Habakuku 1 - AHYERƐLƐ KRONGRON

¹ Nyekyire bɔ ngɔmhyɛlɛniɛ Habakuku nyane ye ne, ye ɛhe.

Habakuku adwobisa

² Ao AWURADE, ɔkwaadwu kyinzu yeɛ ngosu ngɔpena mmokalɛ, nakoso ɛngɔtɛ me so ɔ? Metea nu mekyire wɔ kyɛ, “Nhyɛsoɛ oo”, nakoso ɛngɔpepɛ ngole yɛ!

³ Nzu ati yeɛ ɛmaa me nye nwu amumuyɛɛ, ná ɛma me nye nwu nhyɛsoɛ e? Basabasayɔlɛ ne nhyɛsoɛ yeɛ me nye tua ɔ; apereapereɛ ne ngondii badwɔso.

⁴ Yiti mmeraa ne, ɔnyɛ adwuma, yeɛ ndɛenbualɛ turoloo nne berɛ, ofikyɛ bɔnefoɛ bapɛ teneneefoɛ nwo babra bayia, na ndɛengyea yeɛ ɔkɔ so ɔ.

Nyameɛ ye Habakuku adwobisa ne noa

⁵ Ɛ́mɔto ɛmɔ nye bɛ́nea maen maen nemɔ anu, ɛ́mɔma ɔyɛ ɛmɔ nwanwa ná ɛmɔ nwo dwiri ɛmɔ, ofikyɛ mebaayɔ nikyee bie wɔ ɛmɔ aberɛ so, bɔ sɛ bɛkã bekyire ɛmɔ po a, ɛmɔngole bengoli ɔ.

⁶ Ofikyɛ tie, mékanyane Kaldeafoɛ, sɔ atianuserɛ maen bɔ bɛ nwo yɛ nyera ne, bɔ bɛnate bɛfa aseɛ ye aso amukoraa bɛfa atenaleɛ mɔ bɔ nna bɛ deɛ ahɔ ɔ.

⁷ Bɛ nwo yɛ suro, yeɛ bɛ nye yɛ se, na bɔ bɛ bɔbɔ bɛdwene kyɛ ɔte turoloo, ná ɔte paa ma bɛ ne yeɛ bɛyɔ ɔ.

⁸ Bɛ mbɔngɔ mɔ koso bɛ nwo yɛ nyera tra aboa, bɛte awerɔm bɛtra nɔsoa mbataku; bɛ pɔngɔhanɛfoɛ nemɔ behuru bɛpepe; amba, bɛ pɔngɔhanɛfoɛ nemɔ befi dedeede yeɛ bɛba ɔ; betu kyɛ kɔleɛ bɔ ɔpe ndɛen kɔkye naen di ɔ.

⁹ Bɛ mukoraa bɛba ye atianuserɛ so, bɛ nyunu ogye kyɛ eyia afiteleɛ mvrama, na bɛboaboa bɛ bɔ bahye bɛ nnure nemɔ noa kyɛ anweaa.

¹⁰ Bɛsere ahemvo mɔ, yeɛ bɛgoro atitirefoɛ mɔ anwo; bɛsere anwoserɛ afealeɛ biala, ofikyɛ bɛhonhɔn nnɛterɛ bɛfo so bɛfa kuro.

¹¹ Na afei, bɛsɛkye nningyein bɛpɛ nu bɛkɔ kyɛ mvrama piri, awudifoɛ bɔ bɛ bɔbɔ b’anwoserɛ yeɛ ɔte bɛ nyameɛ ɔ!

¹² Ao, AWURADE me Nyameɛ, me Krongronniɛ, aso nna wɔ yeɛ ɛwɔ berɛ fi tetetete bɔ olle ahyɛaseɛ ɔ? Yɛngowu. Ao AWURADE, atu bɛ asie berɛ kyɛ bebua yɛ ndɛen; ao Nyɔbotaen, ama bɛ bo atimu kyɛ bɛhwe yɛ so.

¹³ Wɔ nye te krongron paa bɔ yiti ɛngora nnea bɔne, ná ɛngora nnea amumuyɛɛ ɔ. Na nzu ati yeɛ ɛnea nnakannakafoɛ, bɔ ahã wɔ noa ato nu, wɔ mmerɛ bɔ bɔnefoɛ oku sona bɔ ɔtengyɛ tra bɔnefoɛ ne ɔ?

¹⁴ Ayɛ mmenia kyɛ ɛpo nu naen, kyɛ abɔdeɛ bɔ bɛkongo bɔ ebiala nne berɛ bɔ ɔla bɛ noa ɔ.

¹⁵ Bɛfa koaa bɛkye bɛ mukoraati, bɛfa b’asawu ne bɛtwe bɛ befite, bɛboa bɛ noa wɔ bɛ tɛen ne anu, yiti bedi ahurusi, na bɛ nye gye.

¹⁶ Yiti bɛbɔ afɔleɛ bɛma b’asawu ne, bɛyera ɛyɛɛ bɛma bɛ tɛen ne; ofikyɛ ɔnate bɛ so yeɛ bɛtena ase wɔ anwotɔ nu ɔ.

¹⁷ Yiti odi kyɛ bɛkɔ so bɛporoporo b’asawu ne anu, ná bɛkɔ so bekũkũ maen maen mɔ wɔ atianuserɛ nu daa anaa?