Gyenesise 6 - AHYERƐLƐ KRONGRON

Kuro sona amumuyɛɛ

¹ Mmerɛ bɔ mmenia hyɛle ye bo kyɛ bɛsone pee wɔ aseɛ so, ná afei bɛwowole mmaa mmrasua nen,

² Nyameɛ mma nemɔ benwuni kyɛ mmenia mma mmrasua nemɔ bɛ nwo yɛ nyemene, yiti begyigyale bɛ nu biala bɔ bekuro ɔ.

³ Na AWURADE hane kyɛ, “Me sunzum ngɔtena kuro sona nu afebɔɔ, ofikyɛ ɔte anwoɔnaen, ye afoɛ mukoraa bɔ okoli ɔ kɔyɛ ɛyaa ko ne aburanyɔ.”

⁴ Na sɔ mmerɛ ne anu, yeɛ ye si ye po, né Nefilifoɛ wɔ aseɛ so. Na ɔwale kyɛ Nyameɛ mma nemɔ bɛɛfale mmenia mma mmrasua nemɔ, na bɛ ne bɛ wowole mmaa. Na sɔ mmaa nemɔ ole daa tete anwoserɛfoɛ, mmenia bɔ belele dumaa ne.

⁵ Afei AWURADE nwuni kyɛ kuro sona amumuyɛɛ asone pee wɔ aseɛ ye aso, na nzusuleɛ tɛɛ ngome ayi ye ti anu tɛkyɛ daa.

⁶ Na AWURADE nuni ye nwo kyɛ wayɔ sona wato aseɛ ye aso ɔ, na ɔyɛle ye yea soma.

⁷ Yiti AWURADE hane kyɛ, “Ngonua kuro sona bɔ mabɔ ye ne boso ngofi aseɛ ye aso: mmenia ne ngaka mbiri ne ngaka bɔ bɛtwe bɛ nwo ase ne ewienu nnomaa, ofikyɛ manu me nwo kyɛ nyɔle bɛ ɔ.”

⁸ Nakoso Nowa de, ye yɔleɛ sɔle AWURADE nye.

Nowa apam alaka ne

⁹ Nowa boso ama ɛhe: Né Nowa te sona bɔ ɔtengyɛ, bɔ ngekalewa biala nne ye bra nu wɔ ye aberɛ so mmenia nu ɔ. Nowa fale ye nwo bɔle Nyameɛ.

¹⁰ Nowa wole mmienzua nza: Sem, Ham yeɛ Yafɛte.

¹¹ Nyameɛ nyunu de, né bɔne asɛkye aseɛ ye, na né basabasayɔlɛ ayi aseɛ ye aso tɛkyɛ.

¹² Nyameɛ neane aseɛ, na onwuni kyɛ wasɛkye, ofikyɛ né mmenia mukoraa ama bɔne ali bɛ ti wɔ aseɛ so.

¹³ Na Nyameɛ sele Nowa kyɛ, “Mayɛ m’adwene kyɛ ngonua kuro sona boso, ofikyɛ ɔnate bɛ ti basabasa ayi aseɛ so tɛkyɛ; na ngɔsɛkye bɛ ne aseɛ.

¹⁴ Yiti fa ɛframmire bobɔ ɛlɛen alaka ma wɔ nwo. Kyekyɛ nu ma pumbu mɔ bra nu, na fa ehwaa fa ye kunu ne ye si amu.

¹⁵ Na sɔaa yeɛ yɔ ye ɔ: Ma ye tendenn nu ɔyɛ agyirɛ ɛyaa nza, ye tɛtrɛtɛɛ nu ɔyɛ agyirɛ aburannu, yeɛ ye anwuro ne koso ɔyɛ agyirɛ aburasa.

¹⁶ Bɔ ɛlɛen alaka ne aso. Ma so bɔlɛ ne ɔhɔ anwuro ɔyɛ agyirɛ ko. Ɛlɛen alaka ne, fa ye anoa ne tua ye ngyɛnu, ná yɔ nzamsoɛ nza: ye bo deɛ, bɔ ɔtɔ so nyɔ, ɔne bɔ ɔtɔ so nza.

¹⁷ Tie, ngɔma nzueyilɛ kɔwa aseɛ so kɔɔsɛkye anwoɔnaen biala bɔ owura ewienu bo bɔ ngoa nwomeɛ wɔ ye nu; na nikyee biala bɔ ɔwɔ aseɛ so kowu.

¹⁸ Nakoso wɔ de, me ne wɔ yɛkɔyɛ apam. Ɛkɔɔfo ɛlɛen alaka ne anu, wɔ, wɔ mma mmienzua ne, ɛye, yeɛ wɔ mma nemɔ bɛ ye mɔ kɔboka wɔ so.

¹⁹ Na kaka biala bɔ ngoa wɔ ye nu ne, fa bɛ nu biala nyɔ kɔ ɛlɛen alaka ne anu ma benya ngoa bɛboka wɔ so; na maa bɛyɛ nyii ne beleɛ.

²⁰ Nnomaa ahoroɔ, ngaka ahoroɔ, ne ngaka ahoroɔ bɔ bɛkongo ɔ, ebiala kyɛbɔ ye sue si te ɔ, bɛ nu biala nyɔ nyɔ kɔɔboka wɔ so, amaa ɔnate so banya ngoa.

²¹ Asa koso, fa aleɛ biala bɔ bedi ɔ kɔ nu, na fa sie, na ɛhe yeɛ ɔkɔyɛ wɔ ne b’aleɛ ɔ.”

²² Na Nowa yɔle bɔ Nyameɛ hyɛle ye kyɛ ɔyɔ ne amukoraa.