Gyenesise 11 - AHYERƐLƐ KRONGRON

Babɛl abandenden

¹ Né ewiase ama mukoraa bɛka edwudwolɛ komapɛ twe ɔne edwofua kãa bie.

² Mmerɛ bɔ mmenia tu fili eyia afiteleɛ nen, benwuni aseɛ frɛtɛɛ bie wɔ Sinari aseɛ so, na bɛtenane berɛ.

³ Na besisele bɛ nwo kyɛ, “Biamɔ, ɛ́mɔma yɛ́pɛ mmerekese, na yɛto ma ɔbe.” Bɛfale mmerekese bɛyɛle bɛ nyɔboɛ, yeɛ bɛfale ehwaa bɛyɛle bɛ nnɛterɛ.

⁴ Afei besele kyɛ, “Biamɔ, ɛ́mɔma yɛkyekye yɛ kuro, ná yɛsi abandenden bɔ odwu nyameɛso yɛsie so, ná yɛfa yɛle dumaa, amaa yammɔ aya wɔ aseɛ ye aso amukoraa.”

⁵ AWURADE dwu wale ase ɔɔneane kuro ne abandenden bɔ né mmenia mmaa bési ne.

⁶ Na AWURADE sele kyɛ, “Bɛte mmenia komapɛ, na bɛ mukoraa bɛka edwudwolɛ ko. Ɔ́hyɛ ye bo ye po yeɛ bɛ́yɔ sɔaa ye. Nzaade bɔ bekosusu kyɛ bɛkɔyɔ biala ne, nikye fee ngosi bɛ ate.

⁷ Ɛmɔbra, ɛ́mɔma yɛdwu yɛhɔ ase, ná yɛkakyi bɛ dwudwolɛ ne ma ɔyɛ nwunyaenn, amaa bɛ nu biala ande obiɛngo dwudwolɛ bo ko.”

⁸ Yiti ofi sɔ mmerɛ ne, AWURADE maa bɛbɔle aya wɔ aseɛ ye aso amukoraa, na bɛyakyili kuro ne kyekyelɛ.

⁹ Ɛhe ati yeɛ ɔmaa bɛfrɛ berɛ Babɛl, ofikyɛ AWURADE mane aseɛ so amukoraa dwudwolɛ yɛle nwunyaenn. Na ofi sɔ mmerɛ ne, AWURADE maa bɛbɔle aya wɔ aseɛ ye aso amukoraa.

Sem boso ama

¹⁰ Sem boso ama mɔ ɛhe: Nzueyilɛ ne asi afoɛ nyɔ, bɔ Sem lili afoɛ ɛyaa ne yeɛ ɔwole Afakesade ɔ.

¹¹ Na Sem wole Afakesade nen, ye si ye olili afoɛ ɛyaa nnu, na ɔwole mmaa mmienzua ne mmrasua mɔ koso.

¹² Afakesade lili afoɛ aburasa ne nnu nen, ɔwole Hyela.

¹³ Na Afakesade wole Hyela nen, ye si ye olili afoɛ ɛyaa nna ne nza, na ɔwole mmaa mmienzua ne mmrasua mɔ koso.

¹⁴ Hyela lili afoɛ aburasa nen, ɔwole Ebere.

¹⁵ Na Hyela wole Ebere nen, ye si ye olili afoɛ ɛyaa nna ne nza, na ɔwole mmaa mmienzua ne mmrasua mɔ koso.

¹⁶ Ebere lili afoɛ aburasa ne nna nen, ɔwole Pɛlɛge.

¹⁷ Na Ebere wole Pɛlɛge nen, ye si ye olili afoɛ ɛyaa nna ne aburasa, na ɔwole mmaa mmienzua ne mmrasua mɔ koso.

¹⁸ Pɛlɛge lili afoɛ aburasa nen, ɔwole Reo.

¹⁹ Na Pɛlɛge wole Reo nen, ye si ye olili afoɛ ɛyaa nyɔ ne ngona, na ɔwole mmaa mmienzua ne mmrasua mɔ koso.

²⁰ Reo lili afoɛ aburasa ne nyɔ nen, ɔwole Seruge.

²¹ Na Reo wole Seruge nen, ye si ye olili afoɛ ɛyaa nyɔ ne nzoo, na ɔwole mmaa mmienzua ne mmrasua mɔ koso.

²² Seruge lili afoɛ aburasa nen, ɔwole Nahɔ.

²³ Na Seruge wole Nahɔ nen, ye si ye olili afoɛ ɛyaa nyɔ, na ɔwole mmaa mmienzua ne mmrasua mɔ koso.

²⁴ Nahɔ lili afoɛ aburanyɔ ne ngona nen, ɔwole Tera.

²⁵ Na Nahɔ wole Tera nen, ye si ye olili afoɛ ɛyaa ko ne buru ne ngona, na ɔwole mmaa mmienzua ne mmrasua mɔ koso.

²⁶ Tera lili afoɛ aburasoo nen, ɔwole Abram, Nahɔ ne Haran.

Tera boso ama

²⁷ Tera boso ama ole ɛhemɔ: Tera wole Abram, Nahɔ ne Haran; yeɛ Haran koso wole Lɔto.

²⁸ Haran wu yakyili ye baba Tera wɔ ye bɔbɔ ye maen nu wɔ Yure bɔ ɔwɔ Kaldea.

²⁹ Abram ne Nahɔ begyigyale mmraa. Abram aye ne li Sarae, yeɛ Nahɔ aye ne koso li Milka, bɔ ɔne Yisika bɛ se ole Haran ne.

³⁰ Né Sarae te mmotaen; né olle ba.

³¹ Tera fale ɔwa Abram, ye anomaa Lɔto bɔ ɔte Haran awa ne, ye sia Sarae bɔ ɔte ɔwa Abram aye ne, na ɔne bɛ betu befili Yure bɔ ɔwɔ Kaldea kyɛ bɛ́kɔ Kanaan aseɛ so. Nakoso bedwuli Haran nen, bɛtenane berɛ.

³² Tera lili afoɛ ɛyaa nyɔ ne nnu, na owuli wɔ Haran.