Hebrifoɛ 11 - AHYERƐLƐ KRONGRON

Gyidie nwo nhwɛsoɛ

¹ Gyidie te nikyee bɔ y’anyelasoɛ si pi wɔ nu, ɔne kyɛ yɛkole nikyee bɔ anyeɛ nnwu ye yɛkɔto nu ɔ.

² Ofikyɛ, ɔnate gyidie so yeɛ daa ama mɔ sɔle Nyameɛ nye ɔ.

³ Ɔnate gyidie so yɛnya ndeaseɛ kyɛ Nyameɛ noa dwirɛ yeɛ ɔfa bɔle aleɛ ɔ, yiti nningyein bɔ anyeɛ nwu bɛ ne, bammɔ bɛ bamvi nningyein bɔ anyeɛ nwu bɛ ɔ nu.

Abel

⁴ Ɔnate gyidie so yeɛ Abel bɔle afɔleɛ paa bɔ ɔtra Kein deɛ ne, ná ɔsɔle Nyameɛ nye ɔ. Ɔnate ye gyidie so Nyameɛ buli ye kyɛ ɔtengyɛ, ofikyɛ Nyameɛ lili y’ayɛyɛdeɛ ne nwo adanzeɛ. Na ɔwɔ nu kyɛ Abel awu de, nakoso ɔnate ye gyidie so ɔtɛ dwudwo.

Henɔke

⁵ Ɔnate gyidie so yeɛ behwimini Henɔke bɛhɔle bɔ wanwu ɔ. Ebiala annwu ye, ofikyɛ Nyameɛ fale ye hɔle. Na anzana bɛbaafa ye bɛkɔ nyameɛso nen, né ye nwo adanzeɛ kyire kyɛ ɔsɔ Nyameɛ nye.

⁶ Ebiala bɔ olle gyidie ne, ɔngora nzɔ Nyameɛ nye, ofikyɛ odi kyɛ ebiala bɔ ɔba Nyameɛ berɛ ne onya gyidie kyɛ Nyameɛ wɔ berɛ, na oyira bɛ bɔ bɛ nye aboro bɛpena ye boso ɔ.

Nowa

⁷ Ɔnate gyidie so yeɛ Nowa le suronyi tiele kyẽa bie nningyein bɔ né bɛbaasi ne nwo kɔkɔbɔlɛ ɔ, na ɔbobɔle ɛlɛen alaka bɔ ɔne ye awuro ama bɛfale so benyane ngoa ɔ. Ɔnate ɛhe aso Nowa buale wiase foɛ, na ɔɔyɛle tenenee bɔ ɔnate gyidie so benya ye ne koliagyaa.

Abraham

⁸ Ɔnate gyidie so yeɛ Abraham tiele Nyameɛ frɛlɛ ne, ná otu hɔle maen bɔ ɔfa hyɛle ye bɔ kyɛ ɔkɔmaa ɔkɔyɛ ye agyapadeɛ ne aso ɔ; na otu fili ye maen nu bɔ né ɔnze nekaa bɔ ɔkɔ ɔ.

⁹ Ɔnate gyidie so ɔɔyɛle amanvraniɛ kyɛ ɔwɔ maen foforɛ so ɔ, wɔ aseɛ bɔ Nyameɛ fa hyɛle ye bɔ ne aso, ná ɔne Yisake ne Yakob bɔ bɛte sɔ bɔhyɛ komapɛ ne ala koliagyaa ne bɛtenane ɛtena sua nu.

¹⁰ Ɔnate kyɛ, né ɔnwondɛ kuro bɔ Nyameɛ akyekye ná wahyehyɛ bɔ ye fapem gyi berɛ pindinn ne.

Sara ne tetefoɛ biemɔ gyidie

¹¹ Ɔnate gyidie so yeɛ Sara bɔ né wabo aworɛ so ne hora nwonzɛle wole ɔ, ofikyɛ obuli bɔ ɔhyɛle bɔ ne kyɛ odi nahorɛ.

¹² Yiti ɔnate biaa komapɛ he, bɔ né wayɛ aworowaa na wapingye ewue ne aso yeɛ bɛwole ye bosofoɛ, bɔ bɛ somaa te kyɛ ewienu nzramaa ne mboanoa anweaa bɔ bɛka a bennwu bɛ noa ɔ.

¹³ Gyidie nu yeɛ sɔ mmenia hemɔ amukoraa bewuli ɔ. Bɛ sa anga bɔhyɛ ne, nakoso befitele dedeede na benwuni bɔhyɛ ne nwo nningyein nen, bele belili, na bele bɛtole nu kyɛ bɛte ɛwɔfoɛ ne amanvrafoɛ wɔ aseɛ he aso.

¹⁴ Na mmenia bɔ bɛkã sɔ dwirɛ nen, bekyire kyɛ bɛpena maen bɔ ɔte bɛ bɔbɔ bɛ deɛ ɔ.

¹⁵ Na sɛ bɛhɔle so bɛdwenene maen bɔ betu befili so ne anwo a, ahaa benyane ate besale bɛ si bɛhɔle.

¹⁶ Nakoso afei, maen paa bɔ ɔte nyameɛso maen yeɛ bɛpena ɔ. Yiti ɔnyɛ Nyameɛ nya kyɛ bɛkɔfrɛ ye bɛ Nyameɛ ɔ, ofikyɛ wasiesie kuro bie wama bɛ.

¹⁷ Ɔnate gyidie so yeɛ Abraham, bɔ né Nyameɛ ahyɛ ye bɔ ne, ɔfale ɔwa bienzua Yisake komapɛ twe ne kyɛ ɔfa ye bɔ afɔleɛ wɔ mmerɛ bɔ Nyameɛ sole ye neane ne.

¹⁸ Né Nyameɛ ahã ahyire ye kyɛ, “Ɔnate Yisake so yeɛ ekonya wɔ bosofoɛ ɔ.”

¹⁹ Na Abraham nyane adwene kyɛ Nyameɛ kora tingye sona fi awufoɛ nu po, yiti sɛ ɛfa ye anyandera nu a, ye sa hane Yisake fili ewue nu kyɛ awufoɛ bɔ Nyameɛ tingye bɛ ne ala.

²⁰ Ɔnate gyidie so yeɛ Yisake fa yirayirale Yakob ne Yisɔ wɔ kyẽa bie nningyein nwo ɔ.

²¹ Gyidie so yeɛ mmerɛ bɔ Yakob baawu ne, ɔfa yirayirale Yosef mma nyɔ ne ɔ, na ofuale ye pɔmaa so dwɔso sɔnene Nyameɛ.

²² Yosef nate gyidie so yeɛ ɔka kãa maa owu ne, ɔhane kyɛ Nyameɛ kɔye Yisraelfoɛ kofi Misraim ɔ; na ohyirele kyɛbɔ owu a besi bɛyɛ ye mmowue ɔ.

Mose

²³ Ɔnate gyidie so yeɛ mmerɛ bɔ bɛwole Mose nen, ye awofoɛ fale ye feale tonn bosome nza ɔ; ofikyɛ benwuni kyɛ ye nwo yɛ nyemene, na banzuro kyɛ bekobu ɛhene ne mmeraa ne aso ɔ.

²⁴ Ɔnate gyidie so yeɛ Mose nyini ne, ɔpole kyɛ bɛkɔfrɛ ye Faro awa brasua n’awa ɔ,

²⁵ na mmom ohurole kyɛ ɔne Nyameɛ mmenia bekonwu amaneɛ tra kyɛ okoli fɛɛ wɔ bɔne nu mmerɛ kãa bie ɔ.

²⁶ Na onwuni kyɛ sɛ ɔnate Kristo ti begua wɔ nyunu ase a, ye nwo le mvasoɛ tra kyɛ ekonya Misraim anwonyadeɛ ɔ, ofikyɛ né ye nye la kyẽa bie akatuaa so.

²⁷ Ɔnate gyidie so yeɛ Mose tu fili Misraim bɔ wanzuro ɛhene ne yaafɛlɛ ɔ, na ogyinane pindinn kyɛ sona bɔ ye nye tua Ɛdangama Nyameɛ bɔ bennwu ye ne.

²⁸ Ɔnate gyidie so yeɛ ɔfa hyehyɛle Abɔtra ne, ɔne mogya petenɛ wɔ b’anoa nyunu ɔ, kyɛbɔ ɔkɔyɛ ná ewue abɔfo ne wanguku bɛ bamuɛbaa nemɔ ɔ.

²⁹ Ɔnate gyidie so yeɛ Yisraelfoɛ pɛle Ɛpo Kɔkorɛ ne kyɛ bɛnate etii so ɔ, nakoso Misraimfoɛ yɛle kyɛ bɛpɛ ye bie nen, asue ne fale bɛ hɔle.

³⁰ Ɔnate gyidie so yeɛ Yeriko fasue ne, bɛpɛle ye nwo bɛbra beyiale ɛlɛsoo ne, odwiri guale ɔ.

³¹ Ɔnate gyidie so yeɛ bangu gyanderaniɛ Rahabo bammoka bɛ bɔ banne banni nemɔ aso ɔ, ofikyɛ olele bɛ bɔ bɛɛsrale maen ne anu besiele ne nyemene so.

³² Na nzikyɛ bieku koraa yeɛ nga ɔ? Ɔnate kyɛ sɛ mekã mmenia te kyɛ Gideon, Barake, Samson, Yɛfeta, Dawide, Samuel ne ngɔmhyɛlɛfoɛ nemɔ nwo dwirɛ a, ahaa mmerɛ kotia me.

³³ Bɛ yeɛ ɔnate gyidie so bɛhone belili ahennie ahoroɔ so ngonim ɔ, begyinane bɛmane tenenee, bɛ sa hane bɔhyɛ mɔ, bɛhane gyata mɔ noa bɛtole nu;

³⁴ benuane see wuronyiwuronyi, benyane bɛ ti ngoa bɔ bandotɔ ngrandɛ noa ɔ, benyane anwoserɛ befili mmerɛyɛlɛ nu, bɛ nwo yɛle se wɔ koɛ nu, na bɛfoane amanvrafoɛ asraafoɛ maa bɛnwatili.

³⁵ Mmrasua sa hane b’awufoɛ bɔ batingye bafi ewue nu ɔ. Ebiemɔ koso bɛhyɛle bɛ anyeborolɛ behuni bɛ, nakoso bambene kyɛ bekonya bɛ nwo bɛkɔtete ɔ, amaa ɔnate so banya ewutingyelɛ paa ne.

³⁶ Beguale ebiemɔ nyunu ase, na besa befini bɛ mbire, yeɛ ebiemɔ wora bɛbɔle bɛ panwu bɛfale bɛ beguale kuku nu.

³⁷ Bɛborole bɛ nyɔboɛ, bɛfale sralaa bedwudwale bɛ nu, yeɛ bɛtotɔle ngrandɛ noa; bewurale mmoaen nwomaa ne mbɔngye nwomaa behyinini, belili hiaa, bɛtanene bɛ nye, na benwuni amaneɛ.

³⁸ Bammu wiase kyɛ nikyee bɔ odi mu ma bɛ ɔ, behyinihyini ɛserɛ ne mmokaa so, na bɛtenane aseɛ so nyɔboɛ bɔ wasi sua, ɔne ngumaa mɔ nu.

³⁹ Sɔ mmenia hemɔ amukoraa, ɔnate bɛ gyidie ti bɛsɔle Nyameɛ nye, nakoso bɛ sa anga bɔhyɛ ne;

⁴⁰ ofikyɛ Nyameɛ ayɔ nhyehyɛleɛ paa bɔ ɔtra so wato berɛ wama yɛ, na ɛhe kyire kyɛ sana yɛboka bɛ so koraka na bali mu.