Gyenesise 15 - AHYERƐLƐ KRONGRON

Nyameɛ ne Abram yɛ apam

¹ Ɛhemɔ asi ne, AWURADE lale ye dwirɛ ali hyirele Abram wɔ nyekyire nu kyɛ, “Nnɛsuro, Abram. Me yeɛ mebɔ wɔ nwo waen ɔ, na w’akatuaa kɔsone pee.”

² Nakoso Abram bisale kyɛ, “O, AWURADE Nyameɛ, nzikyɛ yeɛ ɛkɔfa kɔma me ɔ? Nea kyɛ nnne ba, na Eliesa bɔ ofi Damasko yeɛ okoli me bia ɔ.”

³ Na Abram hane kyɛ, “Nea kyɛ ɛmmane me ba, na kanganiɛ bɔ bawo ye m’awuro yeɛ ɔbaali me bia ɔ.”

⁴ Nakoso AWURADE lale ye dwirɛ ali hyirele ye kyɛ, “Nna sɔ akoaa he yeɛ okoli wɔ bia ɔ, na mmom wɔ bɔbɔ ɛwa yeɛ okoli wɔ bia ɔ.”

⁵ Afei Nyameɛ fale ye fitele, na osele kyɛ, “To wɔ nye anwuro na ka nzramaa nemɔ, na nea sɛ ɛkɔhora kɔha bɛ a.” Na osele ye kyɛ, “Sɔ ala yeɛ wɔ boso ama kɔyɛ ɔ.”

⁶ Abram lele AWURADE lili, yiti AWURADE buli sɔ nikyee ne kyɛ ɔtengyɛ wɔ ye nyunu.

⁷ Na osele ye kyɛ, “Me ole AWURADE bɔ mvale wɔ mvili Yure bɔ ɔwɔ Kaldea mmale ɔ, kyɛ méfa aseɛ he mema wɔ maa ɔyɛ wɔ deɛ.”

⁸ Nakoso obisale kyɛ, “O, AWURADE Nyameɛ, ɔkɔyɛ sɛɛ né manwu ye kyɛ ɔkɔyɛ m’agyapadeɛ?”

⁹ Na Nyameɛ buale ye kyɛ, “Fa nandwie beleɛ akrɔngrɔma bɔ wali afoɛ nza, abɔngye beleɛ bɔ wali afoɛ nza, boaen nyii bɔ wali afoɛ nza, aborɔma, ɔne mmorɔnoma buruwa brɛ me.”

¹⁰ Ɔfale ye mukoraa brɛle ye, ɔpakyepakyele bɛ nu nyɔ nyɔ, na ɔfale ko biala bue tole ye bue ne anwo; nakoso nnomaa nemɔ de, wambakyepakye bɛ nu.

¹¹ Na sɛ nnomaa bɔ bedi naen batena naen fuin nemɔ aso a, né Abram afoa bɛ.

¹² Na eyia yɛle kyɛ ɔkwaatɔ nen, nnafelɛ hatee wuale Abram, na awosii tunn suronyisuronyi tole ye.

¹³ Na AWURADE sele Abram kyɛ, “Memaa ɛte ye bo kyɛ, wɔ boso ama kɔyɛ ɛwɔfoɛ wɔ aseɛ bɔ nna bɛ deɛ ahɔ so. Bɛkɔyɛ ngoaa wɔ berɛ, na bɛkɔhyɛ bɛ so toonn afoɛ ɛyaa nna.

¹⁴ Nakoso ngobua maen bɔ bɛkɔso ye ne ndɛen, na ɛhe asi ye, bɛkɔfa anwonya pee paa bekofi maen ne anu bɛkɔhɔ.

¹⁵ Nakoso wɔ de, ɛkɔtoa wɔ mbanyi mɔ asomdwee nu, na ɛkɔyɛ aworowaa posoposo koraka né basie wɔ.

¹⁶ Na sɛ odwu wɔ boso ama mɔ aworɛ ndoatoasoɛ bɔ ɔtɔ so nna ne aso a, bekosa bɛkɔwa wa; ofikyɛ Amorifoɛ amumuyɛɛ kwangoa ne onnya oyyili [bɔ ɔkɔmaa ngɔfoa bɛ ngofi aseɛ ne aso ɔ].

¹⁷ Mmerɛ bɔ eyia tɔle ná awosii wale nen, mvum nu, foonoo bɔ otu nwosina, ɔne see bɔ ogye wuronyiwuronyi wale bɛɛfale naen bue bue nemɔ afia.

¹⁸ Na sɔ kyẽa ne ala, AWURADE ne Abram yɛle apam, na ɔhane kyɛ, “Wɔ boso ama yeɛ méfa sɔ aseɛ he méma bɛ ɔ: ofi Misraim asue noa bɔ ɔkwaadwu asue piri Yufreti noa,

¹⁹ Kenifoɛ, Kenisifoɛ, Kademonifoɛ,

²⁰ Hitifoɛ, Perisifoɛ, Refaimfoɛ,

²¹ Amorifoɛ, Kanaanfoɛ, Gɛgasifoɛ ne Yebusifoɛ aseɛ ne.”