Hebrifoɛ 7 - AHYERƐLƐ KRONGRON

Ɔsɔfo Mɛlkisɛdɛke

¹ Sɔ Mɛlkisɛdɛke ne, ɔte Salem hene, na osa te Anwuro Anwuro Nyameɛ ne ye sɔfo. Mmerɛ bɔ Abraham fi koɛ bɔ oohuhuni ɛhene biemɔ na osa ba nen, Mɛlkisɛdɛke ooyiale ye, na oyirale ye;

² na Abraham buli ye nningyein mukoraa nu buru tuli ko mane ye. Sɔ Mɛlkisɛdɛke he dumaa ne bo kyire “Tenenee hene,” yeɛ ɔnate kyɛ ɔte Salem hene ne ati, ye bo sa kyire “asomdwee hene.”

³ Olle niɛ, olle seɛ, olle abusua biala, ye ngyẽa olle ahyɛaseɛ, yeɛ ye ngoa koso olle ayieleɛ. Ɔte kyɛ Nyameɛ Awa ne, na ɔte sɔfo afebɔɔ.

Mɛlkisɛdɛke tra Abraham

⁴ Ɛ́mɔnea kyɛbɔ ye sona titire si te ɔ! Abraham bɔ ɔte yɛ nana ne po, koɛ nu nzesadeɛ bɔ onyane ye ne, ɔmane ye buru nu ngyɛmuɛ ko.

⁵ Né Lewi abusua bɔ betira asɔfo dwumadie ne anu ne, bele ahyɛdeɛ wɔ mmeraa ne anu kyɛ béle buru nu ngyɛmuɛ ko befi b’eliɛma mɔ Yisraelfoɛ berɛ, wɔ aberɛ bɔ bɛ koso bɛte Abraham bosofoɛ kyɛ bɛ ala ɔ.

⁶ Na biaa bɔ ye abusua ɔtte bɛ deɛ ne bie ne, olele buru nu ngyɛmuɛ ko fili Abraham berɛ, na osa yirale bɔ né bɔhyɛ ne te ye deɛ ne.

⁷ Na aporowaa biala nne ye nwo kyɛ bɔ odi mu ne yeɛ oyira bɔ ɔte kãa ɔ.

⁸ Na ɛwa, mmenia bɔ bewu ɔ yeɛ bede buru nu ngyɛmuɛ ko ne ɔ; nakoso dɔ de, bɔ bedi ye nwo adanzeɛ kyɛ ɔte ase ne yeɛ ode ɔ.

⁹ Na yɛkɔhora yɛkɔhã kyɛ, Lewi bɔbɔ po bɔ ode buru nu ngyɛmuɛ ko ne, ye koso ɔfale Abraham so tuale buru nu ngyɛmuɛ ko ne bie;

¹⁰ ofikyɛ, né bennya bɛwwole ye de, nakoso né ɔwɔ ye nana Abraham mogya nu wɔ mmerɛ bɔ Mɛlkisɛdɛke yiale Abraham ne.

¹¹ Ɔnate Lewi abusua kure asɔfo dwumadie ne aso yeɛ maen ne nyane mmeraa ne ɔ. Na sɛ bɛ dwumadie bɔ ɔte kyɛ Aarɔn deɛ ne lili mu a, ahaa bɛ nu bie yeɛ bɛyele ye maa ɔyɛle sɔfo ɔ. Nzaade ahaa ye nwo nhia kyɛ ɔsɔfo foforɛ bieku kɔɔyɛ kyɛ Mɛlkisɛdɛke deɛ ne ɔ.

¹² Ɔnate kyɛ, sɛ bɛsesã asɔfolilɛ nwo nhyehyɛleɛ ne a, né ohia kyɛ bɛsesa mmeraa ne koso.

¹³ Sona bɔ sɔ dwirɛ he fa ye nwo ne, ofi abusua kure foforɛ nu, yeɛ ye abusuaniɛ biala koso ɔyyɔle afɔleɛ bokyea nwo adwuma le.

¹⁴ Na ebiala se ye pefee kyɛ y’Awurade fi Yuda abusua nu; yeɛ Mose koso ammɔ sɔ abusua kure he dumaa wammata sɔfolilɛ nwo.

Mɛlkisɛdɛke sɛso sɔfo

¹⁵ Bɔ ɔma edwirɛ ne nye la berɛ pefee ole kyɛ, ɔsɔfo foforɛ adwɔso bɔ ye sɛso te kyɛ Mɛlkisɛdɛke ɔ.

¹⁶ Nna kuro sona abusua nu nhyehyɛleɛ ne ye mmeraa so yeɛ bɛfa bɛyele ye ɔ; na mmom ɔnate ngoa bɔ ye bo ngɔpɛ le tumi so yeɛ ɔyɛle sɔfo ɔ.

¹⁷ Ofikyɛ odi ye nwo adanzeɛ kyɛ, “Ɛte sɔfo afebɔɔ, kyɛ Mɛlkisɛdɛke deɛ ne ala.”

¹⁸ Atee ko aso de, batu daa nhyehyɛleɛ ne bagua; ɔtɔ sii, yeɛ mvasoɛ koso nne so

¹⁹ ofikyɛ mmeraa ne amma nikyee biala anni mu. Nakoso atee foforɛ so de, anyelasoɛ bɔ ɔte paa tra daa deɛ ne wɔ berɛ, bɔ yɛfa so yɛpingye Nyameɛ ɔ.

²⁰ Ɛhe deɛ ne de, Nyameɛ angwati ndaen yeɛ ɔyɔle ɔ, nakoso asɔfo hene mɔ deɛ de, wamva ndaen wamvoa so,

²¹ na mmom ɛhe deɛ de, ɔtale ndaen hane kyɛ yoo: “Awurade ata ndaen, na ɔngɔkakyi ye adwene le, kyɛ, ‘Ɛte sɔfo afebɔɔ.’ ”

²² Na ɛhe ma Yesu di apam bɔ odi mu tra so ɔ nu agyinamuɛ.

Kristo te sɔfo afebɔɔ

²³ Asa koso, né asɔfo nemɔ sone, ofikyɛ ewue amma bɛ ate amma bandoa b’adwuma so;

²⁴ nakoso ɔnate kyɛ Yesu te ase afebɔɔ ne ati, ye sɔfolilɛ dwumadie ne koso wɔ berɛ afebɔɔ.

²⁵ Yiti ɔkora de bɛ bɔ bɛfa ye so bɛba Nyameɛ berɛ ne ngoa bɔkɔɔ; ofikyɛ ɔte ase afebɔɔ, na odi bɛ ti dwirɛ ma bɛ.

²⁶ Yiti ɔsɔfo panyi paa bɔ ɔte sɔa yeɛ ɔfata kyɛ yɛnya ɔ. Ɔte krongron, mvomsoɛ anaa bɔne biala nne ye nwo, baye ye basie ahameɛ bafi bɔnefoɛ nu, na babɔ ye panyi paa wɔ nyameɛso.

²⁷ Ye de, ɔtte kyɛ asɔfo mbanyi paa hene mɔ, onhia kyɛ ɛlɛho biala odi moa bɔ ye bɔbɔ ye bɔne nwo afɔleɛ koraka na wabɔ maen deɛ, na mmom ɔfale ye nwo bɔle afɔleɛ pɛnko.

²⁸ Mmeraa ne de, ɔyɛ mmenia bɔ mvomsoɛ wɔ bɛ nwo asɔfo mbanyi paa, nakoso Nyameɛ noa dwirɛ bɔ ndaen la so, bɔ mmeraa ne asi yeɛ ɔwale ne de, ɔyɛ Baa bɔ odi mu bɔkɔɔ ne ɔsɔfo panyi paa afebɔɔ.