Gyenesise 10 - AHYERƐLƐ KRONGRON

Nowa mma mmienzua nemɔ boso ama

¹ Nowa mma mmienzua Sem, Ham ne Yafɛte bɛ boso ama ɛhe: Nzueyilɛ ne asi ne, bɛwole mmaa.

² Yafɛte mma mɔ ole Gomɛre, Magɔgo, Madai, Yawan, Tubal, Meseke ne Tirase.

³ Gomɛre mma mɔ ole Asekenase, Rifate ne Togama.

⁴ Yawan mma mɔ ole Elisa, Tasise, Kitim ne Dodanim.

⁵ Bɛ boso ama ole mmenia bɔ bato bapete mboanoa aseɛ so ne. Yafɛte mma mɔ bɔ bɛwɔ b’aseɛ so ɛhe: asora fekue biala ne ye dwudwolɛ, ye abusua ne ye maen.

⁶ Ham mma mɔ ole Kuse, Misraim, Pute ne Kanaan.

⁷ Kuse mma mɔ ole Seba, Hawila, Sabota, Raama ne Saboteka. Raama mma mɔ ole Hyeba ne Dedan.

⁸ Kuse wole Nimrode. Na Nimrode yeɛ olili moa yɛle koɛhonɛniɛ ahoneserɛniɛ wɔ aseɛ ye aso ɔ.

⁹ Ɔyɛle bɔfoɛ piri paa wɔ AWURADE nyunu. Na ɛhe ati yeɛ ɔmaa bɛka kyɛ, ‘Ɔte bɔfoɛ piri paa kyɛ Nimrode ala wɔ AWURADE nyunu.’

¹⁰ Ye ahennie ne bɔle ye bo wɔ Babɛl, Ɛreke ne Akade, na bɛ mukoraa bɛwɔ Sinari aseɛ so.

¹¹ Ofili sɔ aseɛ ne aso ɔhɔle Asiria ɔɔkyekyele Ninewe, Rehobote Yiri, Kala,

¹² yeɛ kuro piri Resen bɔ owura Ninewe ne Kala b’afia ne.

¹³ Misraim suli Ludimfoɛ, Namimfoɛ, Lehabimfoɛ, Nafetuhimfoɛ,

¹⁴ Patrusimfoɛ, Kasluhimfoɛ, yeɛ Kafitorimfoɛ bɔ besuli Filistifoɛ mɔ ne.

¹⁵ Kanaan wole ye bamuɛbaa bienzua Sidon, yeɛ afei Hɛte,

¹⁶ Yebusifoɛ, Amorifoɛ, Gɛgasifoɛ,

¹⁷ Hiwifoɛ, Akifoɛ, Sinifoɛ,

¹⁸ Awadifoɛ, Semarifoɛ ne Hamatefoɛ. Na ɛhe asi ne, Kanaan abusua ne trɛle hɔle dedeede.

¹⁹ Na Kanaan maen ɛwɛen ne trɛle fili Sidon toonn hɔle Gera bue nu dɔ, na oodwuli Gasa, Sodom, Gomora, Adema ne Seboyim ne Lasa.

²⁰ Ham mma mɔ ɛne, na asora ebiala ne ye abusua, ye dwudwolɛ, ye aseɛ ne ye maen.

²¹ Sem bɔ ɔte Yafɛte aliɛma panyi ne, ye nu yeɛ Ebere boso ama mukoraa befi ɔ.

²² Sem mma mɔ ole Elam, Asure, Afakesade, Lude ne Aram.

²³ Aram mma mɔ ole Yuse, Hule, Gɛta ne Mase.

²⁴ Afakesade wole Hyela, yeɛ Hyela koso wole Ebere.

²⁵ Ebere wole mmaa mmienzua nyɔ. Ko dumaa li Pɛlɛge, ofikyɛ ye aberɛ so yeɛ mbakyembakyemuɛ wale aseɛ so ɔ; na oliɛma ne koso li Yoketan.

²⁶ Yoketan wole Almodade, Selefe, Hasamawɛte, Yera,

²⁷ Hadoram, Yusal, Dikla,

²⁸ Obal, Abimael, Hyeba,

²⁹ Ofire, Hawila ne Yobabo. Ɛhemɔ amukoraa bɛte Yoketan mma.

³⁰ Aseɛ bɔ né bɛte so ne trɛle fili Mesa hɔle Sefa maa oodwuli eyia afiteleɛ mmokaa aseɛ ne aso dɔ.

³¹ Sem mma mɔ ɛne, na asora ebiala ne ye abusua, ye dwudwolɛ, ye aseɛ ne ye maen.

³² Nowa mma nemɔ b’abusua, kyɛbɔ b’aworɛ ndoatoasoɛ te wɔ bɛ maen nu ɛhe. Na ofi bɛ nu yeɛ nzueyilɛ ne asi ne maen maen fifili na bɛto bɛpetene aseɛ so ɔ.