Gyenesise 41 - AHYERƐLƐ KRONGRON

Yosef kyire Faro laleɛ bo

¹ Afoɛ nyɔ mumua si, Faro hyene laleɛ kyɛ ogyi asue Naele noa.

² Mvum nu, onwuni kyɛ nandwie mmeleɛ branoa nzoo bɔ bɛ nwonaen tua bɛ ɔ fili asue Naele nu beedidili ngyɛngyɛma ne anu.

³ Na nandwie nzoo foforɛ bɔ bɛ nwo yɛ tɛ na bafofɔ nyangenaen, bɛ koso belili bɛ si befili asue Naele nu bɛwale beegyinane nandwie hene mɔ nwo wɔ Naele noa.

⁴ Na nandwie bɔ bɛ nwo yɛ tɛ na bafofɔ ne, bɛmemene nandwie branoa anwonyemene nemɔ. Afei Faro fili nnaa nu tingyele.

⁵ Osa fale nu lale. Ɔhyene laleɛ bieku, na onwuni kyɛ aburoo nzoo bɔ bahyẽ na bati paa wɔ bakaa ko aso.

⁶ Mvum nu, onwuni kyɛ aburoo nzoo bɔ bangye na eyia afiteleɛ mvrama akese bɛ ɔ afifi.

⁷ Na aburoo kesenewaa nemɔ memene aburoo nzoo bɔ bahyẽ nemɔ. Afei Faro nye tele, na onwuni kyɛ laleɛ yeɛ wahye ɔ.

⁸ Yiti aleɛ hyene ngyerɛmɔ ne, Faro yɛle basaa. Na ɔsomane maa bɛɛfrɛle Misraim ngonyaayelɛfoɛ amukoraa ne mmenia bɔ bɛse ase amukoraa bɛmane ye. Ɔhane ye laleɛ ne anu dwirɛ hyirele bɛ, nakoso bɛ nu biala angora ye bo kyire.

⁹ Yeɛ nzaasulɛfoɛ so panyi ne sele Faro kyɛ, “Makaye me mvomsoɛ ɛnɛ.

¹⁰ Nana, mmerɛ bɔ ɛfɛle wɔ ngoaa so yaa, na ɛhyele me ne paanootonɛfoɛ so panyi ne guale kuku nu wɔ angɔbeahene awuro ne,

¹¹ ɛlɛho bie kɔngɔen, yɛ munyɔ yɛhyene laleɛ. Asora ebiala laleɛ ɔne kyɛbɔ laleɛ ne bo kyire ɔ.

¹² Né Hebriniɛ aberandeɛ bie bɔ ɔte angɔbeahene akoaa boka yɛ so wɔ berɛ; na yɛhane yɛ laleɛ ne yɛhyirele ye ne, ohyirele yɛ laleɛ ne abo. Ohyirele yɛ bo kyɛbɔ ebiala laleɛ si te ɔ.

¹³ Na nikyee biala wale nu kyɛbɔ ohyirele ne ala: esa fale me dibea wurale me sa, na paanootonɛniɛ ne de, bɛbɔle ye kɔme.”

¹⁴ Yiti Faro somane maa bɛɛfrɛle Yosef bɛmane ye. Bɛyele ye befili kumaa nu kuku nu berɛ ndɛndɛ. Na Yosef poane ye kanza na ɔsesane ye ndaadeɛ yiele ne, ɔwale oogyinane Faro nyunu.

¹⁵ Na Faro sele Yosef kyɛ, “Mahye laleɛ bie, nakoso ebiala ngora ye bo kyire. Mate kyɛ wɔ de sɛ ebie ka ye laleɛ kyire wɔ a, ɛkora kyire ye bo.”

¹⁶ Yosef buale Faro kyɛ, “Nana, me de mengora ye bo kyire, na mmom Nyameɛ yeɛ ɔkɔma Faro nyeanoɛ paa ɔ.”

¹⁷ Yeɛ Faro ha hyirele Yosef kyɛ, “Tie, laleɛ ne anu, né ngyi asue Naele noa.

¹⁸ Na nwuni kyɛ nandwie mmeleɛ branoa nzoo bɔ bɛ nwo yɛ nyemene fili asue Naele nu beedidili ngyɛngyɛma ne anu.

¹⁹ Ye si ye, nandwie nzoo foforɛ bɔ bɛ nwo yɛ tɛ na bafɔ nyangenaen lili bɛ si wale. Nnwuni bɛ sɛso le wɔ Misraim aseɛ so nekaa biala.

²⁰ Na nandwie tɛɛtɛɛ nyangenaen nemɔ memene branoa nzoo bɔ belili moa bɛwale ne.

²¹ Nakoso bɛmemene bɛ beyiele ne, né hwee ngyire kyɛ bameme bɛ, ofikyɛ né bɛtɛte nyangenaen kyɛbɔ daa né bɛte ne ala. Na ndingyele.

²² Nza ngyene laleɛ nwuni aburoo nzoo bɔ bahyẽ paa, na bɛwɔ bakaa ko aso ɔ.

²³ Na ɛhe asi ne, nwuni kyɛ aburoo nzoo bɔ bangye, na eyia afiteleɛ mvrama amaa bakese ɔ afifi.

²⁴ Aburoo kesenewaa nemɔ memene aburoo nzoo bɔ bahyẽ paa nemɔ. Ngane laleɛ ye anu dwirɛ ngyirele ngonyaayelɛfoɛ nemɔ, nakoso bɛ nu biala wangora wangyire me ye bo.”

²⁵ Yeɛ Yosef sele Faro kyɛ, “Nana, laleɛ ne amunyɔ kyire nikyee ko. Nyameɛ aye bɔ ɔbaayɔ ɔ wahyire Faro.

²⁶ Nandwie branoa nzoo ne kyire afoɛ nzoo, yeɛ aburoo nzoo bɔ wahyẽ ne kyire afoɛ nzoo; laleɛ ne te ko.

²⁷ Nandwie tɛɛtɛɛ nyangenaen nzoo bɔ ye si ye bɛwale ne kyire afoɛ nzoo, aburoo tohwire tohwire bɔ eyia afiteleɛ mvrama amaa bakese ne koso kyire afoɛ nzoo bɔ ɛhɔen pohonandafe bie kɔwa ɔ.

²⁸ Na kyɛbɔ mahã mahyire Faro nen, Nyameɛ aye bɔ ɔbaayɔ wahyire Faro.

²⁹ Afoɛ nzoo kɔwa bɔ yeɛ aleɛ kobu wɔ Misraim aseɛ ye aso mukoraa ɔ.

³⁰ Nakoso ye si ye, ɛhɔen piri kɔwa afoɛ nzoo, bɔ yeɛ Misraim maen ye anu ama mukoraa bɛ wora kofi mmerɛ bɔ aleɛ buli ne ɔ; ɛhɔen kohũ maen ne anu ama amu.

³¹ Na ɔnate ɛhɔen piri bɔ ɔkɔwa ne ati, bɛngɔkaye aleɛ bɔ né wabu so wɔ maen ne anu po; ɛhɔen piri ne anu kɔyɛ se paa.

³² Faro hyene laleɛ mmɔhoɛ nyɔ. Ɛhe kyire kyɛ Nyameɛ ahyehyɛ ye sɔ amba, na ɔngɔhyɛ biala ɔkɔwa nu.

³³ Yiti Nana, neanea nu ye sona ko bɔ ye nye la ase na ɔse nworɛ ɔ, na maa oli Misraim maen ne aso.

³⁴ Nana, sisi mbanyi hwɛsofoɛ mɔ wɔ maen ye anu, na afoɛ nzoo bɔ aleɛ kobu ne, maa bɛhyɛ Misraim fieso nningyein nu nnu, ná betu ko.

³⁵ Maa bɛboaboa sɔ afoɛ bɔ aleɛ kobu ne anu aleɛ mukoraa noa. Nana, ma bɛ tumi maa bɛ́fa aburoo ne bégua pata so besie wɔ nguro nemɔ anu, na bɛ́bɔ ye nwo waen.

³⁶ Sɔ aburoo ne kɔyɛ aleɛ bɔ bɛ́fa bésie bɛnwondɛ ɛhɔen piri bɔ ɔkɔwa Misraim maen ne anu afoɛ nzoo ne, amaa ɔnate ɛhɔen piri ne ati maen ne ammɔ.”

Bɛbɔ Yosef amrado wɔ Misraim

³⁷ Faro ne ye mbanyi amu nwuni kyɛ sɔ nzusuleɛ ne te paa.

³⁸ Yeɛ Faro bisale ye mbanyi nemɔ kyɛ, “Aso yɛkonya sona bɔ ɔte sɔa bɔ Nyameɛ Sunzum te ye nu ɔ?”

³⁹ Yiti Faro sele Yosef kyɛ, “Ɔnate kyɛ Nyameɛ aye ɛhe amu wahyire wɔ ne ati, ebiala nne berɛ bɔ ole nimdeɛ na ɔse nworɛ kyɛ wɔ ɔ;

⁴⁰ Wɔ yeɛ ɛkɔnea nikyee biala so wɔ m’ahemvie wa ɔ, na wɔ noa dwirɛ yeɛ me mmenia amukoraa koli so ɔ, sana bia bɔ nde so ye ala yeɛ ngɔfa ngɔtra wɔ ɔ.”

⁴¹ Na Faro sele Yosef kyɛ, “Nea, mafa Misraim maen ye amukoraa mawura wɔ sa.”

⁴² Yeɛ Faro yele ye nzɔanoɛ pɛteaa fili ye sa, ɔfa wurale Yosef, ɔfale kende herale ye, na ɔfale sikaa kɔkorɛ atweaban yale ye.

⁴³ Ɔfale ye tenane ye teaseɛnam bɔ ɔtɔ so nyɔ ne anu, na bɛteane nu belili ye nyunu kyɛ, “Ebiala koto ye oo!” Na ɔnate so fale Misraim maen ne amukoraa bewurale ye sa.

⁴⁴ Afei Faro sele Yosef kyɛ, “Me yeɛ nde Faro ɔ; ebiala ngɔhora ngɔyɔ hwee wɔ Misraim aseɛ so, sana ama ye ate.”

⁴⁵ Faro tole Yosef dumaa Safenate Panea, na ɔfale On sɔfo Pɔtifɛra awa brasua Asenate maa ogyale. Na Yosef neane aseɛ ne aso amukoraa.

⁴⁶ Yosef hyɛle ye adwuma abo wɔ Misraim hene Faro ahemvie ne, né wali afoɛ aburasa. Na Yosef fili Faro awuro berɛ ɔɔpasale Misraim maen ne anu mukoraa.

⁴⁷ Aseɛ ne hyene aleɛ paa wɔ sɔ afoɛ nzoo bɔ aleɛ buli ne anu.

⁴⁸ Sɔ afoɛ nzoo bɔ aleɛ buli ne, Yosef boaboale aleɛ bɔ benyane ye wɔ Misraim aseɛ so amukoraa noa, na ɔfa siele nguro mbiri nemɔ anu. Eboo mɔ bɔ bapɛ kuro piri biala nwo bayia ne, ɔfale nu aleɛ siele sɔ kuro piri ne anu.

⁴⁹ Na Yosef boaboale aburoo pee bɔ ye somaa te kyɛ mboanoa anweaa noa, kɔpem kyɛ bɛyakyili ye halɛ ɔ, ofikyɛ né ɔsone soma.

⁵⁰ Yosef ne On sɔfo Pɔtifɛra awa Asenate bɛwole mmaa mmienzua nyɔ koraka yeɛ ɛhɔen piri ne ɔ́hyɛ ye bo ɔ.

⁵¹ Yosef tole bamuɛbaa ne dumaa Manase, ofikyɛ ɔnwa, “Nyameɛ ama me wora afi me yealɛ amukoraa, ɔne me se awuro ama mu.”

⁵² Ɔtole bɔ ɔtɔ so nyɔ ne dumaa Efraim, ofikyɛ ɔnwa, “Nyameɛ amaa manya mmaa wɔ aseɛ bɔ amaneɛnwunɛ wɔ so ye aso.”

⁵³ Afoɛ nzoo bɔ aleɛ buli wɔ Misraim aseɛ so ne wale ayieleɛ,

⁵⁴ na afoɛ nzoo bɔ ɛhɔen piri wɔ nu paa ne hyɛle ye bo, kyɛbɔ Yosef hane ne. Ɛhɔen piri wale aseɛ mukoraa so, nakoso Misraim aseɛ so amukoraa de, né bele aleɛ.

⁵⁵ Ɛhɔen ne dwuli Misraim nekaa biala, na mmenia beesuni ɛhɔen behyirele Faro. Na Faro sele Misraimfoɛ ne amu kyɛ, “Ɛmɔhɔ Yosef berɛ, na bɔ okose ɛmɔ ne biala, ɛ́mɔyɔ.”

⁵⁶ Ɛhɔen piri ne trɛle hɔle maen ne nekaa biala, yiti Yosef bukyebukyele pata mbiri nemɔ, na ɔtɔnene aburoo ne bie mane Misraimfoɛ nemɔ, ofikyɛ né ɛhɔen piri ne noa yɛ se paa wɔ Misraim aseɛ so.

⁵⁷ Na ewiase mmenia mukoraa wale Yosef berɛ wɔ Misraim bɛɛtɔle aburoo, ofikyɛ né ɛhɔen piri ne noa yɛ se paa wɔ aseɛ ne aso nekaa biala.