Gyenesise 23 - AHYERƐLƐ KRONGRON

Sara wue ne ye sielɛ

¹ Sara afoɛ bɔ olili amukoraa te ɛyaa ko ne aburanyɔ ne nzoo.

² Sara wuli wɔ Kiriate Aba, (bɔ osa li Hebron), bɔ ɔwɔ Kanaan aseɛ so. Na Abraham oosuni Sara lili ye nwo yealɛ.

³ Abraham dwɔsole yakyili ɔye fuin ne berɛ, na osele Hitifoɛ nemɔ kyɛ,

⁴ “Nde ɛwɔfoɛ ne amanvraniɛ wɔ ɛmɔ nu wa. Ɛ́mɔma me ɛmɔ aseɛ ne bie ma mva nyɛ asieleɛ, na nzie me fuin ne ma ofi berɛ.”

⁵ Na Hitifoɛ ne buale Abraham kyɛ,

⁶ “Yɛ mene, tie bɔ yɛkã ye. Ɛte sona titire wɔ yɛ nu wa. Sie wɔ fuin ne wɔ yɛ asieleɛ biala bɔ ekuro ɔ so. Yɛ nu biala ngɔfa ye asieleɛ ngɔbɔ wɔ atianuserɛ, anaa ongosi wɔ ate wɔ wɔ fuin ne sielɛ nu.”

⁷ Abraham dwɔsole, na ɔbɔle ye ti ase mane Hitifoɛ nemɔ, bɔ bɛte aseɛ ne asofoɛ ne.

⁸ Na osele bɛ kyɛ, “Sɛ ɛmɔkuro kyɛ mesie me fuin ne maa ofi berɛ a, nzaade mesrɛ ɛmɔ, ɛ́mɔsrɛ Soha awa Efron

⁹ bɛma ɔfa nyɔboɛ bɔ wasi sua wɔ Makepɛla ne ɔma me. Ye deɛ ɔ, na ɔwɔ ye aseɛ ne noa. Kyɛbɔ ɔkɔfa kole ne, ɛ́mɔma ole ye ɛmɔ nyunu wa, na mva nyɛ asieleɛ wɔ ɛmɔ wa.”

¹⁰ Né Hitiniɛ Efron boka Hitifoɛ nemɔ so wɔ berɛ bie, na Efron buale Abraham mane Hitifoɛ amukoraa bɔ bawa kuro ne anoa nu berɛ ne tele kyɛ,

¹¹ “Me mene, daabi, tie me kãa. Mefa aseɛ ne mema wɔ, na nyɔboɛ bɔ wasi sua wɔ nu ne koso mefa mema wɔ. Mefa mema wɔ wɔ me mmenia ye anyunu wa. Fa sie wɔ fuin ne.”

¹² Na Abraham bɔle ye ti ase wɔ aseɛ ne asofoɛ nyunu,

¹³ na osele Efron mane Hitifoɛ ne tele kyɛ, “Wɔ koso tie bɔ meka ye. Ngotua aseɛ ne kerɛ, maa ndua wɔ kerɛ, na mahora masie me fuin ne berɛ.”

¹⁴ Na Efron buale Abraham kyɛ,

¹⁵ “Me mene, tie, aseɛ ye nyɔboɛ te ɛdwetɛ sekel ɛyaa nna, ɔte nzu koraa wɔ yɛ munyɔ y’afia? Sie wɔ fuin ne wɔ so.”

¹⁶ Abraham ne Efron yɛle adwene, na ɛdwetɛ bɔ Efron bɔle ye dumaa mane Hitifoɛ tele ne, Abraham karili fa mane Efron: ɛdwetɛ kilo nna ne bue, kyɛbɔ né dwadifoɛ bɛ sikaa bɔ bedi ne ɔte ɔ.

¹⁷ Yiti Efron aseɛ bɔ ɔla Makepɛla, bɔ ɔwɔ Mamre ndendeneɛ so ne, aseɛ ne nyɔboɛ bɔ wasi sua wɔ nu ne, ɔne so mmakaa mukoraa, bɔ ɔkwaadwu ye ɛwɛen so ne,

¹⁸ ɔɔyɛle Abraham deɛ wɔ Hitifoɛ nyunu, wɔ bɛ bɔ né bayia kuro ne tiwaa berɛ ne amukoraa nyunu.

¹⁹ Na ɛhe asi ne, Abraham siele ɔye Sara wɔ nyɔboɛ bɔ wasi sua nu, wɔ Makepɛla, wɔ Mamre ndendeneɛ so (mekyire Hebron), wɔ Kanaan aseɛ so.

²⁰ Yiti Hitifoɛ nemɔ fale aseɛ ne, ɔne nyɔboɛ bɔ wasi sua wɔ nu ne bɛmane Abraham kyɛ ɔfa yɛ asieleɛ.