Gyenesise 3 - AHYERƐLƐ KRONGRON

Kuro sona asefinɛ

¹ Né ewoo te kanda tra eburo kaka biala bɔ AWURADE Nyameɛ ayɔ ɔ. Na obisale braa ne kyɛ, “Yiti Nyameɛ aha kyɛ, ‘Nnɛma ɛmɔdi turo ye anu bakaammaa biala bie’?”

² Na braa ne buale ewoo ne kyɛ, “Atee wɔ berɛ kyɛ yɛdi turo ne anu mmakaammaa ne bie;

³ nakoso Nyameɛ nwa: ‘Bakaa bɔ ogyi turo n’afia ne mma de, nnɛma ɛmɔdi bie, yeɛ nnɛma ɛmɔfa bɛ sa bɛka ye. Sɛ ɛmɔdi a, ewue yeɛ ɛmɔkowu ɔ.’ ”

⁴ Nakoso ewoo ne sele braa ne kyɛ, “Ɛmɔngowu biala.

⁵ Ofikyɛ Nyameɛ se kyɛ kyẽa bɔ ɛmɔkoli bie ne, ɛmɔ nye kobukye, na ɛmɔkɔyɛ kyɛ Nyameɛ ala, na ɛmɔanwu paa ne bɔne.”

⁶ Na braa ne nwuni kyɛ saa bedi bakaa ne mma a ɔyɛ yee, ɔyɛ nyemene, na ɔkora ma sona nwu nworɛ. Yiti ɔtele ye mma ne bie lili, ɔmane ohu ne koso bie, na ye koso olili.

⁷ Afei bɛ munyɔ bɛ nye wale bɛ nwo so, na benwuni kyɛ bɛ nwo lela so; yiti bɛpale borɔdoma nyaa bɛfa bɛkatale bɛ nwo.

⁸ Na aleɛ dwole ne, bɛtele AWURADE Nyameɛ gya boso kyɛ ɔnatenate turo ne anu, yiti biaa ne ne ɔye ne bɛɛfeale AWURADE Nyameɛ wɔ turo nu berɛ mmakaa ne anu.

⁹ Nakoso AWURADE Nyameɛ frɛle biaa ne bisale ye kyɛ, “Ɛwɔ nisua?”

¹⁰ Na biaa ne buale kyɛ, “Ndele wɔ gya boso wɔ turo ne anu, na ɛserɛ hane me, ofikyɛ né me nwo la so, yiti ngɔmveale.”

¹¹ Na Nyameɛ bisale ye kyɛ, “Nwa yeɛ osele wɔ kyɛ wɔ nwo la so ɔ? Bakaa bɔ nganzole wɔ kyɛ nnɛdi ye mma ne bie ne, ali bie hɔ ɔ?”

¹² Na biaa ne buale kyɛ, “Braa ne bɔ ɛfale ye ɛɛbokale me so ne, ye yeɛ ɔfale bakaa ne mma ne mane me ɔ, yeɛ me koso nnili ɔ.”

¹³ Na AWURADE Nyameɛ bisale braa ne kyɛ, “Nzikyɛ nikye yeɛ ayɔ ye?” Na braa ne buale kyɛ, “Ewoo ne yeɛ ɔlakalakale me maa nnili ɔ.”

¹⁴ Na AWURADE Nyameɛ sele ewoo ne kyɛ, “Ɔnate ɛhe bɔ ayɔ ne ati, musue to wɔ wɔ kuro ngaka mukoraa, ɔne eburo ngaka mukoraa nu. Ɛkɔhwe wɔ nwo ase wɔ ko so, na ekoli nnɛterɛ w’asetena nu amukoraa.

¹⁵ Ngɔfa ɛpɔen ngɔto wɔ ne braa n’afia, yeɛ wɔ boso ama ne ye boso ama b’afia; ɔkɔgyerɛgyerɛ wɔ ti, na wɔ wora aha ye gya si.”

¹⁶ Na braa ne wora, Nyameɛ sele ye kyɛ, “Ngɔmaa ɛkɔte aworɛ nu yealɛ paa, na yealɛ nu yeɛ ɛkɔwo mmaa ɔ. Nakoso wɔ wora kɔlɔ ehu, na okoli wɔ so.”

¹⁷ Na Nyameɛ sele Adam koso kyɛ, “Kyɛbɔ atie bɔ ɛye hane, na ali bakaa bɔ nganzole wɔ kyɛ ‘nnɛdi ye mma ne bie’ ne ati, ɔnate wɔ ti, musue aha aseɛ. Na ɛfɛɛ paa yeɛ ɛkɔfɛ koraa né adidi so w’asetena mukoraa nu ɔ.

¹⁸ Okofifi mmowue ne ɛfone kɔma wɔ, na eburo mmakaa so aleɛ yeɛ ekoli ɔ.

¹⁹ Mvifire kosongyi wɔ ti anwo koraka né anya aleɛ ali, kɔpem kyɛ ekosa kɔhɔ nnɛterɛ nu ɔ; ofikyɛ nnɛterɛ nu yeɛ nyele wɔ mvili ɔ, ɛte nnɛterɛ, na nnɛterɛ nu ala yeɛ ekosa kɔhɔ ɔ.”

²⁰ Na biaa ne tole ɔye ne dumaa Hawa, ofikyɛ ɔte teasefoɛ mukoraati bɛ ni.

²¹ Na AWURADE Nyameɛ fale nwomaa pombale ɛtena mane Adam ne ɔye maa bɛherale.

Nyameɛ foa Adam ne Hawa fi Eden

²² Afei AWURADE Nyameɛ sele kyɛ, “Nea, kuro sona ne ayɛ kyɛ yɛ nu ko ala, wanwu paa ne bɔne. Annea a, né watengyɛ ye sa wate ngoa bakaa ne koso bie wali, ná watena ase daa.”

²³ Yiti AWURADE Nyameɛ foane ye fili Eden turo ne anu, kyɛ ɔɔyɔ kua wɔ aseɛ bɔ ɔyele ye fili nu ne aso.

²⁴ Ɔfoane kuro sona ne fili berɛ, na ɔfale kɛrubim, ɔne ngrandɛ bɔ ogye wuronyiwuronyi, na osa pɛ ye nwo osiele Eden turo ne nyunu wɔ eyia afiteleɛ, kyɛ ɔbɔ atee bɔ ɔkɔ ngoa bakaa ne nwo waen.