Filipifoɛ 1 - AHYERƐLƐ KRONGRON

Ahyebisalɛ

¹ Pɔɔlo ne Timoteo, bɔ yɛte Kristo Yesu ngoaa, yɛfa yɛbrɛ Kristo Yesu nu anwoteefoɛ amukoraa bɔ bɛwɔ Filipi, bɔ neafoɛ mɔ ne asomvoɛ mɔ bɛboka so ɔ.

² Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ.

Pɔɔlo bɔ mbaeɛ ma Filipi agyidifoɛ

³ Ngayeɛ bɔ mekaye ɛmɔ amukoraa nu ne, meda me Nyameɛ ase.

⁴ Daa biala, me mbaeɛbɔlɛ amukoraa nu, mebɔ mbaeɛ mema ɛmɔ amukoraa wɔ anigye so;

⁵ ɔnate ɛmɔ abiɛngoɛfalɛ bɔ ɛmɔanya ye wɔ nzɛmba ne anu fi kyẽa bɔ oli moa ne toonn maa waadwu ɛnɛ ne ati;

⁶ na mede medi kyɛ, ye bɔ ɔhyɛle adwuma paa bo wɔ ɛmɔ nu ne, ɔkɔhɔ so kɔyɔ koyie maa okoodwu Yesu Kristo kyẽa ne.

⁷ Ɛmɔla m’ahone nwo, yiti ɔte paa kyɛ medwene ɛmɔ amukoraa nwo sɔ ɔ. Ofikyɛ ɛmɔ amukoraa ɛmɔ ne me yanya kyɛfa wɔ adom ne anu, me kuku nu nnaa nu, ɔne mmerɛ bɔ ngyinane pindinn mane nzɛmba ne, ná nzili so ngane ne.

⁸ Nyameɛ di me adanzeɛ, kyɛ Kristo Yesu nu ɔdɔ yeɛ ngyi so bɔ me wora dɔ ɛmɔ amukoraa ɔ.

⁹ Na me mbaeɛ ole kyɛ, ɔdɔ bɔ ɛmɔle ye ne ɔkɔhɔ so konyi wɔ nimdeɛ ne ndeaseɛ amukoraa nu,

¹⁰ amaa ɛmɔahora banwu nningyein bɔ ɔte paa, ná ɛmɔayɛ mmenia bɔ ɛmɔ bra te sannwuu bɔ ngekalewa biala nne ɛmɔ nwo ɔ, maa waadwu Kristo kyẽa ne,

¹¹ ná tenenee mmaa bɔ ɔnate Yesu Kristo so yeɛ ɔba ne, wayi ɛmɔ nu tɛkyɛ wayɛ animnyam ne asennaa wama Nyameɛ.

Yɛte ase yɛma Kristo

¹² Aliɛmaa mɔ, mekuro kyɛ ɛmɔnwu ye kyɛ, bɔ wato me ne, waboka wama nzɛmba ne atrɛ mmom,

¹³ na ɔnate so wala ali wɔ amrado ahemviefoɛ nemɔ amukoraa nu ne mmenia ngaa nemɔ anu kyɛ, Kristo ti yeɛ nna kukunu ɔ,

¹⁴ na ɔnate me kukunu nnaa ne ati, aliɛmaa nemɔ nu pee bɔ bɛwɔ Kristo nu ne banya nguraenhyɛ, na bɛkora besi bɛ hue bɛkã Nyameɛ dwirɛ ne bɔ benzuro hwee ɔ.

¹⁵ Ɔte amba kyɛ, ebiemɔ wɔ berɛ bɔ bele sona nwo anyeboro ne apereapereɛ yeɛ bɛkã Kristo nwo dwirɛ ne ɔ, nakoso ebiemɔ de, bele adwene paa yeɛ bɛkã ɔ.

¹⁶ Na bɛ bɔ bele adwene paa yeɛ bɛkã ne, befi ɔdɔ nu yeɛ bɛkã ɔ; ofikyɛ bɛse kyɛ nzɛmba ne nwo adanzeɛlilɛ ti yeɛ nna nu wa ye;

¹⁷ nakoso ebiemɔ de, bɛkã Kristo nwo nzɛmba ne ngondii so, bɛnga ye nahorɛ nu, na bɛdwene kyɛ bɛyɔ sɔ a bɛkɔma me nwo kɔhyere me wɔ me kukunu nna ye anu.

¹⁸ Onhia po! Atee biala so, kyɛ bɛpati bɛyɔ oo, anaakyɛ bɛyɔ ye nahorɛ nu oo, Kristo nwo dwirɛ komapɛ ne ala yeɛ bɛkã ɔ; na ɛhe maa medi ahurusi, amba, ngɔhɔ so ngoli ahurusi.

¹⁹ Ofikyɛ mese kyɛ ɔnate ɛmɔ mbaeɛbɔlɛ ne Yesu Kristo Sunzum mmokalɛ so, ɛhe kɔkakyi ngoalelɛ kɔma me,

²⁰ kyɛbɔ m’anyelasoɛ paa ne nikyee bɔ menea ye ate ne ɔte ne, kyɛ me nyunu ngogua ase wɔ nikyee biala nu, na mmom ngonya ahoneserɛ, kyɛbɔ daa ɔte ne, kekesaala ye koso, na sɛ nde ase oo, sɛ mewu oo, bɛkɔkamvo Kristo wɔ me nipadua nu.

²¹ Na me de, nde ase ma Kristo, na ewue te mvasoɛ ma me.

²² Na sɛ ase bɔ nde wɔ anwoɔnaen nu ye, yeɛ ɔmaa menya ngɔsoɛ wɔ m’adwuma nu a, ye de né mennwu bɛ nu horɛ bɔ mva ɔ.

²³ Ɛhe amaa mayɛ anianiani. Ahaa mekuro kyɛ ngofi wa me ne Kristo yɛkɔɔtena, ofikyɛ ɛhene mmom yeɛ ɔte paa koraa ɔ,

²⁴ nakoso ɔnate ɛmɔ ti ohia kyɛ mekɔ so metena ase anwoɔnaen nu ɔ.

²⁵ Mesi pi wɔ ɛhe anwo, na mese kyɛ ngɔhɔ so ngɔtena ase, na me ne ɛmɔ amukoraa yɛkɔhɔ so yɛkɔtena, ná ɛmɔanya ngɔsoɛ ne gyidie nu anigye,

²⁶ amaa ɔnate me ti ɛmɔahoahoa ɛmɔ nwo mmorosoɛ wɔ Kristo Yesu nu, ɔnate ɛwalɛ bɔ mebaawa ɛmɔ berɛ bieku ne ati.

²⁷ Nzaade ohia kyɛ ɛmɔma ɛmɔ brabɔlɛ fata Kristo nzɛmba ne, amaa sɛ mebapasa ɛmɔ nwo oo, sɛ mamma oo, mate ɛmɔ nga kyɛ ɛmɔagyina pindinn wɔ sunzum ko nu, bɔ ɛmɔayɛ adwene ko bɛpere bɛma nzɛmba ne nwo gyidie,

²⁸ bɔ ɛmɔmma ɛmɔ pɔfoɛ mɔ bennwunanwuna ɛmɔ wɔ nikyee biala nu ɔ. Na ɛhe te eminilɛ bɔ bekomini ne nwo nzɛngyerɛnneɛ ma bɛ; nakoso ɛmɔ de, ɔte ngoalelɛ bɔ ofi Nyameɛ berɛ ma ɛmɔ.

²⁹ Ofikyɛ ɛmɔ de, bafa balo ɛmɔ kyɛ ɔnate Kristo ti, nna kyɛ ɔsɛ kyɛ ɛmɔde ye bedi ngome, na mmom ɔsɛ kyɛ ye ti ɛmɔnwu amaneɛ koso;

³⁰ ofikyɛ koɛ komapɛ bɔ ɛmɔnwuni kyɛ meko, ná afei ɛmɔkɔ so bɛte kyɛ nwɔ nu ne, ye ala yeɛ ɛmɔko ɔ.