Hebrifoɛ 13 - AHYERƐLƐ KRONGRON

Bɔ yɛyɔ a yɛkɔsɔ Nyameɛ nye ɔ

¹ Ɛmɔhɔ so behurohuro bɛ nwo dwirɛ kyɛ aliɛmaa.

² Ɛ́mɔnea kyɛ ɛmɔkole ɛwɔfoɛ mɔ wɔ ɛmɔ awuro ɔ, ofikyɛ ebiemɔ fale sɔ atee he aso besikyele Nyameɛ abɔfo mɔ wɔ b’awuro bɔ né bɛnze ɔ.

³ Ɛ́mɔkaye kukunufoɛ, kyɛ ebiaa ɛmɔ ne bɛ yeɛ begua kuku nu ɔ; ɔne bɛ bɔ benwu amaneɛ, kyɛ ebiaa ɛmɔ ne bɛ yeɛ benwu amaneɛ ne ɔ.

⁴ Odi kyɛ ebiala di agyaa ni, na nnɛma ebiala gua agyaa mba nwo fiɛ, ofikyɛ Nyameɛ kobua adwamanbɔlɛfoɛ ne agyaasɛkyelɛfoɛ ndɛen.

⁵ Ɛ́mɔye sikanyeboro befi ɛmɔ brabɔlɛ nu, ná ɛ́mɔma ɛmɔ nye sɔ bɔ ɛmɔanya ɔ; ofikyɛ ye bɔbɔ wahã kyɛ, “Mengoli wɔ ngasi, yeɛ mengɔye me sa wɔ wɔ bo le.”

⁶ Yiti yɛkora yɛsi y’ahone yɛkã kyɛ, “Awurade te me bokafoɛ, mengosuro nikye fee. Kuro sona kɔhora kɔyɔ me nzu?”

⁷ Ɛ́mɔkaye ɛmɔ mbanyi mɔ bɔ bɛhane Nyameɛ dwirɛ ne behyirele ɛmɔ ne. Ɛ́mɔnea bɛ brabɔlɛ ayieleɛ ná ɛmɔsua bɛ gyidie.

⁸ Kyɛbɔ Yesu Kristo te anoma nen, sɔ ala yeɛ ɔte ɛnɛ, ɔne afebɔɔ ɔ.

⁹ Onni kyɛ ɛmɔma ngyerɛkyerɛ foforɛ ahoroɔ biala twe ɛmɔ fi atee paa ne aso, ofikyɛ ɔte paa kyɛ Nyameɛ adom ne yeɛ ɔhyɛ y’ahone nguraen ɔ, na nna aleɛ bɔ mmenia bɔ bedi ne bennya ye nwo mvasoɛ biala hɔ ɔ.

¹⁰ Yɛle afɔleɛ bokyea bɔ bɛ bɔ bedi dwumaa wɔ ɛtena sua ne anu ne, belle ye nwo ate kyɛ bedi so nikyee biala ɔ.

¹¹ Ofikyɛ ngaka bɔ ɔsɔfo panyi paa ne fa bɛ mogya ba nekaa krongron ne anu babɔ bɔnefakyɛ afɔleɛ ne, bɛyera bɛ fuin nemɔ wɔ asikyeleɛ ne asi dɔ.

¹² Ye sɔ ne ati, Yesu koso nwuni amaneɛ wɔ kuro piri n’anoa ne asi, amaa ɔnate ye bɔbɔ ye mogya so wate adasa mmaa nwo wafi bɛ bɔne nwo.

¹³ Yiti ɛ́mɔma yɛhɔ ye berɛ wɔ asikyeleɛ ne asi dɔ ná ye animguaseɛ ne bie ɔha yɛ.

¹⁴ Ɔnate kyɛ, kuro biala nne aseɛ ye aso bɔ ɔwɔ berɛ afebɔɔ ma yɛ ɔ, na kuro bɔ ɔbaawa ne mmom yeɛ yɛpena ye si atee ɔ.

¹⁵ Yiti mmerɛ biala ɛ́mɔma yɛ́fa ayɛyelɛ yɛyɛ afɔleɛ yɛfa Yesu so yɛma Nyameɛ, na ɛhe te yɛ noa afɔleɛ bɔ yɛfa yɛhyɛ ye dumaa animnyam ɔ.

¹⁶ Nnɛma ɛmɔbu ɛmɔ nye begua so kyɛ ɛmɔkɔyɔ paa ná ɛmɔkɔbokaboka bɛ nwo ɔ, ofikyɛ sɔ afɔleɛ nemɔ yeɛ ɔsɔ Nyameɛ nye ɔ.

¹⁷ Ɛ́mɔyɛ sotie bɛ́ma ɛmɔ mbanyi mɔ ná ɛ́mɔbrɛ ɛmɔ nwo ase bɛma bɛ; ofikyɛ bɛnea ɛmɔ kra so, na bekobu bɛ nwo ngondaa ɔ, Ɛ́mɔyɛ sotie bɛ́ma bɛ amaa bayɔ b’adwuma wɔ anika so; na banyɔ ye aworabɔlɛ nu, ofikyɛ ɛhe nwo ngɔwa mvasoɛ biala ngɔma ɛmɔ.

¹⁸ Ɛmɔhɔ so bɛbɔ mbaeɛ bɛma yɛ; ofikyɛ yɛde yɛdi kyɛ yɛ tiboa mmua yɛ foɛ, na yɛkuro kyɛ daa yɛdi dwirɛ paa wɔ yɛ brabɔlɛ nu.

¹⁹ Na mesrɛ ɛmɔ pee kyɛ ɛmɔbɔ mbaeɛ, kyɛ ngonya atee ngosa ngɔwa ɛmɔ berɛ bieku ndɛndɛ ɔ.

Mbaeɛbɔlɛ bɔ ɔpɛ ye bo ɔ

²⁰ Asomdwee Nyameɛ bɔ ɔnate apam bɔ ɔwɔ berɛ afebɔɔ mogya ne aso tingyele y’Awurade Yesu bɔ ɔte Mmoaenneafoɛ panyi ne fili awufoɛ nu ne,

²¹ ɔ́ma ɛmɔ anwoserɛ wɔ nikyee paa biala nu ma ɛmɔyɔ ye apɛdeɛ; ná ɔ́fa Yesu Kristo so ma ɛmɔli dwumaa bɔ ɔsɔ ye nye ɔ. Animnyam hã ye afebɔɔ. Amen.

Ngraalilɛ bɔ ɔpɛ ye bo ɔ

²² Aliɛmaa mɔ, mesrɛ ɛmɔ kyɛ ɛmɔnya aboterɛ betie me foɛtulɛ he, ofikyɛ me krataa bɔ mahyerɛ ɛmɔ ye ɔnware biala.

²³ Mema ɛmɔte kyɛ baye y’eliɛma Timoteo bafi kuku nu, na sɛ ɔbadwu wa ndɛ de a, mebaasra ɛmɔ a, me ne ye kɔwa.

²⁴ Yɛbisa ɛmɔ mbanyi nemɔ mukoraa ne anwoteefoɛ ne amukoraa bisabisa. Aliɛmaa mɔ bɔ befi Yitalia koso bebisa ɛmɔ.

²⁵ Nyameɛ adom ne ɛmɔ amukoraa bɛtena. Amen.