Hebrifoɛ 2 - AHYERƐLƐ KRONGRON

Yɛfa Kristo so yɛnya daa ngoa

¹ Ye sɔ ne ati, odi kyɛ yɛsɔ nahorɛ dwirɛ bɔ yate ne anu yé ná yammini.

² Na sɛ edwirɛ bɔ abɔfo mɔ hane ne te nahorɛ, ná mmeraatolɛ biala ne asoserɛ biala nyane ye so akatuaa kyɛbɔ ɔfata hɔ a,

³ nzaade sɛ yɛpo ngoalelɛ piri bɔ ɔte sɔa de a, yɛkɔyɛ sɛɛ ná yafa yɛ nwo yali? Awurade lili moa bɔle ngoalelɛ he nwo dawure, na bɛ bɔ bɛtele ne koso lili ye nwo adanzeɛ maa yɛnwuni kyɛ ɔte nahorɛ.

⁴ Na Nyameɛ koso yɔle nzɛngyerɛnneɛ ne anwanwadeɛ ne tumi nnwumaa ahoroɔ, na ɔmane Sunzum Krongron akyɛdeɛ ne, kyɛbɔ ye apɛdeɛ si te ɔ fa lili edwirɛ ne nwo adanzeɛ.

Kristo fa yɛ kɔ daa ngoa nu

⁵ Ofikyɛ nna abɔfo mɔ bo yeɛ Nyameɛ fale ewiase bɔ ɔ́ba bɔ yɛkã ye nwo dwirɛ ne owurale ɔ.

⁶ Na mmom bahã ye nekaa bie kyɛ, “Dasaniɛ te nzu koraa bɔ ɛdwene ye nwo ɔ? Anaakyɛ sona awa te nzu, bɔ wɔ nye ku ye nwo ɔ?

⁷ Ɛmaa ɔhɔle ase bie trale abɔfo mɔ, ɛfale animnyam ne anidie bɔle ye abotire, [ɛfale wɔ sa noa adwuma wurale ye sa,]

⁸ na ɛfale nningyein mukoraa wurale ye gya bo.” Na sɛ ɔkã kyɛ Nyameɛ fale “nningyein mukoraa wurale ye bo” a, né okyire kyɛ nikyee biala nne berɛ bɔ wamva wanwura ye bo ɔ. Nakoso kekesaala ye de, yɛnnya yɛnnwuni kyɛ wafa nningyein mukoraa wawura ye bo.

⁹ Nakoso yɛnwu Yesu kyɛ, (mmerɛ kãa bie anu) Nyameɛ maa ɔhɔle ase kãa trale abɔfo mɔ, amaa ɔnate Nyameɛ adom ti wawu wama adasa mukoraa. Na ɔnate ye wue bɔ owuli ne ati, Nyameɛ afa animnyam ne anidie wabɔ ye abotire.

¹⁰ Ofikyɛ ye bɔ ɔbɔle nningyein mukoraa na nningyein mukoraa te ye deɛ ne, bɔ ɔnate Yesu so fa ye mma kɔ animnyam nu ne, né ɔfata kyɛ ɔma bɛ ngoalelɛ safohene Yesu ɔfa amaneɛnwunɛ nu odi mu.

¹¹ Na bɔ ɔte mmenia nwo fi bɛ bɔne nwo ne, ɔne mmenia bɔ ɔte bɛ nwo ne amukoraa bɛ Baba te ko; na ɔnate sɔ ne ati, ɔnyɛ ye nya kyɛ ɔkɔfrɛ bɛ oliɛma mɔ ɔ.

¹² Ɔnwa yoo: “Ngɔbɔ wɔ dumaa ngohyire nniɛma mɔ, na ngɔto dwein ngɔye wɔ ayɛ wɔ agyidifoɛ badwa nu.”

¹³ Osa hane kyɛ, “Ngɔfa me wora ngowura ye nu.” Na osa hane ye bieku kyɛ, “Me ɛhe, me ne mmaa bɔ Nyameɛ afa bɛ ama me ne.”

¹⁴ Na ɔnate kyɛ mmaa nemɔ te anwoɔnaen ne mogya ne ati, Yesu bɔbɔ yɛle ye nwo kyɛ bɛ ala, ɔfale sɔ sona sue ne bie, amaa ɔnate ye wue ne aso wasɛkye abɔnzam bɔ ye yeɛ ole ewue so tumi ne;

¹⁵ ná wale bɛ bɔ ɔnate esurolɛ bɔ besuro ewue ti bayɛ ngoaa mmerɛ bɔ bɛte ase mukoraa nu ne.

¹⁶ Na ɔte nahorɛ kyɛ nna abɔfo mɔ yeɛ oolele bɛ ɔ, na mmom Abraham boso ama yeɛ oolele bɛ ɔ.

¹⁷ Ɛhe ati, né ohia kyɛ ɔyɛ kyɛ oliɛma nemɔ wɔ atee biala so, amaa wahora wayɛ sɔfo panyi paa bɔ odi nahorɛ, bɔ ɔse anwumvoin wɔ Nyameɛ dwumadie nu, ná wafa ye nwo wayɛ mbata wama adasa bɔne.

¹⁸ Na ɔnate kyɛ ye bɔbɔ besole ye bɛneane ná onwuni amaneɛ ne ati, ɔkora boka bɛ bɔ bɛwɔ nzɔhwɛ nu ɔ.