Hebrifoɛ 9 - AHYERƐLƐ KRONGRON

Apam daa ne anu afɔleɛ

¹ Na afei, né apam bɔ oli moa ne le ɛsɔnenɛ nwo nhyehyɛleɛ, ɔne aseɛ he aso nekaa krongron bɔ bɛsɔne ɔ.

² Ɔnate kyɛ, besili ɛtena sua; bɔ bedi moa befite so ne bɛfrɛ ye Nekaa Krongron. Né kanea bakaa, ɛpoen ne paanoo krongron wɔ sɔ pumbu ne anu.

³ Né ɛtena sua bɔ bɛfrɛ ye Krongron nu Krongron wɔ mbɛmuɛ tena bɔ ɔtɔ so nyɔ ne asi.

⁴ Né sɔ nningyein hemɔ wɔ nu: esikaa kɔkorɛ afɔleɛ bokyea bɔ bɛyera ɛyɛɛ so, apam alaka bɔ bafa sikaa kɔkorɛ baboro ye nwo amu ɔ, sikaa kɔkorɛ kutusi bɔ mana wɔ nu ɔ, Aarɔn pɔmaa bɔ ɔfefɛle ne, ɔne nyɔboɛ nyɔ bɔ bahyerɛ apam ne bagua so ne.

⁵ Né animnyam kɛrubim mɔ batrɛtrɛ bɛ ndaa nu wɔ mbata bia ne aso wɔ alaka ne aso. Nakoso kekesaala ye de, yɛngɔhora yɛngɔhã sɔ nningyein hemɔ nwo dwirɛ ngoko ngoko.

⁶ Kyɛ bahyehyɛ berɛ nningyein hɔ ɛne, na asɔfo nemɔ kɔ ɛtena sua bɔ oli moa ne anu ɛlɛho biala bɛkɔyɔ b’adwuma.

⁷ Nakoso bɔ ɔtɔ so nyɔ ne anu de, ɔsɔfo panyi paa ne ngome yeɛ afoɛnoa biala ɔkɔ berɛ komapɛ twe ɔ; na ɔfa kaka mogya kɔbɔ ye bɔbɔ, ɔne maen ne amu bɛ bɔne nwo afɔleɛ.

⁸ Na Sunzum Krongron kyire nu pefee kyɛ, mmerɛ bɔ né ɛtena sua ne tɛwɔ berɛ ne de, né bennya bebbukyele atee bɔ bɛfa so bɛkɔ krongron nu krongron ne anu ɔ.

⁹ Na ɛhe te mvandoho ma ɛnɛ mmerɛ ye, bɔ mmenia fa ayɛyɛdeɛ ne afɔleɛ bɛma, nakoso ɔngora mma sona bɔ ɔsɔne Nyameɛ ne tiboa mmua ye be.

¹⁰ Ofikyɛ ɔfa aleɛ, anonneɛ, ɔne bɛ nwo petenɛ ahoroɔ ngome nwo; na ɛhemɔ te anwoɔnaen nu nziesie bɔ ɔwɔ berɛ kodwu mmerɛ bɔ Nyameɛ kɔhyehyɛ nikyee biala foforɛ ɔ.

Kristo afɔleɛ ne di mu

¹¹ Nakoso Kristo de, wawa kyɛ nningyein paa bɔ ɔbaawa ne nwo sɔfo panyi paa, na wafa ɛtena sua bɔ ɔte titire na odi mu tra so ɔ nu. Ɛhe de, nna kuro sona yeɛ osili ɔ, yeɛ ɔbboka ewiase abɔdeɛ so koso,

¹² na wawura Krongron nu Krongron ne anu berɛ komapɛ. Wamva mbɔngye ne nandwie mmaa mogya yeɛ ɔɔbɔle afɔleɛ ɔ, na mmom ye bɔbɔ ye mogya yeɛ ɔfa bɔle afɔleɛ nyane daa ngoa mane yɛ ɔ.

¹³ Na sɛ nandwie nyii mogya ne mbɔngye mogya ne nandwie ba nzoen bɔ bɛfa bɛpete mmenia bɔ efiɛ aha bɛ nwo ne, ɔkora ma bɛ nwo te anwoɔnaen nu de a,

¹⁴ nzaade Kristo bɔ ɔnate Sunzum bɔ ɔwɔ berɛ afebɔɔ ne aso fale ye nwo bɔle afɔleɛ bɔ ngekalewa biala nne ye nwo mane Nyameɛ nen, ɔkɔyɛ sɛɛ bɔ ye mogya ngɔte yɛ tiboa nwo ngofi yɔleɛ mbaen mbaen nwo ma yɛngɔso Nyameɛ teasefoɛ ne ɔ?

Kristo te yɛ ndamgyinaniɛ

¹⁵ Ye sɔ ne ati, Yesu te apam foforɛ ne anu ndamgyinaniɛ. Ɔnate kyɛ, ɔfale ye wue bɔ owuli ne yele adasa fili bɛ bɔne bɔ bɛyɔle ye wɔ apam bɔ oli moa ne anu; amaa bɛ bɔ Nyameɛ afrɛ bɛ ne banya agyapadeɛ afebɔɔ bɔhyɛ ne.

¹⁶ Sɛ ebie yɔ nzamanzeɛ a, sana benwu ye pefee kyɛ sona bɔ ɔyɔle ne wawu;

¹⁷ ofikyɛ sɛ sona bɔ ɔyɔle sɔ nzamanzeɛ ne tɛte ase de a, ye de nzamanzeɛ ne nyɔ adwuma, sana owu koraka.

¹⁸ Na ɔnate ɛhe ati yeɛ apam bɔ oli moa ne po anyɛ adwuma kɔpem kyɛ bɛfale mogya bɛbɔle ye atenaseɛ ɔ.

¹⁹ Ofikyɛ, mmerɛ bɔ Mose kengale ahyɛdeɛ bɔ ɔwɔ mmeraa ne anu hyirele maen ne amukoraa yiele nen, ɔfale nandwie mmaa ne mbɔngye mogya frale nzue, na ɔfale sufiɛ ne adaabene bɔle nu fa petene mmeraa nwomaa ne, ɔne mmenia ne amukoraa bɛ so.

²⁰ Na ɔhane kyɛ, “Ɛhe te mogya bɔ osi apam bɔ Nyameɛ ahyehyɛ ama ɛmɔ ne agyinayɛɛ ɔ.”

²¹ Sɔ ala koso yeɛ ɔfale mogya ne petene ɛtena sua ne, ɔne nningyein mukoraa bɔ bɛfa bɛsɔne Nyameɛ nwo ɔ.

²² Na kyɛbɔ mmeraa ne kyire ne, ɔpena yɛ kyɛ mogya yeɛ bɛfa bɛte nningyein amukoraa nwo ɔ, na sɛ mogya angua a, bɔnefakyɛ nne berɛ.

Kristo afɔleɛ ne kyikyi bɔne biala

²³ Nzaade, nningyein bɔ bɛte nyameɛso deɛ ne nwo nhwɛsoɛ ne, né ohia kyɛ bɛte bɛ nwo wɔ atee sɔa so; nakoso nyameɛso deɛ nemɔ de, afɔleɛ bɔ odi mu tra so yeɛ bɛfa bɛte bɛ nwo ɔ.

²⁴ Ɔnate kyɛ, Kristo anwura nekaa krongron bɔ kuro sona sili, ná osa te nyameɛso deɛ paa ne nwo nhwɛsoɛ ne anu; na mmom wahɔ nyameɛso berɛ deinn, na kekesaala ye odi yɛ ti dwirɛ ma yɛ wɔ Nyameɛ nyunu.

²⁵ Nakoso Kristo de, wangɔ berɛ kyɛ ɔkwaafa ye nwo bɔ afɔleɛ mmerɛ pee, kyɛbɔ ɔsɔfo panyi paa ne de afoɛnoa biala ɔfa mogya bɔ nna ye deɛ ahɔ ɔkɔ Krongron nu Krongron ne anu nen.

²⁶ Na sɛ ɔtte sɔ de a, ahaa ɔsɛ kyɛ Kristo taa nwu amaneɛ fite kyɛ Ɛdangama bɔle aleɛ ɔ. Nakoso waye ye nwo ali komapɛ wɔ mmerɛ bɔ ewiase kɔ ye ayieleɛ ye, na wafa ye bɔbɔ ye nwo wabɔ afɔleɛ wakyikyi bɔne.

²⁷ Na kyɛbɔ ɔsɛ kyɛ kuro sona wu komapɛ twe na ye si ye Nyameɛ bua ye ndɛen nen,

²⁸ sɔ ala yeɛ Kristo bɔ bɛfale ye bɛbɔle afɔleɛ komapɛ kyɛ ɔsoa mmeni pee bɛ bɔne ne, okosa kɔwa ye pɛen so ɔ; ɔmmangyikyi bɔne, na mmom ɔbaale bɛ bɔ bɛ́nea ye ate nemɔ ngoa.