Gyenesise 34 - AHYERƐLƐ KRONGRON

Sɛkem to Dina mmɔnaa

¹ Ɛlɛho bie, Lea ne Yakob bɛ wa brasua bɔ bɛfrɛ ye Dina ne, ofitele kyɛ ɔkwaapasa aseɛ ne aso mmrasua nemɔ anwo.

² Hiwiniɛ Hamɔ bɔ ɔte aseɛ ne aso hene ne, ɔwa Sɛkem nwuni Dina, na ɔhyɛle ye ɔne ye bɛlale.

³ Na Sɛkem nye gyele Yakob awa brasua Dina nwo, ohurole taluwa ne, na ɔkorɔkorɔle ye.

⁴ Yiti Sɛkem sele ɔse Hamɔ kyɛ, “Kogya taluwa ye ma me.”

⁵ Yakob tele kyɛ Sɛkem ato ɔwa brasua Dina mmɔnaa, nakoso ɔnate kyɛ né ye mma mmienzua nemɔ bafa nandwie bahɔ adidie wɔ eburo ne ati, ɔyɛle konn kɔpem kyɛ besa bɛwale awuro ɔ.

⁶ Na Sɛkem baba Hamɔ hɔle Yakob berɛ kyɛ ɔne ye bɛkwaali ngɔmɔ.

⁷ Yakob mma mmienzua nemɔ tele bɔ wasi ne, befili eburo dɔ bɛwale. Ɔyɛle bɛ yea, na bɛfɛle yaa paa ofikyɛ Sɛkem ali ngwaseasɛm wɔ Yisrael; wayɔ bɔ bɛnyɔ ɔ, kyɛ ɔne Yakob awa brasua ala ɔ.

⁸ Nakoso Hamɔ sele bɛ kyɛ, “Mma Sɛkem kuro ɛmɔ awa brasua ne. Mesrɛ ɛmɔ, ɛ́mɔfa ye bɛma ogya.

⁹ Ɛ́mɔma yɛ́gyigya yɛ nwo; ɛ́mɔfa ɛmɔ mma mmrasua bɛ́ma yɛ́gya, na ɛmɔ koso ɛ́mɔgyigya yɛ deɛ mɔ.

¹⁰ Ɛmɔ ne yɛ bɛ́tena, na aseɛ yeɛ ɔla berɛ ye, ɛ́mɔtena so na ɛ́mɔyɔ so adwuma, na ɛ́mɔnya so agyapadeɛ.”

¹¹ Sɛkem toale so sele Dina baba ne Dina aliɛma mmienzua nemɔ kyɛ, “Ɛ́mɔpene so bɛ́ma me, na bɔ ɛmɔpena biala ngɔfa ngɔma ɛmɔ.

¹² Ɛ́mɔma nwu agyaa ne nwo nningyein ne akyɛdeɛ biala bɔ ɛmɔpena ɔ, na ngɔma kyɛbɔ ɛmɔkɔha kohyire me biala; bɔ mepena ala ole kyɛ ɛ́mɔfa taluwa ne bɛma ngya ye.”

¹³ Ɔnate kyɛ Sɛkem ato Dina mmɔnaa ne ati, Yakob mma mmienzua nemɔ buale Sɛkem ne ɔse Hamɔ wɔ nnakannaka atee so.

¹⁴ Bebuale bɛ kyɛ, “Yɛyɔ ye sɔ a ɔngɔyɛ yee! Ɔte animguaseɛ ma yɛ kyɛ yɛkɔfa y’eliɛma brasua yɛkɔma sona bɔ ɔppɛle ye bienzua ɔ.

¹⁵ Nikyee komapɛ yeɛ ɔkɔmaa yɛkɔpene ɔ: kyɛ ɛmɔ anu biala kɔpɛ ye bienzua na ɛmɔayɛ kyɛ yɛ ala ɔ.

¹⁶ Sɛ ɛmɔyɔ sɔ de a, yɛkɔfa yɛ mma mmrasua yɛkɔma ɛmɔ agyaa, na yɛ koso yagyigya ɛmɔ mma mmrasua, na yɛ ne ɛmɔ atena, na yayɛ mmenia ko.

¹⁷ Na sɛ ɛmɔngɔpene maa bɛngɔpɛ ɛmɔ bienzua de a, ye de yɛfa yɛ wa brasua ne, na yɛkɔ.”

¹⁸ Bɛ dwirɛ ne yɛle Hamɔ ne ɔwa Sɛkem fɛ.

¹⁹ Na ɔnate kyɛ né aberandeɛ Sɛkem nye gye Yakob awa brasua ne nwo ne ati, wanyɛ bɛ nzusuleɛ ne nwo ngyɛkyerɛ koraa. Né Sɛkem yeɛ ɔte titire paa wɔ ye abusua nu ɔ.

²⁰ Yiti Hamɔ ne ɔwa Sɛkem bɛhɔle bɛ kuro n’anoa nu dɔ, na besele kuro berɛ mmienzua ne kyɛ,

²¹ “Sɔ mmenia ye mɔ, bɛ ne yɛ te asomdwee nu, yiti ɛ́mɔma bɛ́tena aseɛ ye aso na beli bɛ dwaa. Aseɛ ne la berɛ pralalala ma bɛ, yiti ɛ́mɔma yɛ́gyigya bɛ mma mmrasua, na yɛ koso yɛfa yɛ deɛ mɔ yɛma begya.

²² Nakoso nikyee komapɛ yeɛ sɛ yɛyɔ a mmenia nemɔ kɔpene so na bɛ ne yɛ atena maa yayɛ mmenia ko ɔ: kyɛ yɛ nu biala kɔmaa bɛkɔpɛ ye bienzua kyɛbɔ bapɛ bɛ deɛ ne ɔ.

²³ Aso bɛ nandwie, b’agyapadeɛ ne bɛ nyɛmmoa mukoraa ngɔyɛ yɛ deɛ? Ɛmɔ de ɛ́mɔma yɛne bɛ yɛyɛ adwene, na bɛ ne yɛ kɔtena.”

²⁴ Na bɛ bɔ beeyiale kuro n’anoa nu amukoraa tiele bɔ Hamɔ ne ɔwa Sɛkem hane ne. Yiti mmienzua ne amukoraa, bɔ beeyiale kuro n’anoa nu berɛ ne, bɛpepɛle bɛ bienzua.

²⁵ Ye ɛlɛsa ne aso bɔ bɛ kena ne tutu bɛ nen, Yakob mma nemɔ anu nyɔ bɔ beli Simeon ne Lewi, bɔ bɛte Dina aliɛma mmienzua ne, bɛhwehwene bɛ ngrandɛ. Bɛhɔle kuro ne aso mvum nu, na behuhuni mmienzua ne amukoraati.

²⁶ Bele ngrandɛ behuni Hamɔ ne ɔwa Sɛkem, na bɛɛyele Dina befili Sɛkem awuro bɛhɔle.

²⁷ Yakob mma mmienzua nemɔ fitele awufoɛ nemɔ aso ne, bɛfene kuro ne anu nningyein, ofikyɛ Sɛkem agua b’eliɛma brasua ne anwo fiɛ.

²⁸ Bɛsesale bɛ mmoaen ne bɛ nandwie ne b’afunum mɔ, ɔne nikyee biala bɔ ɔwɔ kuro ne fieso ɔ.

²⁹ Bɛsesale b’awuro nningyein amukoraa, bɛhyele bɛ mma ne bɛ ye mɔ amukoraa nnure, na bɛsesale b’anwonyadeɛ amukoraati.

³⁰ Na Yakob sele Simeon ne Lewi kyɛ, “Ɛmɔahwe edwirɛ piri babrɛ me. Ɛmɔamaa manya ɛpɔen wɔ bɛ bɔ bɛte aseɛ ye asofoɛ ne Kanaanfoɛ ne Perisifoɛ bɛ sa nu. Me nwo mmenia anzo. Na sɛ bɛyɛ ko na bɛboaboa bɛ noa bedwɔso betia me a, bekonua me ne m’awuro ama mukoraa bo.”

³¹ Nakoso bebuale kyɛ, “Né yiti yɛtena berɛ ma ɔyɛ y’eliɛma brasua ne kyɛ gyanderaniɛ anaa?”