Galatiafoɛ 3 - AHYERƐLƐ KRONGRON

Mmeraa ne anaa gyidie

¹ O Galatiafoɛ bɔ ɛmɔndwene ɔ! Nwa yeɛ odwumvale ɛmɔ sɔa ye; (bɔ ɔmaa ɛmɔnne nahorɛ ne nni ɔ?) Aso nna ɛmɔ nyunu yeɛ behyirehyirele nu pefee kyɛ bɛbɔle Yesu Kristo mmeamudua nu ɔ?

² Edwirɛ he yeɛ mepena kyɛ ɛmɔye ye noa ɔ: ɔnate mmeraa ne aso lilɛ so yeɛ ɛmɔnyane Sunzum ne, anaakyɛ ɔnate nzɛmba bɔ ɛmɔtele ná ɛmɔle belili ne aso?

³ Sɔ yeɛ ɛmɔndwene ɔ? Ɛmɔfale Sunzum ne yeɛ bɛhyɛle ye bo ɔ, na nzu ati yeɛ ɛmɔfa anwoɔnaen beyie ɔ?

⁴ Amaneɛ pee bɔ ɛmɔnwuni ye ne, aso wayɛ mbaen? Dabida, ɔngɔyɛ mbaen!

⁵ Yiti Nyameɛ bɔ ɔma ɛmɔ Sunzum ne ná ɔyɔ anwanwadeɛ wɔ ɛmɔ nu ne, ɔnate mmeraa ne aso lilɛ yeɛ ɔyɔ ɔ, anaa ɔnate nzɛmba bɔ ɛmɔtele ná ɛmɔle lili ne aso?

Abraham te yɛ nhwɛsoɛ

⁶ “Na kyɛbɔ Abraham lele Nyameɛ lili ná obuli ye tenenee mane ye ne,

⁷ sɔ ala yeɛ ɔsɛ kyɛ ɛmɔnwu ye kyɛ, bɛ bɔ bele gyidie ne yeɛ bɛte Abraham bosofoɛ ɔ.

⁸ Na Ahyerɛlɛ ne hã tole berɛ kyɛ Nyameɛ kɔfa gyidie so yeɛ okobua Amaenmaensofoɛ mɔ be ɔ, na Nyameɛ dwirɛ ne lili moa sele Abraham kyɛ, “Ɔnate wɔ so yeɛ Nyameɛ koyirayira maen maen amukoraa ɔ.”

⁹ Abraham nyane gyidie, yiti ebiala bɔ ole gyidie ne, bayira ye ne Abraham.

¹⁰ Na ebiala bɔ mmeraa ne aso lilɛ so yeɛ ɔfa ye nwo to ne, ye yaakɔ! Ofikyɛ bahyerɛ kyɛ, “Ebiala bɔ onni nikyee biala so kyɛbɔ bahyerɛ ye wɔ mmeraa nwomaa ne anu, ná ɔnyɔ ne, ye yaakɔ!.”

¹¹ Afei ɔla berɛ pefee kyɛ ɔnate mmeraa ne aso de, ebiala nni be wɔ Nyameɛ nyunu; ofikyɛ teneneeniɛ de, ɔnate ye gyidie so yeɛ okonya ngoa ɔ.

¹² Na mmeraa ne de, oggyi gyidie so; nakoso ebiala bɔ odi so ne okonya nu ngoa.”

¹³ Kristo ɔɔyɛle abusudeɛ mane yɛ, na ɔnate so wapɔ yɛ wafi mmeraa musue nu; ofikyɛ bahyerɛ kyɛ, “Banoma sona biala bɔ basinze ye wɔ bakaa so ɔ.”

¹⁴ Na ɛhe sili kyɛbɔ Amaenmaensofoɛ kɔfa Kristo Yesu so bekonya Abraham saleɛ ne bie ɔ, amaa yafa gyidie so yanya Sunzum bɔ Nyameɛ fa bɔle anohoba ne.

Mmeraa ne ne bɔhyɛ ne

¹⁵ Aliɛmaa mɔ, mefa asetena nu dwirɛ meyɛ mvandoho: sɛ ebie yɔ nzamanzeɛ na ɔfa ye sa wura ye bo a, sona biala ngora nzesã ye, yeɛ ɔngora mva bie mmoka so.

¹⁶ Abraham ne ye bosoniɛ yeɛ Nyameɛ hyɛle bɛ bɔ ɔ. Ɔnga kyɛ, “Wɔ bosofoɛ,” bɔ okyire mmeni pee; na mmom okyire sona horɛ: “Wɔ bosoniɛ,” bɔ ye ole Kristo.

¹⁷ Bɔ mekyire ɛhe: mmeraa bɔ afoɛ ɛyaa nna ne aburasa si yeɛ ɔwale ne, ɔngora mbɛ apam bɔ Nyameɛ nate Kristo so maa olili mu ne anu, na ɔmma bɔhyɛ ne nyɛ mbaen.

¹⁸ Ofikyɛ sɛ Nyameɛ agyapadeɛ ne gyi mmeraa ne aso a, nzaade oggyi bɔhyɛ so ko; nakoso Nyameɛ nate bɔhyɛ so yeɛ ɔfale agyapadeɛ ne hyɛle Abraham ɔ.

Mmeraa ne le botaeɛ

¹⁹ Afei mmeraa ne botaeɛ ole sɛɛ? Mmeraatolɛ ti yeɛ ɔmaa bɛfa bɛbokale so ɔ, kɔpem kyɛ Abraham bosoniɛ bɔ yiti yeɛ bɛhyɛle bɔ ne ɔkɔwa ɔ. Nyameɛ hyehyɛle mmeraa ne, na ɔnate abɔfo mɔ so yeɛ ɔhyehyɛle ye wɔ ndamgyinaniɛ bie sa nu ɔ.

²⁰ Ndamgyinaniɛ de ogyi mmenia nyɔ b’afia, nakoso Nyameɛ de ɔte komapɛ.

²¹ Aso ɛhe kyire kyɛ mmeraa ne tia Nyameɛ bɔhyɛ nemɔ anaa? Dabida! Ofikyɛ sɛ bɛmane sona mmeraa bie bɔ ɔkora ma daa ngoa de a, nzaade ahaa ɔte amba kyɛ sona nate mmeraa so yeɛ ɔyɛ tenenee ɔ.

²² Nakoso Ahyerɛlɛ ne kyire kyɛ abɔdeɛ mukoraa wura bɔne bo; kyɛbɔ ɔkɔyɛ ná bafa bɔhyɛ bɔ ogyi Yesu Kristo nu gyidie so ne bama agyidifoɛ ɔ.

²³ Na anzana gyidie baawa ne, bɛfale yɛ bewurale mmeraa bo bɛwɛnene yɛ bɛmane gyidie bɔ né bɛbaala ye ali bekyire ne.

²⁴ Yiti mmeraa ne yɛle yɛ neafoɛ maa oodwuli kyɛ Kristo wale ɔ, amaa ɔnate gyidie so Nyameɛ abua yɛ be.

²⁵ Nakoso kekesaala ye bɔ gyidie wɔ berɛ ye de, yɛwwura neafoɛ ne bo ko.

²⁶ Ofikyɛ ɛmɔ amukoraa bɛnate gyidie so bɛte Nyameɛ mma wɔ Kristo Yesu nu.

²⁷ Na ɛmɔ amukoraa bɔ babɔ ɛmɔ asu wɔ Kristo nu ne, ɛmɔafa Kristo bahera.

²⁸ Yiti Yudaniɛ ne Helaniɛ oo, akoaa ne dehyeɛ oo, bienzua ne brasua oo, nzonzoleɛ biala nne bɛ nu ko; ofikyɛ ɛmɔ amukoraa bɛte ko wɔ Kristo Yesu nu.

²⁹ Na sɛ ɛmɔte Kristo deɛ a, nzaade ɛmɔte Abraham bosofoɛ, na ɛmɔnate bɔhyɛ ne aso bɛte koliagyaa.