Gyenesise 33 - AHYERƐLƐ KRONGRON

Yakob ne Yisɔ beyia

¹ Yakob mane ye ti so, na onwuni kyɛ Yisɔ ɔ́ba ɔ. Né mmienzua ɛyaa nna boka Yisɔ so. Yiti Yakob hyɛle ngwadaa nemɔ anu mane Lea ne Rahɛl ne afaneɛ nyɔ nemɔ.

² Ɔmane afaneɛ nemɔ ne bɛ mma mɔ lili anyunu, Lea ne ye mma bɛtoale so, yeɛ Rahɛl ne Yosef belili nziɛ paa ɔ.

³ Ye bɔbɔ de olili bɛ mukoraa bɛ nyunu moa, na ɔbɔle ye nu ase hɔle ase fɛmm pɛen nzoo kɔpem kyɛ opingyele oliɛma ne ɔ.

⁴ Nakoso Yisɔ le amirika ooyiale ye, ɔtɔle ye nu, na ɔfale ye ti tole ye kɔme anwo fele ye noa. Na bɛ munyɔ besuni.

⁵ Yisɔ mane ye ti so, na onwuni mmrasua ne ngwadaa nemɔ nen, obisale kyɛ, “Na ɛhemɔ bɔ bɛboka wɔ so ye, nwa mɔ ɛne?” Yakob buale ye kyɛ, “Ngwadaa bɔ Nyameɛ afa bɛ alo w’akoaa hɔ ɛne.”

⁶ Mmerɛ bɔ afaneɛ nemɔ ne bɛ mma mɔ pingyele berɛ ne, bɛbɔle bɛ nu ase.

⁷ Sɔ ala yeɛ Lea ne ye mma mɔ koso bepingyele berɛ ne, bɛbɔle bɛ nu ase ɔ. Na afei bɔ ɔpɛ ye bo ɔ, Yosef ne Rahɛl koso bepingyele berɛ, na bɛbɔle bɛ nu ase.

⁸ Yisɔ bisale kyɛ, “Na ngaka kure pee bɔ nyiale bɛ ne koso, ye bo ole sɛɛ?” Yakob buale kyɛ, “Kyɛbɔ ɔkɔyɛ na ale me ato nu ɔ.”

⁹ Nakoso Yisɔ sele kyɛ, “Maa ɔwɔ berɛ nniɛma, na bɔ nne ye ne ala ɔsone.”

¹⁰ Yakob sele kyɛ, “Daabi, mesrɛ wɔ, sɛ anya ale me ato nu a, nzaade, de me sa nu akyɛdeɛ ye; nahorɛ nu, wɔ nyunu bɔ manwu ye po ɔte kyɛ manwu Nyameɛ nyunu ɔ, ɔnate kyɛ ale me ato nu.

¹¹ Mesrɛ wɔ, sɔ m’akyɛdeɛ bɔ mafa mabrɛ wɔ ye anu, ofikyɛ Nyameɛ alo me paa, na hwee nhia me. Yiti ɔsrɛle ye maa olele.

¹² Yeɛ Yisɔ hane kyɛ, “Maa yɛpe atee so, na ngoli wɔ nyunu.”

¹³ Nakoso Yakob sele ye kyɛ, “Me mene se kyɛ ngwadaa nemɔ bɛ mve ottini, yeɛ mmoaen ne nandwie bɔ bɛ mma tua nyɔfone noa koso boka me so; na sɛ yɛmaa bɛnate pee ɛlɛho a, ngaka ne amu kowuwu.

¹⁴ Yiti me mene, se di w’akoaa nyunu. Me de meto me bo ase me ne nyɛmmoa ne ngwadaa bɔ bɛboka me so ne yɛdi wɔ si ngaka ngaka, kɔpem kyɛ ngoodwu wɔ berɛ wɔ Sɛre ɔ.”

¹⁵ Na Yisɔ sele kyɛ, “Maa me mmenia ne bie bɛboka wɔ so.” Nakoso Yakob hane kyɛ, “Aso ye nwo hia? Me mene, wɔ de kɔ so do me ala.”

¹⁶ Yiti Yisɔ sale ye si sɔ kyẽa ne ala kyɛ ɔkɔ Sɛre.

¹⁷ Nakoso Yakob de ɔtoale so hɔle Sukote, na osili ye awuro wɔ berɛ, na osisili tuin mane ye nandwie mɔ; yiti bɛfrɛ berɛ Sukote.

¹⁸ Yakob fili Padan Aram oodwuli Sɛkem bɔ ɔwɔ Kanaan aseɛ so asomdwee nu, na ɔkyekyele ɛtena sua wɔ kuro ne nyunu.

¹⁹ Na ɔtɔle aseɛ bɔ osili ye ɛtena sua wɔ so ne fili Sɛkem baba Hamɔ mma nemɔ berɛ. Ɔtɔle ye esikaa ɛdwetɛ ɛyaa ko.

²⁰ Osili afɔleɛ bokyea berɛ, na ɔfrɛle ye Ɛl Elohe Yisrael.