Gyenesise 49 - AHYERƐLƐ KRONGRON

Yakob yirayira ye mma mɔ

¹ Yakob frɛfrɛle ye mma mɔ, na osele bɛ kyɛ, “Ɛ́mɔboaboa ɛmɔ noa ma nga bɔ kyẽa bie okosi ɛmɔ bra nu ɔ ngyire ɛmɔ.

² “O Yakob mma, ɛ́mɔyia na ɛ́mɔtie, ɛ́mɔtie ɛmɔ ase Yisrael.

³ Ruben, wɔ yeɛ ɛte me bamuɛbaa ɔ, m’anwoserɛ, me sɛngyerɛnneɛ bɔ oli moa bɔ okyire kyɛ nde bienzua ɔ, w’anidie tra so, yeɛ wɔ tumi koso tra so.

⁴ Ɛwosowoso kyɛ nzue, yiti wɔ panyililɛ ne kɔbɔ wɔ, ofikyɛ ɛne ɛse aye bɛlale; ɛɛlale me bɛen so, eguale ye nwo fiɛ.

⁵ Simeon ne Lewi te aliɛmaa, bɛ ngrandɛ mɔ te nzɛmmɔne akodeɛ

⁶ Ao me kra, nnɛne bɛ fa adwene; Ao me sunzum, nnɛne bɛ bɔ afɛ; ofikyɛ sɛ bɛfɛ yaa a, bedi awue, na bɛgye bɛ nye a, bɛpepɛ nandwie mɔ gya ndii nu.

⁷ Musue to b’ɛyaafɛlɛ ne, ofikyɛ ye noa yɛ hye; ɔ́hã b’ɛyaafɛlɛ piri ne koso, ofikyɛ atianuserɛ wɔ nu! Ngɔhyehyɛ bɛ bosofoɛ nu wɔ Yakob maen ne anu, na mato bɛ mapete Yisrael maen nu.

⁸ Yuda, eliɛma mɔ kɔkamvo wɔ, na ɛkɔfo kɔtena wɔ pɔfoɛ mɔ kɔme so; ɛse amma mmienzua mɔ kɔkoto wɔ.

⁹ Yuda te gyata akrɔngrɔma, bɔ eku ngaka di ná esa bada wɔ boso ɔ. Okunduni, na obutuli berɛ kyɛ gyata, ɔte kyɛ gyata beleɛ; nwa yeɛ onzuro bɔ okotingye ye ɔ?

¹⁰ Ɛhɔtɔ ngofi Yuda sa nu, yeɛ ahennie pɔmaa ngofi ye gya afia, kɔpem kyɛ mmenia kotua ndɔ bɛkɔma ye ɔ, kɔpem kyɛ maen maen kɔyɛ sotie bɛkɔma ye ɔ.

¹¹ Na ɔkɔmenda ye pɔngɔ akrɔngrɔma kɔbɔ bobe nu, na wamenda ye afunum ba wabɔ bobe paa nu, na ɔpo ye ndaadeɛ wɔ nzaa nu, na wapo ye tena wɔ bobe nzaa bɔ ɔyɛ fɛ nu;

¹² Ɔkɔno nzaa somaa biala bɔ okuro ɔ, ná nyɔfonesue ama ye gye ayɛ hyɛnn.

¹³ Sebulɔn kɔtena mboanoa, ɔkɔyɛ ɛlɛen mɔ agyinaleɛ, na ɔne Sidon bɛkɔbɔ ɛwɛen.

¹⁴ Yisaka te afunum anwoserɛniɛ, obutu mmoaen kure mɔ afia;

¹⁵ na onwuni kyɛ nekaa bɔ bede bɛ nwome te paa, na sɔ aseɛ ne yɛ nyemene, yiti ɔhane ye bati ase fa soale nningyein ne, na bɛhyɛle ye maa ɔyɛle kanganiɛ adwuma.

¹⁶ Dan kobua ye mmenia ndɛen, kyɛbɔ Yisrael mmusua kure ngaa nemɔ yɔ ne ala.

¹⁷ Dan kɔyɛ atunu ewoo, na wayɛ atimbire so ɛbɔnaa, bɔ ɔkeka pɔngɔ gya ndii nu ɔ, maa pɔngɔhanɛniɛ ne ɔte tɔ ye si ɔ.

¹⁸ Ao AWURADE, wɔ ngoalelɛ yeɛ menea ye ate ɔ.

¹⁹ Apaabɔlɛfoɛ kure kohwi kɔfa Gade so, nakoso ɔkɔkakyi ye nwo kɔbɔ bɛ so apaa.

²⁰ Asɛ aleɛ kɔyɛ bɔ ɔte aleɛ paa ɔ, na ɔkɔma mmenia sa kɔha aleɛ bɔ ɔfata ɛhene mɔ ɔ.

²¹ Nafetali te wanzane beleɛ bɔ basangye ye ɔ, bɔ ofifi mmɛen nyemene ɔ.

²² Yosef te bakaa mmaen frɔmfrɔm bɔ osu ɔ, bakaa mmaen frɔmfrɔm bɔ osu ná opingye asue ti ɔ; ye mmaen bua kogua fasue so.

²³ Agyaentolɛfoɛ dwɔsole tiale ye serɛserɛ, bɛfale agyaen bɛneane ye so bɛtole, na bɛtanene ye nye paa;

²⁴ nakoso wando ye agyaen ne, Ɔnate Yakob ye Tuminiɛ ne ye anwoserɛ ti, ye abasa nu kɔyɛ se. (Ɔnate Mmoaenneafoɛ bɔ yeɛ ɔte Yisrael Nyɔbotaen ne dumaa nu).

²⁵ Wɔ baba ye Nyameɛ yeɛ ɔkɔboka wɔ ɔ, Ɛdangama Nyameɛ yeɛ okoyira wɔ ɔ, ɔkɔfa nyameɛso anwuro anwuro saleɛ yeɛ okoyira wɔ ɔ; aseɛ bo dɔ saleɛ buma bɔ ɔtrɛ ɔ, nyɔfone ne aworɛ nu saleɛ yeɛ ɔkɔfa koyira wɔ ɔ.

²⁶ Saleɛ bɔ ofi ɛse berɛ ne, ɔtra saleɛ bɔ ofi mmokaa mbiri bɔ otimu berɛ daa nu ɔ. Ɔtra nningyein paa bɔ bɛwɔ daa tete mmokaa bɔ bɛwɔ berɛ afebɔɔ nu ɔ; ma sɔ saleɛ ne ɔ́bra Yosef so, ye bɔ baye ye basie ahameɛ bafi oliɛma nemɔ anu.

²⁷ Benyamin te pataku bɔ ɔkye ngaka di ɔ, ngyerɛmɔ odi naen bɔ ye sa kɔsɔ ye nu ɔ, na nɔsoa ɔkyekyɛ koɛ nu nzesadeɛ.”

²⁸ Yisrael mmusua kure buru ne nyɔ nemɔ ɛne. Na mmerɛ bɔ né bɛ baba óyira bɛ ne, edwirɛ bɔ ɔha hyirele bɛ hɔ ɛne; ɔfale saleɛ bɔ ɔfata bɛ nu biala yirale ye.

²⁹ Na ɔhyɛle bɛ kyɛ, “Waha kãa né matoa ne mbanyi mɔ. Ɔyɛ a ɛ́mɔsie me wɔ me nana mɔ asieleɛ; wɔ nyɔboɛ bɔ wasi sua bɔ yeɛ ɔwɔ Hitiniɛ Efron aseɛ so ne anu.

³⁰ Mekyire nyɔboɛ bɔ wasi sua bɔ ɔwɔ Makepɛla aseɛ so, wɔ Mamre eyia afiteleɛ, wɔ Kanaan aseɛ so ne. Ɛhe yeɛ Abraham tɔ fili Hitiniɛ Efron berɛ kyɛ ɔfa yɛ ye asieleɛ ne.

³¹ Berɛ yeɛ besiele Abraham ne ɔye Sara; berɛ yeɛ besiele Yisake ne ɔye Rebɛka; na berɛ yeɛ nziele Lea ɔ.

³² Aseɛ ne ɔne nu nyɔboɛ bɔ wasi sua ne, bɛtɔle befili Hitifoɛ sa nu.”

³³ Na Yakob hane sɔ dwirɛ ne kitii hyirele ye mma nemɔ yiele ne, ɔpagyale ye gya guale mba ne aso, olele ye nwomeɛ bɔ ɔpɛ ye bo ɔ, na ɔhale nu.