Gyenesise 46 - AHYERƐLƐ KRONGRON

Yakob ne ye awuro ama kɔ Misraim

¹ Yiti Yisrael, bɛ besa bɛfrɛ ye Yakob ne sesale ye nwo nningyein amu, na ɔpene atee so. Oodwuli Beɛ Hyeba, na ɔbɔle afɔleɛ mane ye baba Yisake Nyameɛ.

² Na Nyameɛ dwudwo hyirele Yisrael kɔngɔen ne wɔ nyekyire nu. Ɔfrɛle ye: “Yakob, Yakob,” na osurole kyɛ, “Me ɛhe.”

³ Na osele kyɛ, “Me ole Nyameɛ, wɔ baba ye Nyameɛ, nnɛsuro kyɛ ɛkɔhɔ Misraim, ofikyɛ ngɔma wɔ bosofoɛ kɔyɛ maen kandinga wɔ dɔ.”

⁴ Me bɔbɔ me ne wɔ kɔhɔ Misraim, na ngosa ngɔfa wɔ bosofoɛ ngɔwa sɔ aseɛ ye aso; na Yosef yeɛ okogua wɔ noa nu nzue ɔ.”

⁵ Yakob sili nu fili Beɛ Hyeba. Na Yisrael mma nemɔ fale bɛ baba, bɛ mma mɔ, ɔne bɛ ye mɔ tenatenane teaseɛnam mɔ bɔ Faro fa somane kyɛ bɛfa bɛɛfa ye nemɔ anu.

⁶ Yakob ne ye sasofoɛ amu fale bɛ nyɛmmoa ne bɛ nningyein bɔ benyane ye wɔ Kanaan aseɛ so ne, na bɛwale Misraim.

⁷ Ɔne ye mma mmienzua mɔ, yeɛ afei ye mma mmienzua nemɔ bɛ mma mmienzua ne mmrasua, ye mma mmrasua mɔ, ɔne ye sasofoɛ amukoraa yeɛ bɛwale Misraim ɔ.

⁸ Yisrael sasofoɛ bɔ bɛwale Misraim nemɔ ɛhe: Yakob ne ye mma mɔ. Yakob bamuɛbaa Ruben,

⁹ yeɛ afei Ruben mma mɔ: Hanoke, Palu, Hesron ne Karemi.

¹⁰ Simeon mma mmienzua mɔ: Yemuel, Yamin, Ohade, Yakin, Soha yeɛ Sɔɔlo bɔ oni te Kanaanniɛ ne.

¹¹ Lewi mma mmienzua mɔ: Gɛsɔn, Kohate ne Merari.

¹² Yuda mma mɔ: Ɛre, Onan, Hyela, Pɛrɛse ɔne Sera (nakoso Ɛre ne Onan bewuli wɔ Kanaan aseɛ so). Pɛrɛse mma mɔ ole Hesron ne Hamul.

¹³ Yisaka mma mmienzua mɔ: Tola, Puwa, Yob ne Simron.

¹⁴ Sebulɔn mma mmienzua mɔ: Serede, Elon ne Yaleel.

¹⁵ (Lea mma mmienzua bɔ Yakob ne ye wole wɔ Padan Aram mɔ ɛhe. Ɔwa brasua ole Dina. Ye mma ne ye nnomaa mɔ bɛ somaa te aburasa ne nza.)

¹⁶ Gade mma mmienzua mɔ ɛhe: Sifion, Hagyi, Suni, Esebon, Ɛri, Arode ne Areli.

¹⁷ Asɛ mma mmienzua mɔ ɛhe: Yimina, Yisua, Yisuwi, Beria, ɔne b’eliɛma brasua Sera. Beria mma mmienzua mɔ ɛhe: Heberi ne Malkiɛl.

¹⁸ (Silpa, bɔ Laban fale ye mane ɔwa brasua Lea maa ɔɔyɛle ye afaneɛ ne, ɔne Yakob bɛ mma ne bɛ nnomaa buru ne nzia nemɔ ɛne).

¹⁹ Yakob aye Rahɛl, ye mma mmienzua mɔ ɛhe: Yosef ne Benyamin.

²⁰ Yosef ne Asenate bɔ ɔte On sɔfo Pɔtifɛra awa brasua ne, bɛwole Manase ne Efraim wɔ Misraim maen nu.

²¹ Benyamin mma mmienzua mɔ ɛhe: Bela, Bekya, Asebel, Gera, Naaman, Ehi, Rohye, Mupim, Hupim ne Ade

²² (Rahɛl ne Yakob bɛ mma ne bɛ nnomaa, bɛ mukoraati bɛte buru ne nna).

²³ Dan awa bienzua ɛhe: Husim.

²⁴ Nafetali mma mɔ ɛhe: Yaseel, Guni, Yesare, ɔne Silem.

²⁵ (Bilha bɔ Laban fale ye mane ɔwa brasua Rahɛl kyɛ ɔɔyɛ ye afaneɛ ne, ɔne Yakob bɛ mma ne bɛ nnomaa mukoraa te nzoo).

²⁶ Yakob ye bɔbɔ ye sasofoɛ mukoraa bɔ ɔne bɛ wale Misraim ne, sɛ ɛye ye mma mmienzua nemɔ bɛ ye mɔ esie ahameɛ a, bɛ mukoraa bɛte aburasia ne nzia.

²⁷ Yosef mma bɔ ɔwole bɛ wɔ Misraim nemɔ te nyɔ; Yakob ne ye awuro ama bɔ bɛwale Misraim ne amukoraa bɛte aburasoo.

Yakob ne ye awuro ama kofite Misraim

²⁸ Yakob somane Yuda maa olili ye nyunu moa hɔle Yosef berɛ kyɛ Yosef ohyire ye Gosen atee, na bɛwale Gosen mbɔtam.

²⁹ Yosef siesiele ye teaseɛnam na ɔfole ooyiale ye baba Yisrael wɔ Gosen. Ɔfale ye nwo hyirele ɔse; ɔtɔle ye nu, na ɔfale ye ti tole ye kɔme anwo suni hyɛle paa.

³⁰ Na Yisrael sele Yosef kyɛ, “Afei de mewu po a, mekuro, ɔnate kyɛ manwu wɔ nyunu, na manwu kyɛ ɛte ase.”

³¹ Na Yosef sele oliɛma mɔ ne ɔse awuro ama nemɔ kyɛ, “Ngɔhɔ Faro berɛ ngɔɔbɔ ye amaneɛ kyɛ, ‘Nniɛma mɔ ne me baba awuro ama bɔ né bɛwɔ Kanaan aseɛ so ne, bawa me wa.

³² Bɛte mmoaenneafoɛ, ofikyɛ besie ngaka; na bafa bɛ mmoaen ne bɛ nandwie mɔ ne bɛ nwo nningyein mukoraa bawa wa.’

³³ Sɛ Faro frɛ ɛmɔ na obisa kyɛ, ‘Nzikyɛ adwuma yeɛ ɛmɔyɔ ɔ?’ a,

³⁴ ɛ́mɔbua ye kyɛ, ‘Ofi yɛ ngwadaa nu bɔ ɔbaadwu ɛnɛ ye, wɔ ngoaa mɔ de, yɛte mmoaenneafoɛ kyɛ yɛ nana mɔ ala.’ Sɛ ɔba ye sɔ a, ɔkɔmaa ɛmɔkɔtena Gosen mbɔtam, ofikyɛ Misraimfoɛ kyi mmoaenneafoɛ kɔkɔkɔkɔ.”