Habakuku 2 - AHYERƐLƐ KRONGRON

Ongoyie bɔnefoɛ yé

¹ Ngogyina m’apa bɔ megyina so mesra ne aso, ná magyina ndende wɔ abandenden ne aso. Ngɔwɛne ngɔnea bɔ ɔkɔhã kohyire me ɔ, ɔne mmuayɛɛ bɔ ɔkɔfa kɔma me wɔ m’adwobisa ne anwo ɔ.

² Yeɛ AWURADE buale me kyɛ, “Kyerɛ nyekyire ne, ná kyerɛ ye pefee gua nyɔboɛ taataa nemɔ aso, amaa ɔnate so mmenia bahora bakenga ye ndɛndɛ so.

³ Ofikyɛ nyekyire ne, ɔ́nwondɛ mmerɛ bɔ bahyehyɛ bato berɛ bama ye ɔ; ɔpe ndɛen kyɛ ɔkɔwa nu ɔ, na ɔngɔyɛ ngyɛkyerɛ. Sɛ ɔyɛ ngyɛkyerɛ po a, nwondɛ; ofikyɛ ɔkɔwa nu amba, ɔngɔyɛ ngyɛkyerɛ.

⁴ Tie, sona bɔ ɔte anwomasoɛ ne, ye kra ɔndengyɛ wɔ ye nu, nakoso teneneeniɛ de, ɔnate ye gyidie so yeɛ okonya ngoa ɔ.

⁵ Afei koso, nzaa te nnakannaka, anwomasoɛniɛ ne ngɔtena berɛ daa. Ye akɔnnɔ nu trɛ kyɛ ɛborɔ, ɔte kyɛ ewue bɔ ye ko nyi le ɔ. Ɔko boaboa maen maen amukoraa noa ma ye nwo, na ɔkye mmenia amukoraa nnure ɔfa.”

⁶ Aso sɔ maen nemɔ amukoraa bɛngɔhã ye anyinga, aso bɛngɔhã ngorohoɛ dwirɛ bɛngɔfa ye nwo kyɛ, “Bɔ ɔsesa nningyein bɔ nna ye deɛ ahɔ ɔ ɔbɔ so ne, ye yaakɔ! Apoobɔlɛ nningyein bɔ ode ye, ɔkɔhɔ so koodwu kyinzu?”

⁷ Bɛ bɔ bɛma wɔ kerɛ ne, aso bengodwɔso bengotia wɔ mvum nu, na bɛ bɔ bekodwɔso wɔ so ne, bɛkɔma wɔ nwo kɔwosowoso wɔ. Na ɛkɔyɛ koɛ nu nzesadeɛ kɔma bɛ.

⁸ Ɔnate kyɛ afẽ maen maen pee afa ne ati, maen ngaa nemɔ amukoraa koso bɛkɔfẽ wɔ bɛkɔfa, ofikyɛ ahã mmenia mogya agua, yeɛ ayɛ nhyɛsoɛ wɔ aseɛ ne aso, kuro ne aso, ɔne nu ama amukoraa bɛ so.

⁹ “Sona bɔ ɔnate atee tɛɛ so ɔpena anwonyadeɛ ma ye awuro, kyɛ ɔfa nwo ye saen wɔ anwuro, kyɛbɔ musue biala ngɔto ye ne, ye yaakɔ!”

¹⁰ Ɛnate mmenia pee bɔ ahũhũ bɛ ne aso ahwehwe animguaseɛ abrɛ w’awuro, ayɔ bɔne atia wɔ kra.

¹¹ Ofikyɛ nyɔboɛ ne kofi fasue ne anu kɔtea nu, na mbuna ne kofi ndaboa ne anu kosuro so.

¹² Sona bɔ ɔnate mogya hãgualɛ so ɔkyekye kuro, ná ɔnate amumuyɛɛ so ɔma kuro bo tindim ne, ye yaakɔ!

¹³ Tie, aso nna Asafo AWURADE yeɛ wahyehyɛ kyɛ mmenia bɛfɛ bɛyɔ adwuma ma see ɔyera ye, ná maen maen bɛfɛ bɛma nningyein bɔ ɔte mbaen ɔ.

¹⁴ Ofikyɛ AWURADE animnyam nwo nimdeɛ koyi aseɛ so tɛkyɛ, kyɛbɔ nzue ayi ɛpo nu tɛkyɛ ne.

¹⁵ Ebiala bɔ ɔma obiɛngo nzaa maa ɔno, bɔ adwene tɛɛ li ye si, bɔ ɔnate so ɔmaa ɔbo, amaa wanya atee wanea ye nwo ne, ye yaakɔ!”

¹⁶ Animguaseɛ yeɛ wabia wɔ ɔ, nna animnyam ɔ; wɔ koso, no nzaa bo ma wɔ bienzua bɔ bambɛ ne ɔla so. AWURADE sa famaa nu kwangoa kɔkakyi kɔwa wɔ so, na animguaseɛ kɔkata w’animnyam ne aso.

¹⁷ Ofikyɛ nzɛmmɔne bɔ ayɔ atia Lebanon ne, ɔne ngaka mɔ huhunɛ bɔ ɔmaa besurole ne, okobu kosa wɔ, ofikyɛ ahã mmenia mogya agua, yeɛ ayɛ nhyɛsoɛ wɔ aseɛ ne aso, kuro ne aso, ɔne nu ama amukoraa bɛ so.

¹⁸ Amoen bɔ adwiililɛniɛ wase ne, nzikyɛ mvasoɛ yeɛ ɔwɔ so ɔ? Amoen bɔ bahuro nikyee bafa bayɔ ɔ, bɔ okyirekyire nnakannaka ɔ; adwiililɛniɛ ne, ɔfa ye wora owura ye bɔbɔ ye adwii bɔ wali, bɔ ɔte emumu amoen ne anu.

¹⁹ Sona bɔ ɔkã kyire bakaa kyɛ, “Tingye”, ná ɔkã kyire nyɔboɛ mumu kyɛ, “Dwɔso! Ɔbaahyirehyire” ne, ye yaakɔ! Tie, bafa esikaa kɔkorɛ ne dwetɛ baboro ye nwo, nakoso nwomeɛ biala ɔnne ye nu.

²⁰ Nakoso AWURADE wɔ ye asɔneyɛɛ sua krongron ne anu, na odi kyɛ aseɛ amukoraa yɛ konn wɔ ye nyunu.