Habakuku 3 - AHYERƐLƐ KRONGRON

Habakuku mbaeɛ

¹ Ngɔmhyɛlɛniɛ Habakuku mbaeɛ bɔ ɔfale Sigyionote edweintolɛ so bɔle ne, ye ɛhe:

² Ao AWURADE, mate wɔ nga, na nzurole. Ao AWURADE, kanyane w’adwuma wɔ mmerɛ ye anu, wɔ mmerɛ ye anu maa benwu ye, na wɔ yaafɛlɛ nu po, nwu anwumvoin.

³ Nyameɛ fi Teman wale, amba, Krongronniɛ ne fi bokaa Paran so wale. Sela Ye animnyam katale nyameɛso, yeɛ ye nwo ayɛyelɛ yili aseɛ so tɛkyɛ.

⁴ Ye nwo hyireinn ne te kyɛ agralaa; né mmɛen nyɔ fi ye sa nu, ná nu yeɛ né ye tumi ne ɔfea ɔ.

⁵ Né ewue anwonyerɛ li ye nyunu, na né ɛhawo nate ye gya bo.

⁶ Ɔte gyinane, na ɔwosole aseɛ. Ɔtole ye nye neane, na ɔbɔle maen maen mɔ sandene; mmokaa bɔ bɛwɔ berɛ afebɔɔ ne, bedwiri beguale, na daa tete pambaa nemɔ, bɛbɔle bɛ nu ase. Ye atee mɔ wɔ berɛ afebɔɔ.

⁷ Nwuni kyɛ Kusan ɛtena sua mɔ bɛwɔ amaneɛ nu, yeɛ Midian aseɛ so mbɛmuɛ tena mɔ bɛwosowoso.

⁸ Ao AWURADE, aso asue mɔ yeɛ w’ahone huli bɛ so ne anaa? Asue mɔ yeɛ ɛfɛle bɛ so yaa ne anaa? Ɛpo yeɛ wɔ nye borole ye so ne anaa, mmerɛ bɔ né ɛte wɔ mbɔngɔ so, ne wɔ ngoalelɛ teaseɛnam mɔ nu ne?

⁹ Ɛhwene w’agyaen fili wɔ ndokue nu, kyɛbɔ mmusua kure nemɔ bɛ ndaen, bɔ ye ole wɔ dwirɛ ne, ɔte ɔ. Sela Afa asue mɔ ahyehyɛ aseɛ nu.

¹⁰ Mmokaa mɔ nwuni wɔ, na bɛ nwo wosowosole bɛ. Asue bɔ ɔsẽ wuruwuru ɔ pɛle nu hɔle, buma mane ye komvi so teateane nu, na ɔmane ye sa so hɔle anwuro.

¹¹ Eyia ne ɛsraen begyinagyinane seinn wɔ b’atenaleɛ, mmerɛ bɔ w’agyaen nemɔ bɛ nwo tete yerɛmyerɛm bɛkɔ, bɔ wɔ pealɛɛ nwo hyɛmhyɛm ne ɔ́ta hyireinn ɔ.

¹² Ele ɛyaa piri yeɛ ɛnate fale aseɛ so ɔ. Etiatiale maen maen mɔ so wɔ ahonehulɛ nu.

¹³ Efite hɔle kyɛ ɛfa ngoalelɛ brɛ wɔ maen, kyɛ ɛfa brɛ wɔ sona bɔ apopa ye ngoo ne. Nzɛmmɔneniɛ n’awuro ne aso panyi ne, ɛpɛkyɛle ye, na ɛmane ye nwo lale so fi ye gya bo kodwu ye ti so.

¹⁴ Ɛfale ye bɔbɔ ye pealɛɛ sinane bɔ ɔla ye koɛhonɛfoɛ nemɔ noa ne; bɛwale kyɛ mvrama bɔ ɔpɛ ye nwo ɔ, kyɛ bɛbabɔ me bɛpete. Bɔ bɛ nye gye ye nwo ole kyɛ bekohu anwumvoin mmenia wɔ mvealeɛ nu ɔ.

¹⁵ Ɛfale wɔ mbɔngɔ natele ɛpo nu, ɛfale nzue buma mbiri nemɔ anu.

¹⁶ Ndele nen, me kunu tele me; komviɛ ne mane me noa kekã bɔle so. M’aporɛ nu yɛle me hodwoo, na me nwo wosowosole me. Nakoso ngɔyɛ konn ngɔnwondɛ amaneɛnwunɛ kyẽa ne, kyɛ ɔkɔwa maen bɔ wafa koɛ waateta yɛ ne aso ɔ.

¹⁷ Ɔwɔ nu kyɛ borɔdoma mmɔ nyerɛen, bobe nemɔ benzu mmaa, olive sulɛ wali ngasi, eboo mɔ bɛngye aleɛ, mmoaen nemɔ bɛ boso ayera wɔ tuin ne anu, yeɛ nandwie biala nne tuin nemɔ anu,

¹⁸ nakoso me de, ngoli ahurusi wɔ AWURADE nu. Ngɔma me nye kɔgye wɔ me ngoadefoɛ Nyameɛ nu.

¹⁹ AWURADE Nyameɛ te m’anwoserɛ. Ɔma me gya tindim kyɛ kɛtɛbɔɔ deɛ, na ɔmaa menate m’asɔneyɛɛ nemɔ aso. Mefa mema edweinhyirelɛniɛ ne, kyɛ ɔ́fa me sangoo ne ɔ́to.