né kango nemɔ koso beli bɛ ngyɛnu bɛkɔ. Yeɛ sɛ kɛrubim nemɔ bɛmoma bɛ ndaa so kyɛ bɛpagya bɛ nwo befi aseɛ so a, kango nemɔ bɛmbɛne bɛ nwo wɔ bɛ ngyɛnu.

¹⁷ Sɛ kɛrubim nemɔ begyina a, né kango nemɔ koso bagyina; yeɛ sɛ bɛpagya bɛ nwo so a, né bɛ koso bapagya bɛ nwo so baboka bɛ so, ofikyɛ abɔdeɛ teasefoɛ ne sunzum wura bɛ nu.

¹⁸ Yeɛ AWURADE animnyam ne fili awuro n’anoa nu berɛ oogyinane kɛrubim nemɔ so anwuro.

¹⁹ Yeɛ kɛrubim nemɔ momane bɛ ndaa so, na bɛpagyale bɛ nwo so befili aseɛ so bɛhɔle bɔ me nye tua ɔ. Na bɛkɔ ne, né kango nemɔ wɔ bɛ ngyɛnu, na beegyinane AWURADE awuro berɛ eyia afiteleɛ pambim ne anoa nu; na né Yisrael Nyameɛ animnyam ne ɔwɔ bɛ so anwuro.

²⁰ Sɔ abɔdeɛ teasefoɛ nemɔ, bɛ yeɛ nwuni bɛ wɔ Yisrael Nyameɛ ye bo wɔ asue Kebare noa ne, na nwuni kyɛ bɛte kɛrubim.

²¹ Ko biala ye nyunu te nna, yeɛ ebiala ye ndaa te nna, na sona sa ye sɛso wɔ bɛ ndaa nemɔ abo.

²² Na bɛ nyunu sue ne, bɛte kyɛ nyunuɛ mɔ bɔ nwuni bɛ asue Kebare noa ne pɛpɛɛpɛ. Bɛ nu biala hɔle ye nyunu tee.