Hebrifoɛ 4 - AHYERƐLƐ KRONGRON

¹ Yiti kyɛbɔ bɔhyɛ bɔ ɔfa ye nwomelelɛ nu hɔlɛ nwo tɛwɔ berɛ ye de, ɛ́mɔma yɛnea yé ná wamma ye kyɛ ɛmɔ nu biala sa anga ye.

² Bɛhane nzɛmba ne behyirele yɛ kyɛbɔ bɛhã behyirele bɛ ne ala, nakoso ye nwo amma mvasoɛ amma bɛ; ofikyɛ bamva gyidie banzɔ edwirɛ bɔ bɛtele ne anu.

³ Na yɛ bɔ yale yali ne yeɛ yɛwura sɔ nwomelelɛ ne anu ɔ, kyɛbɔ ɔhane kyɛ, “Yiti nne ɛyaa ndale ndaen kyɛ, ‘Bengowura me nwomelelɛ ne anu bie!’ ” Oyiele ye nnwumaa yɔle fi ewiase ahyɛaseɛ ne.

⁴ Ɔnate kyɛ wahã kyẽa bɔ ɔtɔ so nzoo ne nwo dwirɛ wɔ nekaa bie kyɛ, “Na kyẽa bɔ ɔtɔ so nzoo nen, Nyameɛ lele ye nwome wɔ ye nnwumaa mukoraa nu.”

⁵ Na ɔkã sɔ dwirɛ he bieku wɔ wa kyɛ, “Bengowura me nwomelelɛ ne anu bie!”

⁶ Bɛ bɔ belili moa bɛtele nzɛmba ne, bannya sɔ nwomelelɛ bɔhyɛ ne, ofikyɛ bɛyɛle asoserɛ; nakoso sɔ nwomelelɛ bɔhyɛ ne tɛwɔ berɛ ma ebiemɔ.

⁷ Yiti Nyameɛ asa ahyɛ kyẽa foforɛ ato berɛ bɔ bɛfrɛ ye “Ɛnɛ” ɔ. Na afoɛ pee asi ne, ɔfale Dawide so hane edwirɛ bɔ bali moa bahã ne kyɛ, “Ɛnɛ, sɛ ɛmɔte Nyameɛ dwudwolɛ a, nnɛma ɛmɔyɛ asoserɛ.”

⁸ Na sɛ Yosua maa benyane nwomelelɛ ne a, ahaa nziɛ ye Nyameɛ wangã kyẽa foforɛ nwo dwirɛ ko.

⁹ Nzaade afofikyẽalilɛ wɔ berɛ ma Nyameɛ mmenia;

¹⁰ ofikyɛ ebiala bɔ wawura Nyameɛ nwomelelɛ ne anu nen, ye koso wale ye nwome wɔ ye nnwumaa nwo, kyɛbɔ Nyameɛ lele ye nwome wɔ ye deɛ nwo ne.

¹¹ Yiti ɛ́mɔma yɛbɔ mmɔden yɛwura sɔ nwomelelɛ ne anu, amaa ɔnate so ebiala wanyɔ sɔ asoserɛ ne wamvi ase.

¹² Ɔnate kyɛ Nyameɛ dwirɛ ne te ase na anwoserɛ wɔ nu, na ɔyɛ nna tra sɛpɔ biala. Ɔpɛ tonn kɔworo ɛkra ne sunzum b’afia, sona aporɛ so ne ye bowue nu fonyi b’afia, na ɔpɛnzɛpɛnze ahone ne adwene nu nzusuleɛ mukoraa nu.

¹³ Abɔdeɛ biala mvea wɔ Nyameɛ nyunu, ye bɔ odi kyɛ yɛbu ngondaa yɛkyire ye ne, nikyee biala mvea ye, na ye nye tua nningyein mukoraa.

Yesu te yɛ sɔfo panyi paa

¹⁴ Ɛmɔma yɛsɔ yɛ gyidie nu serɛ, ofikyɛ yɛle ɔsɔfo panyi paa, Nyameɛ Awa Yesu bɔ wafa ewienu wahɔ nyameɛso ɔ.

¹⁵ Yɛ sɔfo panyi paa he de, ɔtte ebie bɔ ɔngora nnwu yɛ anwumvoin wɔ yɛ mmerɛyɛlɛ nu ɔ; na mmom ɔte ebie bɔ besole ye bɛneane wɔ atee biala so kyɛ yɛ ala, nakoso wanyɔ bɔne ɔ.

¹⁶ Yiti ɛ́mɔma yɛsi y’ahone yɛbra adom ahennie bia ne nyunu, amaa ɔnate so wanwu yɛ anwumvoin, ná yanya adom bɔ ɔkɔboka yɛ ɔ wɔ mmerɛ bɔ ɔsɛ ɔ nu.