Galatiafoɛ 2 - AHYERƐLƐ KRONGRON

Pɔɔlo ne asomafoɛ ngaa ne

¹ Afoɛ buru ne nna si ne, me ne Banaba yɛhɔle Yerusalem bieku, na mvale Tito koso mmokale me nwo so.

² Nyane nyekyire ti yeɛ ngɔle berɛ ɔ, na mvale nzɛmba bɔ mekã mekyire Amaenmaensofoɛ ne ndole bɛ nyunu; nakoso mbanyi nemɔ de, nga ngyirele bɛ wɔ ahameɛ, amaa adwuma bɔ meyɔ, ɔne bɔ mayɔ ye daa ne anyɛ mbaen.

³ Nakoso Tito po bɔ ɔte Helaniɛ na ɔboka me so ne, banhyɛ ye kyɛ ɔpɛ ye bienzua.

⁴ Na aliɛmaa mɔ ngondombofoɛ bɛfeafeale bɛ nwo bɛwale berɛ bie kyɛ bɛbaatetɛ bɛpena yɛ fawɔnwodi bɔ yanya ye wɔ Kristo Yesu nu ne nwo ate, na bamaa yaawura ngoaasolɛ nu.

⁵ Na yɛ de, yamma bɛ ate mmerɛ kaala po, kyɛbɔ ɔkɔyɛ ná nahorɛ bɔ ɔwɔ nzɛmba ne anu ahɔ so atena berɛ ama ɛmɔ daa ɔ.

⁶ Na bɛ bɔ bebu bɛ nwo kyɛ bedi mu ne, bɛte nzikyɛ mmenia koraa po a, me de ɔmva me nwo; ofikyɛ Nyameɛ de ɔnyɛ nyeyemuɛ, na bɛ bɔ bebu bɛ nwo kyɛ bedi mu ne bamva hwee bammoka so.

⁷ Na mmom benwuni kyɛ bafa bɛmbɛ-bɛ-bienzuafoɛ nu nzɛmbahanɛ ne bawura me sa, kyɛbɔ bafa bienzuapɛlɛfoɛ nu deɛ bawura Petro sa ne.

⁸ Ofikyɛ Nyameɛ bɔ ɔnate Petro so yɔle asomafoɛ adwuma wɔ bienzuapɛlɛfoɛ nu ne, ye komapɛ ne ala yeɛ ɔnate me so lili dwumaa wɔ Amaenmaensofoɛ nu ɔ.

⁹ Na Yakobo, Kefa ne Yohane bɔ agyidifoɛ ne bu bɛ kyɛ bɛte bonima ma asɔre ne nwuni adom bɔ manya ye nen, besomane me ne Banaba sa nu bɛfa behyirele kyɛ bale yɛ bato nu: kyɛ yɛɛha nzɛmba ne yɛhyire Amaenmaensofoɛ, na bɛ wora bɛɛhã ye bienzuapɛlɛfoɛ nemɔ dɔ.

¹⁰ Bɛsrɛle yɛ nikyee komapɛ, kyɛ yɛkaye ehiafoɛ; na né ɛhe te nikyee bɔ mekuro kyɛ meyɔ ɔ.

Pɔɔlo twi Petro nyunu wɔ Antiokia

¹¹ Na Petro wale Antiokia nen, ndwili ye nyunu, ofikyɛ né wayɔ mvomsoɛ bie.

¹² Ofikyɛ, anzana ɛbɔfoɛ biemɔ bɛbaafi Yakobo berɛ bɛba nen, né Petro ne Amaenmaensofoɛ (agyidifoɛ) nemɔ to asaa bedidi. Nakoso bɛwale nen, ɔhwene ye nwo fili bɛ nwo, ofikyɛ né osuro bienzuapɛlɛfoɛ nemɔ.

¹³ Na Yudafoɛ ngaa ne koso yɔle sɔ mvomsoɛ ne bie, na bɛ suban tɛɛ ne mane Banaba koso hwene ye nwo bie.

¹⁴ Na nwuni kyɛ bakwati nahorɛ bɔ ɔwɔ nzɛmba ne anu nen, nzele Petro wɔ bɛ mukoraa bɛ nyunu kyɛ, “Sɛ wɔ bɔ ɛte Yudaniɛ ɛbɔ wɔ bra kyɛ Amaenmaensoniɛ, na ɛnyɛ kyɛ Yudaniɛ a, nzu ati yeɛ ɛhyɛ Amaenmaensofoɛ kyengyekyengye maa bɛbɔ bɛ bra kyɛ Yudafoɛ ɔ?”

Gyidie yeɛ ode Yudafoɛ ne Amaenmaensofoɛ ngoa ɔ

¹⁵ Yɛ de, bɛwole yɛ Yudafoɛ, na bannwo yɛ Amaenmaensofoɛ bɔnefoɛ.

¹⁶ Nakoso yɛse kyɛ ɔnate sona gyidie wɔ Yesu Kristo nu so yeɛ Nyameɛ bua ye be ɔ, na mmom ɔnnate mmeraa ne aso lilɛ. Yɛ koso yale Kristo yali, amaa ɔnate sɔ gyidie ne aso Nyameɛ abua yɛ be, na nna kyɛ mmeraa ne aso lilɛ ti ɔ; ofikyɛ nna mmeraa ne aso lilɛ yeɛ Nyameɛ kɔfa kobua sona biala be ɔ.

¹⁷ Mmerɛ bɔ yɛbɔ mmɔden kyɛ ɔnate Kristo so bekobua yɛ be ye, na sɛ benwu yɛ kyɛ yɛte bɔnefoɛ a, né ɛhe kyire kyɛ Kristo te bɔne somvoɛ anaa? Nyameɛ pa gua!

¹⁸ Yiti sɛ mesa mesi bɔ madwiri magua ne bieku a, nzaade né nde mmeraatolɛniɛ.

¹⁹ Na mede mvale mmeraa ne aso nwu mane mmeraa ne, kyɛbɔ ngɔtena ase ngɔma Nyameɛ ɔ.

²⁰ Babɔ me ne Kristo mmeamudua nu; yiti nna me yeɛ nde ase ko ɔ, na mmom Kristo yeɛ ɔte ase wɔ me nu ɔ. Na m’ase bɔ nde ye kekesaala ye wɔ anwoɔnaen nu ye de, ɔnate gyidie wɔ Nyameɛ Awa, bɔ okuro me dwirɛ na ɔfale ye ngoa tole berɛ mane me ne anu yeɛ nde ase ɔ.

²¹ Membo Nyameɛ adom ne, ofikyɛ sɛ tenenee nate mmeraa ne aso yeɛ ɔba a, né nzaade Kristo awu mbaen!