Gyenesise 9 - AHYERƐLƐ KRONGRON

Nyameɛ ne Nowa yɛ apam

¹ Afei Nyameɛ yirale Nowa ne ye mma mɔ, na osele bɛ kyɛ, “Ɛ́mɔwo ná ɛ́mɔta pee, ná ɛ́mɔyi aseɛ so tɛkyɛ.

² Ɛmɔ nwo suronyi ne ɛmɔ nwo surolɛ piri kɔtɔ aseɛ so ngaka mukoraati so, ewienu nnomaa mukoraa so, abɔdeɛ mukoraa bɔ bɛtwe bɛ nwo ase so, ɔne ɛpo nu naen amukoraa so. Mafa bɛ mawura ɛmɔ sa.

³ Nikyee biala bɔ nwomeɛ wɔ ye nu ne, ɔkɔyɛ ɛmɔ aleɛ. Na kyɛbɔ mvale nyaanyaa monɛ mane ɛmɔ ne, sɔ ala yeɛ méfa nikyee biala méma ɛmɔ ɔ.

⁴ Nakoso naen bɔ ye ngoa, bɔ ɔte ye mogya tɛ wɔ ye nu de, nnɛma ɛmɔdi.

⁵ Wɔ bɔbɔ deinn wɔ mogya bɔ ɔte wɔ ngoa ne, ekobu ye nwo ngondaa. Kaka biala ne sona biala kobu ye mogya nwo ngondaa. Na sona biala bɔ ɔkɔha obiɛngo mogya kogua ne, ngobisa mogya ne ngofi ye berɛ.

⁶ Sona biala bɔ ɔkɔha obiɛngo mogya kogua ne, ye wora sona yeɛ ɔkɔha ye mogya kogua ɔ, ofikyɛ Nyameɛ sɛso yeɛ ɔyɔle sona ɔ.

⁷ Nakoso ɛmɔ de, ɛ́mɔwo ná ɛ́mɔta, ná ɛ́mɔsone pee wɔ aseɛ so.”

⁸ Afei Nyameɛ sele Nowa ne ye mma bɔ bɛboka ye so ne kyɛ,

⁹ “Nea, me ne ɛmɔ ne kyẽa bie ɛmɔ boso ama yɛ́yɛ m’apam;

¹⁰ na me ne abɔdeɛ biala bɔ ngoa wɔ ye nu bɔ ɔboka ɛmɔ so: nnomaa, nyɛmmoa, aseɛ so ngaka mukoraa bɔ bɛboka ɛmɔ so, ɔne ngaka mukoraa bɔ bɛ ne ɛmɔ fili ɛlɛen alaka ne anu befitele yeɛ yɛ́yɛ ɔ, mekyire aseɛ so ngaka mukoraa.

¹¹ M’apam he yeɛ me ne ɛmɔ yɛ́yɛ ɔ, kyɛ ofi ɛnɛ bɔ ɔkɔ ɔ, mengɔfa nzueyilɛ ngɔsɛkye abɔdeɛ mukoraa ko, na mengɔfa nzueyilɛ ngɔsɛkye aseɛ ko.”

¹² Na Nyameɛ sele kyɛ, “Apam bɔ méyɛ méto berɛ méma me ne ɛmɔ, ɔne abɔdeɛ teasefoɛ biala bɔ ɔboka ɛmɔ so ne, ɔte aworɛ ndoatoasoɛ apam afebɔɔ, na ye nwo sɛngyerɛnneɛ ɛhe:

¹³ Mafa me nyangondoen mabea munungum nu, na ɔkɔyɛ apam bɔ me ne aseɛ yayɛ ne nwo sɛngyerɛnneɛ.

¹⁴ Na sɛ esue muna wɔ aseɛ so na nyangondoen to wɔ munungum ne anu a,

¹⁵ ngɔkaye m’apam bɔ me ne ɛmɔ ne abɔdeɛ teasefoɛ mukoraa yayɛ ne. Na nzue ne ngɔkakyi nzueyilɛ ngɔsɛkye abɔdeɛ mukoraa ko.

¹⁶ Na sɛ nyangondoen ne to wɔ munungum ne anu a, ngɔnea na makaye apam afebɔɔ bɔ ɔwɔ Nyameɛ ne abɔdeɛ teasefoɛ mukoraa b’afia ne.”

¹⁷ Na Nyameɛ sele Nowa kyɛ, “Apam bɔ mayɛ mato berɛ mama me ne abɔdeɛ mukoraa bɔ bɛwɔ aseɛ so ne, ye nwo sɛngyerɛnneɛ ɛne.”

Nowa boso ama

¹⁸ Nowa mma mmienzua bɔ befili ɛlɛen alaka ne anu bedwuli ase ne, bɛ ole Sem, Ham ne Yafɛte. Né Ham te Kanaan baba.

¹⁹ Né sɔ mmenia nza hemɔ te Nowa mma, na bɛ yeɛ besuli aseɛ so mmenia mukoraati ɔ.

²⁰ Nowa yeɛ ɔbɔle kuayɔlɛ bo ɔ, na ɔyɛle bobe boo.

²¹ Ɔnone bobe nzaa ne bie, ɔbole, na ɔlale ye ɛtena sua nu bɔ né ye nwo la so ɔ.

²² Kanaan baba Ham nwuni kyɛ ɔse Nowa nwo la so, na ofitele ɔɔbɔle oliɛma nyɔ nemɔ amaneɛ.

²³ Na Sem ne Yafɛte fale ɛtena beguale bɛ bati so, na bele bɛ si bɛhɔle toonn bɛɛfa bɛkatale bɛ se anwo. Bɛyele bɛ nye bɛtole eburo, na bannwu bɛ se nwo bɔ né ɔla so ne.

²⁴ Nzaa ne tetele Nowa nye so, ná ɔtele bɔ ɔwa kãa paa ne afa ayɛ ye nen,

²⁵ ɔhane kyɛ, “Musue to Kanaan! Ɔkɔyɛ kanga nu kanga kɔma oliɛma mɔ.”

²⁶ Na osa hane kyɛ, “AWURADE me Nyameɛ óyira Sem. Kanaan kɔyɛ Sem kanganiɛ!

²⁷ Nyameɛ ɔ́ma Yafɛte boso ɔ́trɛ, ɔ́ma ɔtena Sem ɛtena sua nu, ná ɔma Kanaan ɔyɛ Yafɛte kanganiɛ.”

²⁸ Nzueyilɛ ne asi ne, Nowa tenane ase afoɛ ɛyaa nza ne aburannu.

²⁹ Nowa afoɛ mukoraa bɔ olili te ɛyaa ngona ne aburannu, na owuli.