Hebrifoɛ 10 - AHYERƐLƐ KRONGRON

Yesu bɔle afɔleɛ komapɛ twe

¹ Mmeraa ne de, ole nningyein paa bɔ bɛbaawa ne wawoɛ, na nna bɛ bɔbɔ deinn ɔ. Yiti ɔngora mma bɛ bɔ bɛsɔne Nyameɛ ne, bɛmva afoɛnoa afoɛnoa afɔleɛbɔlɛ ne aso benni mu.

² Na sɛ afɔleɛ ne te mmenia bɔ bɛsɔne Nyameɛ nwo pɛnko de a, ahaa bɛ tiboa mmua bɛ foɛ ko kyɛ bedi bɔne nwo fɔ; afei koso ahaa afɔleɛbɔlɛ ne amukoraa bo apɛ.

³ Nakoso sɔ afɔleɛbɔlɛ nemɔ ma mmenia kaye bɛ bɔne afoɛnoa biala,

⁴ ofikyɛ nandwie nyii mogya ne mbɔngye mogya ngora ngyikyi bɔne.

⁵ Yiti mmerɛ bɔ Kristo wale wiase nen, osele kyɛ, “Anguro afɔleɛ ne ayɛyɛdeɛ, na mmom asiesie nipadua ama me.

⁶ Wɔ nye angye naen yeralɛ afɔleɛ ne bɔne nwo afɔleɛ nwo.

⁷ Na afei ngane kyɛ, ‘O Nyameɛ, mawa kyɛ mebaayɔ w’apɛdeɛ, kyɛbɔ bahyerɛ bafa me nwo wɔ mmeraa nwomaa ne anu nen.’ ”

⁸ Olili moa hane kyɛ, “Anguro, yeɛ afei koso wɔ nye angye afɔleɛ, anaa ayɛyɛdeɛ, anaa naen yeralɛ afɔleɛ, anaa bɔne nwo afɔleɛ nwo.” Nakoso mmeraa ne kyire kyɛ bɛyɔ sɔ.

⁹ Na osa hane kyɛ, “O Nyameɛ, mawa kyɛ mebaayɔ w’apɛdeɛ.” Yiti Nyameɛ apɛ bɔ oli moa ne anu wafa bɔ ɔtɔ so nyɔ ne wasi ye gya nu.

¹⁰ Na ɔnate apɛdeɛ he aso bafa Yesu Kristo nipadua afɔleɛ ne aso bate yɛ nwo pɛnko.

¹¹ Ɔsɔfo biala gyina ndende daa biala yɔ ye sɔfodwuma ne, na afɔleɛ ko ne ala bɔ ɔbɔ ye daa daa ne ngora ngyikyi bɔne.

¹² Nakoso Yesu de, ɔbɔle bɔne nwo afɔleɛ komapɛ twe bɔ odi mu afebɔɔ yiele nen, ɔtenane Nyameɛ sa famaa so,

¹³ na ofi sɔ mmerɛ ne, ɔnwondɛ kyɛ Nyameɛ kɔfa ye pɔfoɛ mɔ kɔyɛ ye gya bo ndiasoɛ ɔ.

¹⁴ Ofikyɛ ɔnate afɔleɛ komapɛ bɔ ɔbɔle ne aso wama bɛ bɔ Nyameɛ te bɛ nwo ne ali mu afebɔɔ.

¹⁵ Na Sunzum Krongron ne koso di adanzeɛ kyire yɛ, ofikyɛ olili moa hane kyɛ,

¹⁶ “Awurade nwa nyoo: Sɛ sɔ ngyẽa ne pɛ nu a, apam bɔ me ne bɛ kɔhyehyɛ hɔ ɛhe: Ngɔfa me mmeraa ngowura b’ahone nu, na mahyerɛ ye wɔ b’adwene nu.”

¹⁷ Na osa hane kyɛ, “Mengɔkaye bɛ bɔne ne b’amumuyɛɛ ko.”

¹⁸ Yiti sɛ bafa ɛhemɔ bahyɛ de a, nzaade bɔnefakyɛ afɔleɛ nne berɛ ko.

Twe pingye Nyameɛ

¹⁹ Yiti aliɛmaa mɔ, ɔnate kyɛ yanya nguraenhyɛlɛ kyɛ ɔnate Yesu mogya ne ati yɛkora yɛkɔ nekaa krongron ne anu berɛ;

²⁰ ofikyɛ wafa ɛtena bɔ onwi pumbu n’anoa nu, bɔ ɔte ye nwonaen ne aso wabukye ngoa atee foforɛ wama yɛ,

²¹ ná asa koso yɛle ɔsɔfo panyi paa bɔ ɔnea Nyameɛ awuro ne aso ɔ ne ati,

²² yiti ɛ́mɔma yɛfa nahorɛ ahone ne gyidie bɔ osi pi, ɔne ahone bɔ bate ye nwo bafi bɔne tiboa nu, ɔne nipadua bɔ bafa nzue gyengɔgyengɔ babia ye ɔ yɛhwe yɛpingye Nyameɛ.

²³ Ɛ́mɔma yɛsɔ anyelasoɛ dwirɛ bɔ yɛgyi so ne anu serɛ, ofikyɛ bɔ ɔhyɛle bɔ ne, odi nahorɛ.

²⁴ Ɛ́mɔma yɛpena atee bɔ yɛkɔfa so yɛkɔbokaboka yɛ nwo bɔ ɔkɔmaa yɛkohyire ɔdɔ ná yayɔ nnwumaa paa ɔ.

²⁵ Nnɛmɔma yɛyakyi yɛ nwo yɛ nwo nyianuyɛlɛ, kyɛbɔ ebiemɔ de bayakyi ye yɔlɛ nen; na mmom ɛ́mɔma yɛhɔ so yɛtutu yɛ nwo yɛ nwo foɛ, nganga kekesaala ye bɔ ɛmɔnwu ye kyɛ Kyẽa ne apingye ye.

Bɛnnwati Nyameɛ bo

²⁶ Na sɛ yɛnya yɛnya nahorɛ ne nwo nimdeɛ, na ye si ye yɛ nye la ye nwo yɛkɔ so yɛyɔ bɔne de a, ye de bɔnefakyɛ afɔleɛ biala nne berɛ ko;

²⁷ na mmom bɔ waha ala ole kyɛ yɛkɔnwondɛ ndɛenbualɛ bɔ ɔyɛ suro ne, ɔne see bɔ ɔbaayera Nyameɛ pɔfoɛ mɔ ne.

²⁸ Sɛ ebie to Mose mmeraa ne ná mmenia nyɔ anaa nza di adanzeɛ tia ye a, bɛfa anwumvoin bɛto ahameɛ beku ye.

²⁹ Sɛ ɔte sɔ de a, nzaade sona bɔ okobu Nyameɛ Awa ne animtia, ná wabu apam mogya bɔ bafa bate ye nwo ne kyɛ ye nwo nde, ná wafa adom Sunzum ne nyunu watwitwi ase ne, nzikyɛ asohwenɛ yeɛ ɛmɔsusu kyɛ ɔfata ye ɔ?

³⁰ Ofikyɛ, yɛse bɔ ɔhane kyɛ, “Wereɛtɔlɛ te me deɛ, na ngotua so kerɛ;” na ye ala yeɛ osa hane kyɛ, “Awurade kobua ye mmenia ndɛen.”

³¹ Na ɔyɛ suro kyɛ ɛkɔma Nyameɛ teasefoɛ ne sa kɔsɔ wɔ nu ɔ!

³² Ɛ́mɔkaye mmerɛ bie bɔ wapɛ nu ɔ, bɔ ɛmɔɔyɛle agyidifoɛ nen, ɛmɔmiane bɛ nye bɛfale amaneɛ pee nu ne.

³³ Né ɔtɔ mmerɛ bie a, begua ɛmɔ nyunu ase na bɛhyɛ ɛmɔ anyeborolɛ wɔ badwa nu; né ɔtɔ mmerɛ bie koso a, ɛmɔfa bɛ bɔ benwu amaneɛ bɛyɛ bɛ mmango.

³⁴ Ofikyɛ ɛmɔnwuni bɛ bɔ begua kuku nu anwumvoin, na mmerɛ bɔ bɛfene ɛmɔ nningyein bɛfale ne, ɛmɔle anigye bɛpenene so, ofikyɛ ɛmɔse kyɛ ɛmɔle nningyein paa bɔ ɔtra so wɔ nyameɛso afebɔɔ.

³⁵ Yiti nnɛmɔma ɛmɔ abasanu bu, ofikyɛ ye nwo akatuaa piri bie wɔ berɛ.

³⁶ Odi kyɛ ɛmɔmia ɛmɔ nye, amaa ɛmɔahora bayɔ Nyameɛ apɛdeɛ ná ɛmɔ sa ahã ye bɔhyɛ ne.

³⁷ “Ofikyɛ waha kãa bie, né bɔ ɔ́ba ne wawa; na ɔngɔhyɛ biala.

³⁸ Na teneneeniɛ de, ɔnate ye gyidie so yeɛ okonya ngoa ɔ; nakoso sɛ osa ye si de a, me kra nye ngɔgye ye nwo.”

³⁹ Nakoso yɛ de, yɛbboka mmenia bɔ besa bɛ si bɛkɔ sɛkyelɛ nu ne aso; na mmom yɛboka bɛ bɔ bede bedi ná bɛ kra nya daa ngoa ne aso.