Gyenesise 28 - AHYERƐLƐ KRONGRON

¹ Yiti Yisake frɛle Yakob na oyirale ye, na ɔkanzole ye kyɛ, “Nnɛgya Kanaanniɛ brasua biala.

² Dwɔso kɔ wɔ maame ase Betuel awuro wɔ Padan Aram na kogya wɔ wɔfa Laban ye mma mmrasua nemɔ nu ko.

³ Ɛdangama Nyameɛ óyira wɔ ná ɔma ɛwo, ná wɔ boso ɔtrɛ, amaa ɔnate so ayɛ maen maen pee bɛ nana.

⁴ Ɔ́ma wɔ ne wɔ bosofoɛ bɛ sa ha Abraham saleɛ ne, amaa ɔnate so ɛmɔ sa aha aseɛ bɔ yeɛ Nyameɛ fa mane Abraham, bɔ yeɛ aayɛ so ɛwɔfoɛ ye.”

⁵ Yiti Yisake guale Yakob ate maa ɔhɔle. Yakob hɔle Aramniɛ Betuel awa Laban berɛ wɔ Padan Aram. Laban te Yisɔ ne Yakob ani Rebɛka aliɛma bienzua.

Yisɔ gya braa bieku

⁶ Na Yisɔ tele kyɛ Yisake ayira Yakob na wamaa wahɔ Padan Aram kyɛ oogya braa dɔ. Ɔtele kyɛ óyira ye ne, ɔkanzole ye kyɛ, “Nnɛgya Kanaanfoɛ mmrasua nemɔ nu bie,”

⁷ na ɔnate sɔ ati Yakob ayɛ sotie ama ɔse ne oni na wahɔ Padan Aram.

⁸ Yiti Yisɔ nwuni kyɛ Yisake nye ngye Kanaan mmrasua nemɔ nwo ne,

⁹ ɔhɔle Abraham awa Yismael dɔ, na oogyale Yismael awa brasua Mahalate bokale ɔye mɔ aso. Né Mahalate te Nebayote aliɛma brasua.

Yakob kye laleɛ wɔ Betel

¹⁰ Yakob fili Beɛ Hyeba na ɔfale ye nye hyirele Haran.

¹¹ Odwuli nekaa bie, na ɔtenane berɛ kɔngɔen ne, ofikyɛ né aleɛ adwo. Ɔfale berɛ nyɔboɛ ne ko suane, na ɔlale berɛ.

¹² Ɔhyene laleɛ, onwuni atweleɛ bie bɔ ofi aseɛ so kɔka nyameɛso ɔ, na né Nyameɛ abɔfo mɔ bɛfo bedwu wɔ so!

¹³ Ɛlaleɛ ne anu, né AWURADE gyi ye ti sorɔ, na osele kyɛ, “Me ole AWURADE, wɔ nana Abraham ye Nyameɛ bɔ ɔte Yisake koso ye Nyameɛ ne. Ngɔfa aseɛ he bɔ yeɛ ɛla so kekesaala ye ngɔma wɔ ne wɔ bosofoɛ.

¹⁴ Wɔ bosofoɛ kɔsone kyɛ aseɛ so mvuture. Na wɔ boso kɔtrɛ kofi eyia afiteleɛ koodwu eyia atɔleɛ; fi sorɔ kodwu ngwaen, na ɔnate wɔ ne wɔ bosofoɛ so yeɛ ewiase mmenia amu konya saleɛ ɔ.

¹⁵ Nea, ngyi wɔ si na ngɔbɔ wɔ nwo waen nekaa biala bɔ ɛkɔhɔ ɔ, na ngosa ngɔfa wɔ ngɔwa aseɛ ye aso. Ofikyɛ mengɔyakyi wɔ nu kɔpem kyɛ ngɔyɔ bɔ mafa mahyɛ wɔ bɔ ne amu ɔ.”

¹⁶ Yakob fili nnaa nu tingyele na osele kyɛ, “Amba, AWURADE wɔ wa, yeɛ saa né menze ye!”

¹⁷ Ɛserɛ hane ye, na osele kyɛ, “Kyɛ ɛwa yɛ suro paa hɔ ɛhe! Nna hwee kyɛ Nyameɛ awuro ɔ, nyameɛso anoa ɔ.”

¹⁸ Yiti Yakob dwɔsole ngyerɛmɔ tutututu, na ɔfale nyɔboɛ bɔ ɔfa suane ne, na ɔfa penane berɛ kyɛ ngayeɛ nyɔboɛ, na ohwiele ngoo guale so.

¹⁹ Na ɔfrɛle berɛ Betel, nakoso daa ne de, né bɛfrɛ kuro ne Luse.

²⁰ Yeɛ Yakob hyɛle Nyameɛ bɔ kyɛ, “Sɛ Nyameɛ kogyina me si, na ɔkɔnea me so wɔ m’ateetulɛ ye anu, na ɔkɔma me aleɛ maa ngoli ɔne ɛtena maa ngɔhera,

²¹ na ɔmaa mesa meba me se awuro asomdwee nu a, ye de AWURADE kɔyɛ me Nyameɛ.

²² Na nyɔboɛ he bɔ mafa mapena berɛ mayɛ ngayeɛ nyɔboɛ ye kɔyɛ Nyameɛ awuro, na nikyee biala bɔ ɛkɔma me ne, ngɔma wɔ so buru nu ngyɛmuɛ ko.”