Gyenesise 19 - AHYERƐLƐ KRONGRON

Sodom sɛkyelɛ

¹ Abɔfo nyɔ ne beedwuli Sodom nɔsoa; na né Lɔto te Sodom kuro ne tiwaa. Mmerɛ bɔ Lɔto nwuni bɛ nen, odwɔsole ooyiale bɛ, na ɔfale ye nyunu butuli berɛ.

² Na ɔhane kyɛ, “Me mene mɔ, mesrɛ ɛmɔ ala, ɛmɔbra beesikye ɛmɔ akoaa awuro ɛnɛ kɔngɔen ye, ná ɛmɔnwunzi ɛmɔ gya bo; ná ngyerɛmɔ tutuutu ɛmɔadwɔso bahɔ b’atee.” Na bebuale kyɛ, “Daabi, yɛkɔla dwaaso.”

³ Nakoso ɔhɔle so srɛle bɛ alaa maa afei bɛ ne ye hɔle ye awuro. Ɔtole ɛpoen mane bɛ; ɔtole paanoo kabrɛdi mane bɛ, na belili.

⁴ Né bennya bɛllale po, yeɛ Sodom kurotue ne amukoraa, fite mmɛɛmaa so kodwu mbanyi so, bɛɛpɛle sua ne anwo beyiale ɔ.

⁵ Na bɛteateane nu bebisale Lɔto kyɛ, “Mmienzua bɔ beesikyele w’awuro ɛnɛ kɔngɔen ne, bɛwɔ nisua? Ye bɛ fite brɛ yɛ ma yɛne bɛ yɛla!”

⁶ Lɔto fitele kyɛ ɔkɔ ɛlɔen ne anu dɔ, na ɔtole anoa ne anu,

⁷ na osele kyɛ, “Aliɛmaa mɔ, mesrɛ ɛmɔ ala, nnɛma ɛmɔbɔ sɔ musue ne.

⁸ Ɛ́mɔtie. Nne mmaa mmrasua nyɔ bɔ bennwuni biaa le ɔ. Ɛmɔma nye bɛ mvite mmrɛ ɛmɔ, na ɛmɔ ne bɛ yɔ nikyee biala bɔ ɛmɔkuro ɔ. Na sɔ mmienzua hemɔ de, nnɛma ɛmɔyɔ bɛ hwee, ofikyɛ baasikye m’awuro.”

⁹ Nakoso besele ye kyɛ, “Dwɔso berɛ kɔ dɔ!” Na besa bɛhane kyɛ, “Sɔ akoaa he te amanvraniɛ yeɛ waatena wa ɔ, nakoso wayɛ ye nwo ndɛenbualɛniɛ! Bɔ yɛkɔfa yɛkɔyɔ wɔ ne, ɔkɔtra bɛ deɛ ne!” Afei bɛhɔle Lɔto so, na bɛhɔle anoa ne anwo kyɛ bɛkwaatu ye bo.

¹⁰ Nakoso mmienzua (nyɔ) ne tengyɛle bɛ sa bɛsɔle Lɔto nu; bɛhwene ye bɛwale bɛ nwo berɛ wɔ awuro berɛ, na bɛtole anoa ne anu.

¹¹ Afei bɛmane mmenia bɔ begyigyi anoa nu berɛ ne nye sini, fite ngwadaa so kodwu mbanyi so, na bɛfale bɛ sa befuafuale bɛpenane anoa ne.

Lɔto nwati fi Sodom

¹² Na mmienzua (nyɔ) ne bisale Lɔto kyɛ, “Ebiala nne wa bɔ ɔboka wɔ so ɔ: sia mmienzua, mmaa mmienzua anaa mmrasua, anaa wɔ nwoniɛ biala wɔ kuro ye anu? Ye bɛ fi wa,

¹³ na yɛbaasɛkye kuro ye, ofikyɛ abubue bɔ babɔ bagua nu mmenia ti so ne asone wɔ AWURADE nyunu, na AWURADE asoma yɛ kyɛ yɛɛsɛkye ye.”

¹⁴ Yiti Lɔto fitele oosele ye sia mmienzua bɔ bɛbaagyigya ye mma mmrasua nemɔ kyɛ, “Ɛ́mɔhã bɛ nwo befi wa, ofikyɛ AWURADE baasɛkye kuro ne.” Nakoso ye sia nemɔ dwenene kyɛ ɛhoaa bie yeɛ ɔ́to ɔ.

¹⁵ Na odwuli alebahyene ne, abɔfo nemɔ hane Lɔto bo kyɛ, “Ka wɔ nwo na fa ɛye ne wɔ mma mmrasua nyɔ bɔ bɛwɔ wa ne nwati, amaa bandɔ nzoen wɔ kuro ye asohwenɛ ne anu.”

¹⁶ Nakoso né ɔtwetwe ye bo ase, yiti sɔ mmienzua nyɔ ne sosɔle ye ne ɔye ne ye mma mmrasua nyɔ nemɔ sa, na bɛfale ye befili kuro ne anu, ofikyɛ AWURADE nwuni ye anwumvoin.

¹⁷ Na bɛfale bɛ befili kuro ne aso nen, besele kyɛ, “Nwati pena wɔ ti ngoa! Nnɛnea wɔ si, yeɛ nnɛgyina aseɛ frɛtɛɛ ye aso nekaa biala! Nwati kɔ mmokaa ne anu dɔ, kyɛbɔ ɔkɔyɛ na anyera ɔ!”

¹⁸ Na Lɔto sele bɛ kyɛ, “Me mene mɔ, mesrɛ ɛmɔ, nnɛmaa ɔba ye sɔ.

¹⁹ O, anwu w’akoaa anwumvoin, na alo me paa amaa manya me ti madidi nu. Nakoso mengɔhora nwati kɔ mmokaa ne anu dɔ; annea a né sɔ amaneɛ ne ato me atunu amaa mawu.

²⁰ Mesrɛ wɔ, kuro bɔ ɔwɔ dɔ ye pingye bɔ ngɔhora ngɔnwati ngɔhɔ so ɔ, na ɔte kuro ba. Ennwu kyɛ ɔte kãa ɔ? Maa nwati ngɔ berɛ, na ngonya me ti ngodidi nu.”

²¹ Na obuale ye kyɛ, “Nea, ɛhe anwo koso manwu wɔ anwumvoin, kyɛ mengɔsɛkye kuro bɔ aha ye nwo dwirɛ ne.

²² Ma wɔ nwo yɛ nyera na nwati kɔ berɛ, ofikyɛ mengɔhora ngɔyɔ nikye fee, sana adwu berɛ koraka.” Ye sɔ ne ati, kuro ne li Soa [bɔ ye bo kyire: Kaaba].

²³ Lɔto dwuli Soa nen, né eyia apukye aseɛ so.

²⁴ Na afei AWURADE tɔle sɔfe ne see fili anwuro guale Sodom ne Gomora so.

²⁵ Ɔsɛkyele sɔ nguro nemɔ ne aseɛ frɛtɛɛ ne amukoraa, nguro ne anu mmenia mukoraa, yeɛ nikyee biala bɔ wafifi aseɛ ne aso ɔ.

²⁶ Nakoso Lɔto aye ne neane nziɛ, na ɔkakyili ngyee sire.

²⁷ Abraham pɛle aleɛ hɔle nekaa bɔ né ogyi AWURADE nyunu ne.

²⁸ Ɔtole ye nye neane Sodom ne Gomora, ɔne aseɛ frɛtɛɛ ne amukoraa, na onwuni kyɛ aseɛ ne aso nwosina ótu kɔ anwuro kyɛ foonoo nu nwosina.

²⁹ Yiti mmerɛ bɔ Nyameɛ sɛkyele nguro bɔ bɛwɔ aseɛ frɛtɛɛ ne aso nen, ɔkayele Abraham, na amaneɛ bɔ ɔtole nguro bɔ Lɔto tenane so nemɔ maa bɛbɔle ne, ɔyele Lɔto fili nu.

Moabofoɛ ne Amonfoɛ

³⁰ Lɔto tu fili Soa, na ɔne ye mma mmrasua nyɔ ne bɛɛtenane mmokaa nemɔ anu dɔ, ofikyɛ né osuro kyɛ ɔkɔtena Soa. Na ɔne ye mma mmrasua nyɔ ne bɛɛtenane nyɔboɛ bɔ wasi sua nu.

³¹ Na ye bamuɛbaa ne sele kãa ne kyɛ, “Yɛ baba anyi, yeɛ bienzua biala koso nne aseɛ ye aso bɔ ɔne yɛ kɔla, kyɛbɔ bɛyɔ ye ewiase amukoraa ne.

³² Yiti maa yɛma yɛ baba nzaa ma ɔno, na yɛne ye yɛla, amaa ɔnate yɛ baba so yanya yɛ boso ama.”

³³ Yiti bɛmane bɛ se nzaa maa ɔnone sɔ kɔngɔen ne; na bamuɛbaa ne hɔle ɔne ɔse bɛɛlale. Nakoso wannwu ɔwa ne nnaa nu ne ye dwɔsolɛ nu.

³⁴ Na aleɛ hyene ne, bamuɛbaa ne sele kãa ne kyɛ, “Nea, me ne me baba yɛlale anoma kɔngɔen. Maa yɛma ye nzaa ma ɔno ɛnɛ kɔngɔen ye koso, na ɛne ye bɛɛla, amaa ɔnate yɛ baba so yanya yɛ boso ama.”

³⁵ Yiti sɔ kɔngɔen ne koso bɛmane bɛ se nzaa ma ɔnone; na kaaba ne dwɔsole ɔne ye bɛɛlale. Nakoso wannwu ɔwa ne nnaa nu ne ye dwɔsolɛ nu.

³⁶ Yiti sɔ yeɛ Lɔto mma mmrasua nyɔ ne bɛ ne bɛ se nwonzɛle ɔ.

³⁷ Bamuɛbaa ne wole baa bienzua, na ɔtole ye dumaa Moabo; na ɛnɛ ne ɛnɛ ye, ye boso ama ole Moabofoɛ.

³⁸ Kãa ne koso wole baa bienzua, na ɔtole ye dumaa Ben Ami; na ɛnɛ ne ɛnɛ ye, ye boso ama ole Amonfoɛ.