Gyenesise 21 - AHYERƐLƐ KRONGRON

Yisake aworɛ ne

¹ AWURADE ɔɔpasale Sara nwo kyɛbɔ ɔhane ne ala, na kyɛbɔ ɔhyɛle Sara bɔ ne, sɔ ala yeɛ ɔyɔle ɔ.

² Sara nwonzɛle, na ɔne Abraham bɛwole bienzua wɔ mmerɛ bɔ né Abraham ayɛ aworowaa ɔ, wɔ mmerɛ deinn bɔ Nyameɛ fa hyɛle ye bɔ ne.

³ Na Abraham tole ɔwa bɔ Sara ne ye wole ne dumaa Yisake.

⁴ Abraham awa Yisake lili ɛlɛbɔtwɛ nen, ɔpɛle ye bienzua, kyɛbɔ Nyameɛ hyɛle ye ne.

⁵ Abraham wole ɔwa Yisake nen, né wali afoɛ ɛyaa.

⁶ Na Sara sele kyɛ, “Nyameɛ amaa masere; na ebiala bɔ ɔkɔte ne ɔne me kɔsere.”

⁷ Na osa sele kyɛ, “Nwa yeɛ ahaa ɔkɔha kohyire Abraham kyɛ Sara kɔma baa nyɔfone ɔ? Nakoso mawo baa mama ye wɔ mmerɛ bɔ wayɛ aworowaa ɔ.”

⁸ Akwadaa ne nyini, na bɛpɛle ye nyɔfone; na kyẽa bɔ bɛpɛle Yisake nyɔfone nen, Abraham tole ɛpoen piri.

Bɛfoa Hagar ne Yismael

⁹ Sara nwuni kyɛ Misraimniɛ Hagar awa bɔ ɔwole ye mane Abraham ne ɔka Yisake anyinga.

¹⁰ Yiti osele Abraham kyɛ, “Foa afaneɛ he ne ɔwa ne ma bɛhɔ, ofikyɛ sɔ afaneɛ he awa ɔne mma Yisake bɛngɔbɔ nu bengoli bia ko.”

¹¹ Na edwirɛ ne anyɛ Abraham fɛ koraa, ɔnate ɔwa ne ati.

¹² Nakoso Nyameɛ sele Abraham kyɛ, “Nnɛma akwadaa ne ne w’afaneɛ ne dwirɛ ne ɔha wɔ. Na yɔ bɔ Sara ka kyire wɔ biala, ofikyɛ ɔnate Yisake so yeɛ ekonya wɔ bosofoɛ kaenn ɔ.

¹³ Na afaneɛ n’awa ne koso, ngɔmaa ɔkɔkakyi maen, ofikyɛ ɔte wɔ bosoniɛ.”

¹⁴ Yiti Abraham dwɔsole ngyerɛmɔ tutuutu, na ɔfale aleɛ ne kɔndoa bɔ nzue wɔ nu mane Hagar fa tole ye kɔme anwo, na oguale ye ne ɔwa ne ate. Hagar sili nu hɔle, na oohyinihyini Beɛ Hyeba ɛserɛ so.

¹⁵ Kɔndoa ne anu nzue yiele nen, ɔyakyili akwadaa ne tole ndire bie abo.

¹⁶ Afei ɔɔtenane nekaa bie dedeede wɔ ye nyunu ndendeneɛ so, bɔ ye tendenn kɔyɛ abasanu ɛyaa. Na ɔha hyirele ye nwo kyɛ, “Mengɔhora mma ye anyunu nea wɔ ye wue nu.” Na ɔte ye nyunu ndendeneɛ so berɛ nen, akwadaa ne tikyele esuɛ nu.

¹⁷ Nyameɛ tele akwadaa ne suɛ, na Nyameɛ abɔfo frɛle Hagar fili nyameɛso bisale ye kyɛ, “Hagar, nzikyɛ yeɛ ɔha wɔ ɔ? Nnɛsuro, ofikyɛ esuɛ bɔ akwadaa ne ɔla berɛ bɔ osũ ne, Nyameɛ ate.

¹⁸ Dwɔso kɔma akwadaa ne aso, na tira ye nu yé, ofikyɛ ngɔma ye boso ama kɔyɛ maen pirikua.”

¹⁹ Afei Nyameɛ bukyele Hagar nye, na onwuni abura bie; ɔɔsale nzue ne bie guale kɔndoa ne anu, na ɔmane akwadaa ne bie maa ɔnone.

²⁰ Nyameɛ gyinane akwadaa ne asi, na onyini. Ɔtenane ɛserɛ so, na ɔyɛle agyaentolɛ bɔfoɛ.

²¹ Ɔtenane Paran ɛserɛ so, na oni oogyale braa fili Misraim aseɛ so mane ye.

Abraham ne Abimɛlɛke yɛ apam

²² Sɔ mmerɛ ne, Abimɛlɛke ne ye safohene Fikol beesele Abraham kyɛ, “Nyameɛ li wɔ si wɔ nikyee biala bɔ ɛyɔ nu;

²³ yiti fa Nyameɛ ta ndaen kyire me kyɛ ɛngɔlakalaka me, anaa me mma, anaa me boso ama. Na kyɛbɔ mali nahorɛ mama wɔ ne, sɔ ala yeɛ di nahorɛ ma me ne aseɛ bɔ aayɛ so ɛwɔfoɛ ne ɔ.”

²⁴ Na Abraham buale kyɛ, “Meta ndaen.”

²⁵ Abraham fale nzue abura bie bɔ Abimɛlɛke ngoaa mɔ bafa patapaa so bale bafi ye sa nu nwo dwirɛ tole Abimɛlɛke nyunu.

²⁶ Na Abimɛlɛke yele ye noa kyɛ, “Menze sona bɔ wayɔ sɔ nikyee ne; na wɔ koso anga angyire me. Nndele ye le, sana ɛnɛ ala.”

²⁷ Afei Abraham mane Abimɛlɛke mmoaen ne nandwie, na bɛ munyɔ bɛyɛle apam.

²⁸ Abraham yele mmoaen mmeleɛ nzoo fili mmoaen kure ne anu siele ahameɛ.

²⁹ Na Abimɛlɛke bisale ye kyɛ, “Mmoaen mmeleɛ nzoo bɔ aye bɛ asie ahameɛ ye, ye bo kyire sɛɛ?”

³⁰ Na obuale kyɛ, “Ndira me sa nu mmoaen mmeleɛ nzoo hemɔ mefa mema wɔ, na ɔmaa edi me adanzeɛ kyɛ me yeɛ nduli abura he ɔ.”

³¹ Yiti bɛfrɛle berɛ Beɛ Hyeba, ofikyɛ berɛ yeɛ bɛ munyɔ bɛtale ndaen ɔ.

³² Bɛyɛle apam wɔ Beɛ Hyeba beyiele nen, Abimɛlɛke ne ye safohene Fikol bedwɔsole besa bɛhɔle Filistifoɛ aseɛ so.

³³ Abraham luale akyea wɔ Beɛ Hyeba, na ɔsɔnene AWURADE bɔ ɔte Ɛdangama Nyameɛ ne berɛ.

³⁴ Na Abraham yɛle ɛwɔfoɛ wɔ Filistifoɛ aseɛ so hyɛle.