Galatiafoɛ 4 - AHYERƐLƐ KRONGRON

Nnɛma ɛmɔsa kɔyɛ ngoaa

¹ Ɛhe yeɛ mekyire ɔ: mmerɛ bɔ koliagyaa ne te akwadaa ne de, nzonzoleɛ biala nne ye ne akoaa bɛ nu, nakoso agyapadeɛ ne amukoraa te ye deɛ.

² Na ole mmenia bɔ bɛnea ye ne ye agyapadeɛ ne aso kɔpem mmerɛ bɔ ye baba ne ahyehyɛ ato berɛ ne.

³ Sɔ ala yeɛ né yɛte ɔ: mmerɛ bɔ né yɛte ngwadaa ne, bɛfale yɛ bɛyɛle ngoaa bewurale ewiase sunzum tumi bo.

⁴ Nakoso mmerɛ bɔ Nyameɛ ahyehyɛ ato berɛ ne dwuli ne, ɔsomane Ɔwa ne maa ɔwale. Brasua yeɛ ɔwole ye ɔ, na bɛwole ye bewurale mmeraa ne abo,

⁵ kyɛ oole bɛ bɔ bɛwɔ mmeraa ne abo ne, na yɛɛyɛ Nyameɛ mma.

⁶ Na ɔnate kyɛ ɛmɔte mmaa ne ati, Nyameɛ asoma Ɔwa ne Sunzum maa waatena ɛmɔ ahone nu, bɔ ɔtea nu kyɛ “Abba! Baba!”

⁷ Afei ɛtte akoaa ko, na mmom ɛte baa, na sɛ ɛte baa de a, nzaade ɔnate Kristo so ɛte Nyameɛ koliagyaa.

Galatiafoɛ nwo hia Pɔɔlo

⁸ Daa ne bɔ né ɛmɔnze Nyameɛ nen, ɛmɔyɛle ngoaa bɛmane abɔdeɛ mɔ bɔ nna nyameɛ mɔ ahɔ ɔ.

⁹ Nakoso kekesaala ye bɔ ɛmɔanwu Nyameɛ ye, anaa Nyameɛ anwu ɛmɔ ye de, nzu ati yeɛ ɛmɔsa bɛ si bieku bɛkɔ sunzum mɔ bɔ bɛyɛ mmerɛ na bɛ nwo anwumvoin berɛ, na ɛmɔpena kyɛ ɛmɔkɔyɛ bɛ ngoaa bieku ɔ?

¹⁰ Ɛmɔbu ngyẽa bie ne bosome biemɔ ne mmerɛ bie ne afoɛ biemɔ kyɛ bedi mu.

¹¹ Mesuro kyɛ ebiaa ɛmɔ nwo fɛɛ bɔ mafɛ ne ayɛ mbaen.

¹² Aliɛmaa mɔ, mesrɛ ɛmɔ, ɛ́mɔyɛ kyɛ me, kyɛbɔ me koso mayɛ kyɛ ɛmɔ ye. Ɛmɔyyɔle me tɛɛ biala.

¹³ Ɛmɔse kyɛ né me nwo mva me ti yeɛ ɔmaa nnili moa ngane nzɛmba ne ngyirele ɛmɔ ɔ.

¹⁴ Ɔwɔ nu kyɛ m’anwonyerɛ ne yɛle nzɔhwɛ mane ɛmɔ, nakoso ɛmɔammu me animtia, yeɛ ɛmɔambo me; na mmom ɛmɔlele me nyemene so kyɛ nyameɛso abɔfo, kyɛ ɛmɔkɔyɛ Kristo Yesu ne ala.

¹⁵ Afei anika bɔ ɛmɔnyane ye ne wɔ ni? Ofikyɛ medi ɛmɔ nwo adanzeɛ kyɛ sɛ ɔkɔyɛ yé po a, ahaa ɛmɔtutuli ɛmɔ nye bɛmane me.

¹⁶ Na sɛ meka nahorɛ mekyire ɛmɔ a, nzu ati yeɛ mayɛ ɛmɔ pɔfoɛ ɔ?

¹⁷ Sɔ mmenia nemɔ yɛ bɛ nwo kyɛ bekuro ɛmɔ dwirɛ, nakoso belle ɛmɔ nwo adwene paa. Bɛpena kyɛ bɛtoto me ne ɛmɔ afia, na ɛmɔ nye aha bɛ nwo.

¹⁸ Nakoso ɔte paa kyɛ mmenia konya ɛmɔ nwo adwene paa ná bahuro ɛmɔ dwirɛ daa ɔ, ná nna kyɛ mmerɛ bɔ me ne ɛmɔ yɛwɔ berɛ angome.

¹⁹ Me mma ngwadaa, mesa medi ɛmɔ nwo yealɛ kyɛ brasua bɔ aworɛ aha ye ɔ kɔpem kyɛ Kristo sue ne kɔtena ɛmɔ nu ɔ.

²⁰ Ɔhale me ngome a, ahaa nwɔ ɛmɔ berɛ kekesaala ye, na manwu kyɛbɔ nzi nga ye ɔ, ofikyɛ m’adwene nzi me pi wɔ ɛmɔ nwo!

Pɔɔlo fa Hagar ne Sara yɛ mvandoho

²¹ Ɛ́mɔhã behyire me, ɛmɔ bɔ bɛpena kyɛ bewura mmeraa bo ne, ɛmɔnde bɔ mmeraa ne kã ne anaa?

²² Bahyerɛ kyɛ né Abraham le mmaa mmienzua nyɔ; ko te afaneɛ awa, yeɛ ko koso te dehyeɛ awa.

²³ Bɔ oni te afaneɛ ne bɛwole ye anwoɔnaen nu atee so, nakoso bɔ oni te dehyeɛ ne de, bɛnate bɔhyɛ so yeɛ bɛwole ye ɔ.

²⁴ Ɛhemɔ te mvandoho, ofikyɛ mmrasua nyɔ ne gyi berɛ ma apam nyɔ. Ko bɔ ɔwo ye mma deɛ gua ngoaasolɛ nu ne ole Hagar, na ofi Sinai Bokaa ne aso.

²⁵ Hagar gyi berɛ ma Sinai bokaa ne bɔ ɔwɔ Arabia, na osa gyi berɛ ma ɛnɛ Yerusalem, ofikyɛ Yerusalem ne ye mma wɔ ngoaasolɛ nu.

²⁶ Nakoso nyameɛso Yerusalem ne de, ɔnne ngoaasolɛ nu, na ɔte yɛ maame.

²⁷ Ofikyɛ bahyerɛ kyɛ, “Ma wɔ nye gye, wɔ, mmotaen bɔ ɛnwo ɔ! Di ahurusi né tea nu, wɔ bɔ ennwu aworɛ yealɛ ɔ! Ofikyɛ brasua bɔ bɛpole ye ne, ole mmaa pee tra brasua bɔ ogya biaa ne.”

²⁸ Aliɛmaa mɔ, kyɛbɔ Yisake te bɔhyɛ ba ne, sɔ ala yeɛ yɛ koso yɛte bɔhyɛ mma ɔ.

²⁹ Na kyɛbɔ sɔ mmerɛ ne, akwadaa bɔ bɛnate anwoɔnaen nu atee so bɛwole ye ne osi tanene bɔ bɛnate Sunzum nu bɛwole ye ne nye nen, sɔ ala yeɛ ɛnɛ koso ɔte ɔ.

³⁰ Nakoso Ahyerɛlɛ ne nwa nzɛ? Ɔnwa, “Foa afaneɛ ne ne ɔwa ne; ofikyɛ afaneɛ n’awa ne, ɔne dehyeɛ n’awa ne, bɛngɔbɔ nu bengoli bia.”

³¹ Yiti aliɛmaa mɔ, yɛtte afaneɛ ne mma, na mmom yɛte dehyeɛ ne mma.