Gyenesise 22 - AHYERƐLƐ KRONGRON

Nyameɛ so Abraham nea

¹ Ɛhemɔ asi ne, Nyameɛ sole Abraham neane. Ɔfrɛle ye kyɛ, “Abraham!” Na Abraham surole kyɛ, “Me ɛhe.”

² Na Nyameɛ sele kyɛ, “Fa ɛwa ne, ɛwa komapɛ twe Yisake, bɔ ɔla w’ahone nwo ne, kɔ Moria aseɛ so, ná fa ye bɔ naen yeralɛ afɔleɛ wɔ berɛ, wɔ mmokaa nemɔ nu ko bɔ ngohyire wɔ ne aso.”

³ Yiti Abraham dwɔsole ngyerɛmɔ tutuutu, osiesiele ye afunum ne, na ɔfale ye somvoɛ nemɔ nu nyɔ, ɔne ɔwa Yisake bokale ye nwo so. Ɔpakyele eyein bɔ ɔkwaafa bɔ naen yeralɛ afɔleɛ ne, na osili nu hɔle nekaa bɔ Nyameɛ hyirele ye kyɛ ɔhɔ ne.

⁴ Ye ɛlɛsa ne aso, Abraham tole ye nye anwuro, na onwuni sɔ nekaa ne kyɛ ɔwɔ dedeede.

⁵ Na Abraham sele ye somvoɛ nemɔ kyɛ, “Ɛmɔ ne afunum ne bɛtena wa; na me ne akwadaa ye yɛkwaasɔne Nyameɛ wɔ moa dɔ, na yɛkosa yɛkɔwa ɛmɔ nwo wa.”

⁶ Abraham fale eyein bɔ ɔkwaafa bɔ naen yeralɛ afɔleɛ ne soale ɔwa Yisake, na ye koso ɔfale see ne dadeɛ ba ne tirale. Na bɛ munyɔ besili nu bɔ bɛ́kɔ nen,

⁷ Yisake frɛle ɔse Abraham kyɛ, “Baba!” Na osurole kyɛ, “Mma, me ɛhe!” Na Yisake bisale kyɛ, “See ne eyein ne ɛhe, na boaen bɔ yɛkwaafa yɛbɔ naen yeralɛ afɔleɛ ne wɔ nisua?”

⁸ Na Abraham buale kyɛ, “Mma, Nyameɛ bɔbɔ yeɛ okohyire boaen bɔ yɛfa yɛbɔ naen yeralɛ afɔleɛ ne ɔ.” Na bɛ munyɔ besili nu bɛhɔle.

⁹ Na bedwuli nekaa bɔ Nyameɛ hyirele Abraham nen, Abraham sili afɔleɛ bokyea berɛ, na ɔfale eyein ne guaguale so yé. Afei ɔkyekyele ɔwa Yisake, na ɔfale ye tole eyein ne aso wɔ afɔleɛ bokyea ne aso.

¹⁰ Afei Abraham tole ye sa fale dadeɛ ba ne kyɛ oku ɔwa ne.

¹¹ Nakoso AWURADE abɔfo ne frɛle ye fili nyameɛso kyɛ, “Abraham! Abraham!” Na osurole kyɛ, “Me ɛhe.”

¹² Na ɔhane kyɛ, “Nnɛfa wɔ sa ka akwadaa ne, yeɛ nnɛyɔ ye hwee, ofikyɛ afei de manwu kyɛ esuro Nyameɛ, na amva ɛwa komapɛ twe ne ammɔ me aheɛ.”

¹³ Abraham mane ye nye so, na yieee, onwuni boaen nyii bie [wɔ ye si dɔ], bɔ ndire asosɔ ye mmɛen nu akyekye ye abɔ berɛ ɔ. Abraham hɔle ɔɔfale boaen nyii ne, na ɔfale boaen ne mmom sili ɔwa ne gya nu ɔbɔle naen yeralɛ afɔleɛ ne.

¹⁴ Yiti Abraham tole berɛ dumaa “Adonai Yire, [anaa AWURADE kohyire].” Na ɛnɛ ne ɛnɛ ye po, mmenia ka kyɛ, “AWURADE bokaa ne aso yeɛ okohyire ɔ.”

¹⁵ Na AWURADE abɔfo ne frɛle Abraham pɛen nyɔ so fili nyameɛso kyɛ,

¹⁶ “AWURADE nwa nyoo, ɔnate bɔ ayɔ ne, bɔ amva ɛwa komapɛ twe ne ammɔ me aheɛ ne ati, mata me nwo ndaen kyɛ

¹⁷ ngoyira wɔ, na ngɔma wɔ boso ama kɔsone kyɛ ewienu nzramaa ne mboanoa anweaa. Na wɔ boso ama kɔfa bɛ pɔfoɛ mɔ aseɛ bekoli so.

¹⁸ Ɔnate wɔ boso ama so yeɛ aseɛ ye aso maen maen amukoraa bekonya saleɛ ɔ, ofikyɛ atie me dwirɛ.”

¹⁹ Yiti Abraham sá hɔle ye somvoɛ nemɔ nwo berɛ, na besili nu bɛhɔle Beɛ Hyeba; na Abraham tenane Beɛ Hyeba.

²⁰ Na ɛhemɔ asi ne, bɛha behyirele Abraham kyɛ, “Tie, Milka koso ɔne eliɛma Nahɔ bawo mmaa.

²¹ Ye bamuɛbaa Yuse ne oliɛma Buse, Kemuel bɔ ɔte Aram baba ne,

²² Kɛsɛde, Haso, Pildase, Yidrafe, yeɛ Betuel.”

²³ Betuel wole Rebɛka. Na sɔ mmenia mmɔtwɛ hemɔ yeɛ Milka ne Abraham aliɛma Nahɔ bɛwole bɛ ɔ.

²⁴ Na ye sómaa ko bie bɔ oli Rehuma koso wole Teba, Gaham, Tahase ne Maaka.