Hebrifoɛ 12 - AHYERƐLƐ KRONGRON

Nyameɛ tea ye mma

¹ Yɛ de, yɛle adanzefoɛ pembepembe bɔ bapɛ yɛ nwo bayia ɔ, yiti ɛ́mɔma yɛgyi nikyee biala bɔ osi yɛ ngɔsoɛ nwo ate, ɔne bɔne bɔ ɔngyɛ na wakyekye yɛ ne yɛgua, ná yɛ́mia yɛ nye yɛtu amirika bɔ ɔla yɛ nyunu ne.

² Ɛ́mɔma yɛnea Yesu bɔ ɔte yɛ gyidie ahyɛaseɛ ne ayieleɛ ne. Na ɔnate anigye bɔ né ɔla ye nyunu ne ati, omiane ye nye fale amaneɛ ne animguaseɛ wue nu wɔ mmeamudua ne aso, na waatena Nyameɛ ahennie bia ne famaa so.

³ Ɛ́mɔnea Yesu bɔ ogyinane pindinn wɔ bɔnefoɛ ɛpɔen worawora noa ne, amaa ɛmɔ koso b’abasanu ammu na ɛmɔ wora ammɔ.

⁴ Na apereapereɛ bɔ ɛmɔ ne bɔne bedi ye, ɛmɔnnya bɛffale ɛmɔ ngoa bɛppɛle so.

⁵ Anaakyɛ ɛmɔ wora afi nguraenhyɛlɛ dwirɛ bɔ Nyameɛ kã kyire ɛmɔ kyɛ ɛmɔte ye mma ne hɔ ɔ? Ɔnwa yoo: “Mma, sɛ Awurade tea wɔ a, ɔyɛ a nnɛfa di angorɛ, yeɛ sɛ otwi wɔ nyunu koso a, ɔyɛ a nnɛma w’aba nu bu.

⁶ Ofikyɛ, bɔ Awurade kuro ye dwirɛ ne yeɛ ɔtea ye ɔ, na baa biala bɔ ode ye to nu ne yeɛ otwi ye nyunu ɔ.”

⁷ Sɛ ɛmɔnwu amaneɛ a, ɛ́mɔbu ye kyɛ ɔtea ɛmɔ, Nyameɛ yɛ ɛmɔ kyɛ ye mma, ofikyɛ baa beni ala yeɛ ɔse ndea ye ɔ?

⁸ Nakoso sɛ Nyameɛ andea ɛmɔ kyɛbɔ ɔyɛ ye mma mukoraa ne a, né nzaade ɛmɔtte ye mma paapaa, na mmom ɛmɔte adwaman mmaa.

⁹ Afei koso, yɛle seɛ mɔ wɔ aseɛ ye aso bɔ bɛtea yɛ ɔ, na yɛfa ebuo yɛma bɛ. Sɛ ɔte sɔ de a, aso onhia kyɛ yɛbrɛ yɛ nwo ase bɔ ɔtra so yɛma yɛ sunzum nu Seɛ ne na yanya ngoa anaa?

¹⁰ Bɛ de, bɛteane yɛ mmerɛ kãa bie anu, kyɛbɔ bɛnea a ɔte paa ma bɛ ɔ; nakoso Nyameɛ de, yɛ yeeyɛlɛ ti yeɛ ɔtea yɛ ɔ, amaa ɔnate so yanya kyɛfa wɔ ye krongronyɛlɛ ne anu.

¹¹ Kekesaala ye de, ɛtealɛ biala nne berɛ bɔ ɔma yɛ nye gye ɔ, na mmom ɔma yɛ wora bɔ. Nakoso ɛhe asi ne, bɛ bɔ bafa sɔ ɛtealɛ ne batea bɛ ne, bɛ sa kã akatuaa bɔ ɔte tenenee ne asomdwee ɔ.

Foɛtulɛ ne kɔkɔbɔlɛ

¹² Yiti ɛ́mɔma ɛmɔ sa bɔ nu agoho, ɔne ɛmɔ nangoroma bɔ nu ayɛ hodwoo ne anu yɛ se.

¹³ Na ɛ́mɔsiesie atimbire bɔ ɔtengyɛ ɔ bɛ́ma ɛmɔ gya, amaa ɔnate so agyirɛ bɔ ɔtte mayee ne wando wamvo ye nwo, ná mmom wanya ayaresa.

¹⁴ Ɛ́mɔbɔ mmɔden bɛ ne mmenia mukoraa bɛtena asomdwee nu, ná ɛmɔbɔ bra bɔ ye nwo te ɔ, ofikyɛ sɛ ɛmɔ bra anyɛ krongron a, ɛmɔngonwu Awurade.

¹⁵ Ɛ́mɔnea yé na Nyameɛ adom ne ammɔ ɛmɔ, na ɛmɔ nu biala anyɛ ye nwo bakaa ndii weewee, bɔ ɔfa ɛhawo brɛ mmeni pee na ogua bɛ nwo fiɛ ɔ;

¹⁶ na ebiala anyɛ adwamanbɔlɛniɛ anaakyɛ bɔ nyamesuro nne ye nu kyɛ Yisɔ, bɔ ɔtɔnene ye bamuɛbaa dibea fa lele aleɛ talie komapɛ twe ne.

¹⁷ Na ɛmɔse kyɛ ɛhe asi ne, ohurole kyɛ ahaa okonya ɔse saleɛ ne, nakoso wamva wamma ye. Na ɔwɔ nu kyɛ ɔporole moen fa penane de, nakoso wannwu atee biala bɔ ɔfa so kakyi bɔ wayɔ ne ɔ.

¹⁸ Nna bokaa bɔ bɛfa bɛ sa bɛkã ye ne anwo yeɛ ɛmɔawa ɔ: bokaa bɔ né ogye see ne, nekaa bɔ né awosii kabii ne munungum ne mvrama piri wɔ ne,

¹⁹ nekaa bɔ bɛtele totorobɛndo hulɛ ne, ɔne komviɛ totohyia bɔ ɔmaa bɛsrɛle kyɛ nnɛma Nyameɛ dwudwo kyire bɛ ko ne.

²⁰ Ɔnate kyɛ bangora Nyameɛ ahyɛdeɛ ne noa gyina. Ɔnwa, “Sɛ kaka po fa ye nwo kã bokaa ne a bɛboro ye nyɔboɛ (behũ ye).”

²¹ Na bɔ osili berɛ ne, kyɛbɔ ye suronyi si te ne ati, ɔmaa Mose hane kyɛ, “Mesuro, na me nwo wosowoso me.”

²² Na mmom ɛmɔawa Sion bokaa ne anwo, ɔne Nyameɛ teasefoɛ ne kuro, bɔ ɔte nyameɛso Yerusalem ne anu, yeɛ abɔfo kure kure bɔ bɛka a bennwu bɛ noa, bɔ bɛyɛ anigye nyianu ɔ bɛ berɛ.

²³ Ɛmɔawa Nyameɛ bamuɛbaa nemɔ bɔ bahyerɛ bɛ dumaa wɔ nyameɛso ne bɛ nyianu, ɔne Nyameɛ bɔ ɔte adasa mukoraa ndɛenbualɛniɛ ne berɛ, ɔne teneneefoɛ sunzum bɔ bali mu bayie nemɔ berɛ.

²⁴ Ɛmɔawa Yesu bɔ ɔte apam foforɛ ne anu ndamgyinaniɛ, ɔne mogya bɔ bɛfa bɛpetene bɔ ɔkã nningyein paa nwo dwirɛ tra Abel deɛ ne berɛ.

Sotie nwo hia

²⁵ Ɛ́mɔnea yé na ɛmɔambo bɔ odwudwo ne dwirɛ. Na sɛ bɛ bɔ bɛpole kyɛ bekotie bɔ odwudwole wɔ aseɛ ye aso ne, benyane ye nwo asohwenɛ de a, nzaade ɔkɔyɛ sɛɛ bɔ sɛ yɛpo bɔ odwudwo kyire yɛ fi nyameɛso ne dwirɛ a, yɛngonya ye nwo asohwenɛ ɔ?

²⁶ Ye yeɛ sɔ mmerɛ ne ye komvi mane aseɛ wosole ɔ, nakoso kekesaala ye de wahyɛ bɔ kyɛ, “Nna aseɛ angome yeɛ mebaawoso ye bieku ɔ, na anwuro koso boka so.”

²⁷ Na sɔ dwirɛ he: “Woso ye bieku” ne kyire kyɛ abɔdeɛ mɔ kɔwoso ná baye bɛ bafi berɛ, amaa nningyein bɔ bɛngora bɛnwoso ne bahɔ so batena berɛ.

²⁸ Na ɔnate kyɛ yanya Ahennie bɔ ɔnwoso ne ati, ɛ́mɔma yɛ́fa asennaa yɛma Nyameɛ ná yɛfa esuronyi ne ebuo yɛsɔne ye kyɛbɔ ɔsɔ anyeɛ ɔ,

²⁹ ofikyɛ yɛ Nyameɛ ne te see bɔ ɔyera nikye ɔ.