Gyenesise 5 - AHYERƐLƐ KRONGRON

Adam Boso ama

¹ Adam boso ama mɔ ɛhe: Mmerɛ bɔ Nyameɛ bɔle sona nen, ɔyɔle ye kyɛ Nyameɛ sɛso.

² Ɔbɔle bɛ bienzua ne brasua, na oyirale bɛ. Na ɔtole bɛ dumaa ‘Sona’ wɔ mmerɛ bɔ ɔbɔle bɛ ne.

³ Adam lili afoɛ ɛyaa ko ne aburasa nen, ɔwole ye sɛso baa bienzua bɔ osoma ye, na ɔtole ye dumaa Sɛte.

⁴ Adam wole Sɛte nen, ye si ye olili afoɛ ɛyaa mmɔtwɛ; na ɔwole mmaa mmienzua ne mmrasua mɔ koso.

⁵ Yiti Adam afoɛ bɔ olili amukoraa te ɛyaa ngona ne aburasa, na owuli.

⁶ Na Sɛte lili afoɛ ɛyaa ko ne nnu nen, ɔwole Enose.

⁷ Sɛte wole Enose nen, ye si ye ɔtenane ase afoɛ ɛyaa mmɔtwɛ ne nzoo; na osa wole mmaa mmienzua ne mmrasua mɔ koso.

⁸ Yiti Sɛte afoɛ bɔ olili amukoraa te ɛyaa ngona ne buru ne nyɔ, na owuli.

⁹ Enose lili afoɛ aburahona yeɛ ɔwole Kenan ɔ,

¹⁰ na Enose wole Kenan nen, ye si ye ɔtenane ase afoɛ ɛyaa mmɔtwɛ ne buru ne nnu; na osa wole mmaa mmienzua ne mmrasua mɔ koso.

¹¹ Yiti Enose afoɛ bɔ olili amukoraa te ɛyaa ngona ne nnu, na owuli.

¹² Kenan lili afoɛ aburasoo yeɛ ɔwole Mahalaleel ɔ,

¹³ na Kenan wole Mahalaleel nen, ye si ye olili afoɛ ɛyaa mmɔtwɛ ne aburanna, na osa wole mmaa mmienzua ne mmrasua mɔ koso.

¹⁴ Yiti Kenan afoɛ bɔ olili amukoraa te ɛyaa ngona ne buru, na owuli.

¹⁵ Mahalaleel lili afoɛ aburasia ne nnu yeɛ ɔwole Yarede ɔ,

¹⁶ na Mahalaleel wole Yarede nen, ye si ye olili afoɛ ɛyaa mmɔtwɛ ne aburasa, na osa wole mmaa mmienzua ne mmrasua mɔ koso.

¹⁷ Yiti Mahalaleel afoɛ bɔ olili amukoraa te ɛyaa mmɔtwɛ ne aburahona ne nnu, na owuli.

¹⁸ Yarede lili afoɛ ɛyaa ko ne aburasia ne nyɔ yeɛ ɔwole Henɔke ɔ,

¹⁹ na Yarede wole Henɔke nen, ye si ye olili afoɛ ɛyaa mmɔtwɛ, na osa wole mmaa mmienzua ne mmrasua mɔ koso.

²⁰ Yiti Yarede afoɛ bɔ olili amukoraa te ɛyaa ngona ne aburasia ne nyɔ, na owuli.

²¹ Henɔke lili afoɛ aburasia ne nnu nen, ɔwole Metusela.

²² Henɔke wole Metusela yiele nen, ɔne Nyameɛ natele afoɛ ɛyaa nza, na osa wole mmaa mmienzua ne mmrasua mɔ.

²³ Yiti Henɔke afoɛ bɔ olili amukoraa te ɛyaa nza ne aburasia ne nnu.

²⁴ Henɔke ne Nyameɛ natele, na otu minini, ofikyɛ Nyameɛ fale ye hɔle.

²⁵ Metusela lili afoɛ ɛyaa ko ne aburawɔtwɛ ne nzoo yeɛ ɔwole Lamɛke ɔ,

²⁶ na Metusela wole Lamɛke nen, ye si ye olili afoɛ ɛyaa nzoo ne aburawɔtwɛ ne nyɔ, na osa wole mmaa mmienzua ne mmrasua mɔ koso.

²⁷ Yiti Metusela afoɛ bɔ olili amukoraa te ɛyaa ngona ne aburasia ne ngona, na owuli.

²⁸ Lamɛke lili afoɛ ɛyaa ko ne aburawɔtwɛ ne nyɔ nen, ɔwole baa bienzua.

²⁹ Ɔtole ye dumaa Nowa, na ɔhane kyɛ, “Ye yeɛ okofi aseɛ bɔ AWURADE anoma ye ne anu ɔkɔkyekye yɛ wora wɔ yɛ adwuma, ɔne ɛfɛɛ wora bɔ yɛfɛ yɛ sa nu ɔ.”

³⁰ Na Lamɛke wole Nowa nen, ye si ye olili afoɛ ɛyaa nnu ne aburahona ne nnu, na osa wole mmaa mmienzua ne mmrasua mɔ koso.

³¹ Yiti Lamɛke afoɛ bɔ olili amukoraa te ɛyaa nzoo ne aburasoo ne nzoo, na owuli.

³² Nowa lili afoɛ ɛyaa nnu ne, ɔwole Sem, Ham ne Yafɛte.